കൊച്ചി: പ്രശസ്ത ദലിത് ചിന്തകനും എഴുത്തുകാരനും സാംസ്‌കാരിക പ്രവര്‍ത്തകനുമായ കെഎം സലിംകുമാര്‍ അന്തരിച്ചു. 76 വയസ്സുണ്ട്. മോണിയ ബാധിതനായി എറണാകുളം കടവന്ത്ര ഇന്ദിരാഗാന്ധി കോപ്പറേറ്റീവ് ആശുപത്രിയില്‍ അതിതീവ്ര പരിചരണ വിഭാഗത്തില്‍ ചികിത്സയില്‍ കഴിയുകയായിരുന്നു. ഇന്ന് പുലര്‍ച്ചെ 2.45 നാണ് അന്ത്യം.

ഇടുക്കി ജില്ലയില്‍ തൊടുപുഴ താലൂക്കില്‍ വെള്ളിയാമറ്റം പഞ്ചായത്തില്‍ കുന്നത്തു മാണിക്കന്റെ 
യും കോതയുടെയും മകനായി 1949 മാര്‍ച്ച് 10നാണ് സലിംകുമാറിന്റെ ജനനം.

നാളിയാനി ട്രൈബല്‍ എല്‍.പി സ്‌കൂള്‍, പൂച്ചപ്ര, അറക്കുളം യു.പി സ്‌കൂള്‍, മൂലമറ്റം ഗവര്‍മെന്റ് ഹൈസ്‌കൂള്‍, എറണാകുളം മഹാരാജാസ് കോളേജ് എന്നിവിടങ്ങളിലായാണ് അദ്ദേഹം പഠനം പൂര്‍ത്തിയാക്കിയത്. 
1969ല്‍ എറണാകുളം മഹാരാജാസ് കോളജില്‍ ബിരുദവിദ്യാര്‍ഥിയായിരിക്കെ നക്‌സലൈറ്റ് പ്രസ്ഥാനങ്ങളില്‍ ആകൃഷ്ടനായി. രണ്ടു പതിറ്റാണ്ടോളം കേരളത്തിലെ നക്‌സല്‍ മുന്നേറ്റങ്ങളുടെ ഭാഗമായിരുന്നു. അടിയന്തരാവസ്ഥ കാലത്ത് 17 മാസം ജയില്‍വാസമനുഷ്ടിച്ചിട്ടുണ്ട്.

ജയില്‍മോചനത്തിന് ശേഷം പിന്നാക്ക വിഭാഗങ്ങളുടെ ശാക്തീകരണത്തിനായി തന്റെ പ്രവര്‍ത്തനം നീക്കിവയ്ക്കുകയായിരുന്നു. അധഃസ്ഥിത നവോത്ഥാന മുന്നണിയുടെ ആഭിമുഖ്യത്തില്‍ 1989ല്‍ വൈക്കത്ത് മനുസ്മൃതി ചുട്ടെരിച്ച് ദലിത് ശാക്തീകരണ, അംബേദ്ക്കറൈറ്റ് പ്രവര്‍ത്തനത്തില്‍ അദ്ദേഹം ശ്രദ്ധകേന്ദ്രീകരിച്ചു. അധഃസ്ഥിത നവോത്ഥാന മുന്നണി സംസ്ഥാന കണ്‍വീനര്‍, ദലിത് ഐക്യ സമിതി സംസ്ഥാന കണ്‍വീനര്‍, കേരള ദലിത് മഹാസഭ സംസ്ഥാന സെക്രട്ടറി എന്നീ പദവികളും വഹിച്ചിരുന്നു. മുസ്ലിം സംഘടനകളുടെ വേദികളിലും അദ്ദേഹം സജീവമായിരുന്നു.

രക്ത പതാക മാസിക, അധസ്ഥിത നവോത്ഥാന മുന്നണി ബുള്ളറ്റിന്‍, ദലിത് ഐക്യ ശബ്ദം ബുള്ളറ്റിന്‍, ദലിത്   
മാസിക തുടങ്ങിയ പ്രസിദ്ധീകരണങ്ങളുടെ എഡിറ്റര്‍ ആയും പ്രവര്‍ത്തിച്ചിട്ടുണ്ട്. മാതൃഭൂമി ആഴ്ചപ്പതിപ്പില്‍ 'നെഗ്രിറ്റിയൂഡ്' എന്ന പംക്തിയും കൈകാര്യം ചെയ്തു.

സംവരണവും സമവായത്തിന്റെ രാഷ്ട്രീയവും (2006), ദലിത് പ്രത്യയശാസ്ത്രവും സമുദായവല്‍ക്കരണ 
വും(2008) ഭൂമിയുടെ ജാതിയും രാഷ്ട്രീയവും (എഡിറ്റര്‍- 2008), നെഗ്രിറ്റിയൂഡ് (2012) സംവരണം ദലിത് വീക്ഷണത്തില്‍ (2018) ദലിത് ജനാധിപത്യ ചിന്ത (2018) ഇതാണ് ഹിന്ദു ഫാസിസം (2019) വംശമേധാവിത്വത്തിന്റെ 
സൂക്ഷ്മതലങ്ങള്‍ (2021) എന്നീ പുസ്തകങ്ങള്‍ അദ്ദേഹം എഴുതിയിട്ടുണ്ട്. 'കടുത്ത' എന്ന പേരിലുളള ആത്മകഥയുടെ രചനയില്‍ കഴിയുന്നതിനിടെയാണ് രോഗം ഗുരുതരമായത്. രോഗശയ്യയില്‍ വച്ച് ഇത് ഏറെക്കുറേ പൂര്‍ത്തീകരിച്ചതായി സുഹൃത്തുക്കള്‍ അറിയിച്ചു. 

ഭാര്യ: പരേതയായ ആനന്ദവല്ലി.
മക്കള്‍: ഡോ. പി.എസ്. ഭഗത്, പി.എസ് ബുദ്ധ. മരുമകന്‍: ഗ്യാവിന്‍ ആതിഷ്.

മൃതദേഹം ഇന്ന് രാവിലെ മുതല്‍ കാക്കനാട് വാഴക്കാല ദേശീയ കവലയ്ക്ക് സമീപമുള്ള വസതിയില്‍ പൊതുദര്‍ശനത്തിന് വയ്ക്കും. സംസ്‌കാരം നാളെ ഉച്ചയ്ക്ക് 12 മണിക്ക് മൂലമറ്റം കരിപ്പിലങ്ങാട് സ്വവസതിക്ക് സമീപം.

Prominent Dalit thinker and writer KM Salimkumar of Kerala has passed away. He was suffering from pneumonia and was undergoing treatment in the intensive care unit of the Kadavanthra Indira Gandhi Cooperative Hospital in Ernakulam.