കൊച്ചി: സംസ്ഥാനത്ത് സ്വര്‍ണ വിലയില്‍ ഇന്നും വര്‍ധനവ് തന്നെ. പവന്‍ സ്വര്‍ണത്തിന്റെ വില ഇന്ന് വീണ്ടും 75,000 കടന്നിരിക്കുകയാണ്. രണ്ടാഴ്ചത്തെ ഇടവേളക്ക് ശേഷമാണ് പവന്‍ വില 75,000 രൂപ കടന്നിരിക്കുന്നത്. ആഗസ്റ്റ് എട്ടിന് പവന്‍ വില 75,760 രൂപയിലെത്തിയിരുന്നു. ഇന്നലെയും ഇന്നുമായി ഗ്രാമിന് 90 രൂപയും പവന് 720 രൂപയുമാണ് കൂടിയത്. 

യു.എസ് പ്രസിഡന്റ് ഡൊണള്‍ഡ് ട്രംപ് കേന്ദ്ര ബാങ്കായ ഫെഡറല്‍ റിസര്‍വിന്റെ ഗവര്‍ണര്‍മാരിലൊരാളായ ലിസ കുക്കിനെ പുറത്താക്കിയിരുന്നു. യു.എസിന്റെ ചരിത്രത്തില്‍ ആദ്യമായാണ് ഇത്തരമൊരു നടപടിയുണ്ടാവുന്നത്. സ്വന്തം സമൂഹമാധ്യമമായ ട്രൂത്ത് സോഷ്യല്‍ വഴിയാണ് ട്രംപ് ഇക്കാര്യം അറിയിച്ചത്. 

ALSO READ: 'അങ്ങേയറ്റം ഖേദകരവും ഞെട്ടിപ്പിക്കുന്നതെന്നും'; ഗസ്സയിലെ മാധ്യമപ്രവര്‍ത്തകരുടെ കൊലപാതകത്തില്‍ പ്രതികരിച്ച് ഇന്ത്യ

ലോകത്തിലെ ഏറ്റവും വലിയ സാമ്പത്തിക ശക്തിയാണ് യു.എസ് അതുകൊണ്ട് തന്നെ യു.എസിന്റെ സാമ്പത്തിക മേഖലയിലുണ്ടാവുന്ന ഓരോ ചലനങ്ങളും ഇന്ത്യയുള്‍പെടെ രാജ്യങ്ങളെ സ്വാധീനിക്കും. കുക്കിനെ പുറത്താക്കിയ നടപടി യു.എസ് സാമ്പത്തിക മേഖലയെ ബാധിച്ചിട്ടുണ്ട്. ഫെഡറല്‍ റിസര്‍വും പ്രസിഡന്റും തമ്മിലുള്ള ഭിന്നത അതിരുവിടുന്നത് സാമ്പത്തിക മേഖലയെ അസ്വസ്ഥപ്പെടുത്തുന്നു. ഇതിന്റെയെല്ലാം ആകെത്തുകയായുണ്ടാവുന്ന ആശങ്കയില്‍ നിന്നാണ് സ്വര്‍ണത്തിന്റെ ഈ വിലക്കയറ്റം. 

രാജ്യാന്തര സ്വര്‍ണവില 3400 ഡോളര്‍ കടക്കുമെന്നാണ് നിലവിലെ വിലയിരുത്തല്‍. അതേസമയം, സാമ്പത്തിക അനിശ്ചിതത്വങ്ങളില്‍ മാറ്റമുണ്ടായാല്‍ 3200 ഡോളറിലേക്ക് വില ഇടിയുകയും ചെയ്‌തേക്കാമെന്നും വിദഗ്ധര്‍ ചൂണ്ടിക്കാട്ടുന്നു.  രാജ്യാന്തര സ്വര്‍ണവില ഔണ്‍സിന് 3,374 ഡോളറില്‍ നിന്ന് 3,393 ഡോളര്‍ വരെ ഉയര്‍ന്നെങ്കിലും പിന്നീട് ഡോളര്‍ കരുത്തു കാട്ടിയതോടെ 3,374 ഡോളറിലെത്തുകയായിരുന്നു.

സ്വര്‍ണത്തിന്റെ രാജ്യാന്തര വില, ഡോളറിനെതിരെ രൂപയുടെ വിനിമയനിരക്ക്, സ്വര്‍ണം ഇറക്കുമതി ചെയ്യുന്ന ബാങ്കുകളുടെ നിരക്ക്, കസ്റ്റംസ് ഡ്യൂട്ടി എന്നിവയാണ് സ്വര്‍ണത്തിന്റെ വില നിര്‍ണയിക്കുന്നതിലെ അടിസ്ഥാന ഘടകങ്ങള്‍.

ഇന്നത്തെ വില അറിയാം

22 കാരറ്റ് സ്വര്‍ണത്തിന് പവന് 280 രൂപയാണ് കൂടിയത്. 75,120 രൂപയാണ് പവന്‍രെ വില. ഗ്രാമിന് 35 രൂപ കൂടി 9,390 രൂപ. 18 കാരറ്റിന് 224 രൂപ കൂടി 61,464 രൂപയായി. ഗ്രാമിന് 28 രൂപ കൂടി 7,683. 14 കാരറ്റ് ഗ്രാമിന് 6,005ഉം 9 കാരറ്റ് 3,870 രൂപയുമാണ് ഗ്രാമിന്റെ വില. 

gold prices in kerala continue to rise, with the rate crossing ₹75,000 per sovereign after a two-week gap; price up by ₹720 in just two days.