മധുര: ഇ-റേഷന്‍ കാര്‍ഡില്‍ ഉടമയുടെ ഫോട്ടോയുടെ സ്ഥാനത്ത് മദ്യക്കുപ്പിയുടെ  ചിത്രം.  തമിഴ്‌നാട്ടിലെ പേരയൂര്‍ താലൂക്കിലെ ചിന്നപുലംപട്ടി ഗ്രാമത്തിലാണ് സംഭവം. ഡ്രൈവറായ സി തങ്കവേല്‍ (56) എന്നയാളുടെ കുടുംബത്തിന്റെ റേഷന്‍ കാര്‍ഡിന്റെ ഇ-കോപ്പിയിലാണ് ചിത്രം മാറി അച്ചടിച്ച് വന്നത്.

തങ്കവേലിന്റെ മകളുടെ വിവാഹം അടുത്തിടെ കഴിഞ്ഞിരുന്നു. റേഷന്‍ കാര്‍ഡില്‍ നിന്ന് മകളുടെ പേര് നീക്കാനും തമിഴ്നാട് നിര്‍മ്മാണ തൊഴിലാളി ക്ഷേമ ബോര്‍ഡില്‍ നിന്നുള്ള ആനുകൂല്യങ്ങള്‍ ലഭിക്കുന്നതിനായി ഭാര്യയെ കാര്‍ഡില്‍ ഗുണഭോക്താവായി ചേര്‍ക്കാനുമുള്ള നടപടികള്‍ ചെയ്യുന്നതിനിടെയാണ്  ഈ പിഴവ് ശ്രദ്ധയില്‍ പെട്ടത്. എന്റോള്‍മെന്റ് പ്രക്രിയയില്‍ ഇവരുടെ ഇ-റേഷന്‍ കാര്‍ഡ് അറ്റാച്ചുചെയ്യേണ്ടിയിരുന്നു. അതിനായി നോ്ക്കിയപ്പോഴാണ് കാര്‍ഡ് ഉടമയ്ക്ക് പകരം മദ്യക്കുപ്പിയുടെ ചിത്രം കുടുംബത്തിന്റെ ശ്രദ്ധയില്‍ പെട്ടത്.

റേഷന്‍ കാര്‍ഡിന്റെ ഒറിജനല്‍ കോപ്പിയില്‍ യഥാര്‍ഥ ഫോട്ടോയാണുള്ളത്. ഇക്കാര്യം പ്രാദേശിക ഉദ്യോഗസ്ഥരെ അറിയിച്ചിട്ടുണ്ടെന്നും തങ്കവേല്‍ കൂട്ടിച്ചേര്‍ത്തു.

അതേസമയം, ഇത്തരം സംഭവങ്ങള്‍ അപൂര്‍വമാണെന്ന് ജില്ലാ സപ്ലൈ ഓഫിസര്‍ മുത്തു മുരുഗേശ പാണ്ടി പറഞ്ഞു. താലൂക്ക് ഉദ്യോഗസ്ഥരുമായി ഇക്കാര്യം പരിശോധിച്ച് എത്രയും വേഗം ഇത് പരിഹരിക്കുമെന്നും സപ്ലൈ ഓഫിസര്‍ പറഞ്ഞു.

in a bizarre incident from madurai, a man's e-ration card mistakenly displayed a liquor bottle image instead of his photo; officials promise quick correction.