കൊൽക്കത്ത: സൗത്ത് കൊൽക്കത്ത ലോ കോളേജിൽ ജൂൺ 25-ന് വൈകുന്നേരം വിദ്യാർത്ഥിനി കൂട്ടബലാത്സംഗത്തിന് ഇരയായ സംഭവത്തിൽ കൊൽക്കത്ത പൊലീസ് പ്രത്യേക അഞ്ചംഗ അന്വേഷണ സംഘം (എസ്‌ഐടി) രൂപീകരിച്ചു. എസ്‌എസ്‌ഡി യൂണിറ്റിലെ എസിപി പ്രദീപ് കുമാർ ഘോസലിന്റെ നേതൃത്വത്തിൽ പ്രവർത്തിക്കുന്ന സംഘം ഉടൻ അന്വേഷണം ആരംഭിക്കും. "ആരോപിക്കപ്പെട്ട കുറ്റകൃത്യം അന്വേഷിക്കാൻ എസ്‌ഐടി രൂപീകരിച്ചിട്ടുണ്ട്. സാക്ഷി മൊഴികളും ഫോറൻസിക് തെളിവുകളും ശേഖരിക്കാനാണ് ലക്ഷ്യം," ഉന്നത പൊലീസ് ഉദ്യോഗസ്ഥൻ വ്യക്തമാക്കി.

കേസിൽ മനോജിത് മിശ്ര, സായിബ് അഹമ്മദ്, പ്രമിത് മുഖോപാധ്യായ എന്നി പ്രതികളെ പൊലീസ് അറസ്റ്റ് ചെയ്തു. 24 വയസ്സുള്ള ഒന്നാം വർഷ വിദ്യാർത്ഥിനി, കോളേജ് ഗാർഡിന്റെ മുറിയിൽ വെച്ചാണ് സീനിയർ വിദ്യാർത്ഥികളുടെ ക്രൂര പീഡനത്തിന് ഇരയായത്. പ്രതികളെ കോടതിയിൽ ഹാജരാക്കി, ജൂലൈ 1 വരെ പൊലീസ് കസ്റ്റഡിയിൽ വിട്ടു. കൂടാതെ, കുറ്റകൃത്യത്തിന് സൗകര്യമൊരുക്കിയെന്ന് സംശയിക്കുന്ന കോളേജ് ഗാർഡിനെയും ശനിയാഴ്ച രാവിലെ അറസ്റ്റ് ചെയ്തു.

പരാതിയുടെ വിശദാംശങ്ങൾ

ജൂൺ 26-ന് കസ്ബ പൊലീസ് സ്റ്റേഷനിൽ നൽകിയ പരാതിയിൽ, വൈകുന്നേരം ജോലിക്കായി കാമ്പസിലെത്തിയപ്പോൾ പ്രതി തന്നോട് അവിടെ തുടരാൻ ആവശ്യപ്പെട്ടതായി വിദ്യാർത്ഥിനി ആരോപിച്ചു. എഫ്‌ഐആറിൽ പറയുന്നതനുസരിച്ച്, പ്രധാന പ്രതി യൂണിയൻ റൂമിന് പുറത്തേക്ക് വിളിച്ച് വിവാഹാഭ്യർത്ഥന നടത്തിയെന്നാണ് യുവതിയുടെ വാദം. എന്നാൽ, പോകാൻ ശ്രമിച്ചപ്പോൾ, മറ്റ് രണ്ട് പേരോട് "വാതിൽ പൂട്ടാൻ" ആവശ്യപ്പെട്ട്, അവളെ വാഷ്‌റൂമിന് സമീപം കൊണ്ടുപോയി ലൈംഗിക ബന്ധത്തിന് നിർബന്ധിക്കുകയായിരുന്നു. "ഞാൻ അവന്റെ കാലിൽ തൊട്ട് വിട്ടയക്കാൻ അപേക്ഷിച്ചു, പക്ഷേ അവൻ കേട്ടില്ല," എന്നാണ് അതിജീവിതയുടെ മൊഴി. പ്രതി അവളെ ബലാത്സംഗം ചെയ്യുകയും മിണ്ടാതിരിക്കാൻ ഭീഷണിപ്പെടുത്തുകയും ചെയ്തു. കൂടാതെ, പീഡന ദൃശ്യങ്ങൾ റെക്കോർഡ് ചെയ്ത് ബ്ലാക്ക്‌മെയിൽ ചെയ്തതായും യുവതി ആരോപിച്ചു.

വൈദ്യപരിശോധനയും തെളിവുകളും

അതിജീവിതയുടെ വൈദ്യപരിശോധനയിൽ ബലാത്സംഗം, കടിയേറ്റ പാടുകൾ, നഖങ്ങളുടെ പോറലുകൾ എന്നിവയുടെ തെളിവുകൾ കണ്ടെത്തി. ശരീരത്തിലെ മുറിവുകൾ ആക്രമണവുമായി പൊരുത്തപ്പെടുന്നതാണെന്ന് ഉദ്യോഗസ്ഥർ സ്ഥിരീകരിച്ചു.

രാഷ്ട്രീയ വിവാദം

സംഭവം രാഷ്ട്രീയ വിവാദത്തിനും വഴിവെച്ചിട്ടുണ്ട്. പ്രതികളിലൊരാളായ മനോജിത് മിശ്രയ്ക്ക് ഭരണകക്ഷിയായ തൃണമൂൽ കോൺഗ്രസുമായി (ടിഎംസി) ബന്ധമുണ്ടെന്ന് ഭാരതീയ ജനതാ പാർട്ടി (ബിജെപി) ആരോപിച്ചു. എന്നാൽ, മിശ്രയുമായുള്ള ബന്ധം ടിഎംസി നിഷേധിക്കുകയും പ്രതികൾക്ക് കർശന ശിക്ഷ ഉറപ്പാക്കണമെന്ന് ആവശ്യപ്പെടുകയും ചെയ്തു.

പ്രതിയുടെ പിതാവിന്റെ പ്രതികരണം

തന്റെ മകൻ കുറ്റക്കാരനാണെന്ന് തെളിഞ്ഞാൽ കർശന ശിക്ഷ വേണമെന്ന് പ്രതികളിലൊരാളുടെ പിതാവ്, ആവശ്യപ്പെട്ടു. "ആദ്യം ഞാൻ ഒരു ഇന്ത്യൻ പൗരനാണ്, പിന്നെയാണ് ഒരു പിതാവ് ആയത്. കോടതിയിലും കൊൽക്കത്ത പൊലീസിലും ഞങ്ങൾക്ക് പൂർണ വിശ്വാസമുണ്ട്," അദ്ദേഹം എഎൻഐ വാർത്താ ഏജൻസിയോട് പറഞ്ഞു.