മുംബൈ: മഹാരാഷ്ട്രയിൽ ഹിന്ദി അടിച്ചേൽപ്പിക്കാനുള്ള സർക്കാരിന്റെ ശ്രമത്തിനെതിരെ പ്രതിഷേധങ്ങൾ ശക്തമായതോടെ നയത്തിൽ നിന്ന് പിന്മാറി മഹാരാഷ്ട്രയിലെ ബി.ജെ.പി സർക്കാർ. ഒന്ന് മുതൽ അഞ്ച് വരെയുള്ള ക്ലാസ്സുകളിൽ ത്രിഭാഷാ നയത്തിലൂടെ ഹിന്ദി നടപ്പിലാക്കാനുള്ള ശ്രമമാണ് ഉപേക്ഷിച്ചത്. ഇതുമായി ബന്ധപ്പെട്ട രണ്ട് പ്രമേയങ്ങൾ മഹാരാഷ്ട്ര സർക്കാർ റദ്ദാക്കി. നയത്തിന്റെ ഭാവിയെക്കുറിച്ച് ഒരു പാനൽ ചർച്ച ചെയ്യുമെന്ന് മുഖ്യമന്ത്രി ദേവേന്ദ്ര ഫഡ്‌നാവിസ് അറിയിച്ചു.

സംസ്ഥാന മന്ത്രിസഭാ യോഗത്തിന് ശേഷമാണ് സർക്കാരിന്റെ തീരുമാനം. ത്രിഭാഷ നയത്തിൽ ഒരു അന്വേഷണം നടത്തുന്നതിനായി വിദ്യാഭ്യാസ വിദഗ്ധൻ ഡോ. നരേന്ദ്ര ജാദവിന്റെ നേതൃത്വത്തിൽ ഒരു കമ്മിറ്റി രൂപീകരിക്കാൻ സർക്കാർ തീരുമാനിച്ചിട്ടുണ്ട്. ഈ കമ്മിറ്റി സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ, ത്രിഭാഷാ നയം നടപ്പിലാക്കുന്നതിനെക്കുറിച്ച് സംസ്ഥാന സർക്കാർ അന്തിമ തീരുമാനം എടുക്കും. 

ALSO READ: വിവാഹത്തിനായി അമേരിക്കയിലെത്തിയ ഇന്ത്യൻ യുവതിയെ കാണാനില്ല; കൂടെ കുടുംബമില്ല, ഇംഗ്ലീഷുമറിയില്ല

ഇംഗ്ലീഷ്, മറാത്തി മീഡിയം സ്കൂളുകളിൽ പഠിക്കുന്ന 1 മുതൽ 5 വരെയുള്ള ക്ലാസുകളിലെ വിദ്യാർത്ഥികൾക്ക് ഹിന്ദി നിർബന്ധിത മൂന്നാം ഭാഷയാക്കി ഫഡ്‌നാവിസ് സർക്കാർ ഏപ്രിൽ 16 ന് ആണ് ഉത്തരവിറക്കിയത്. ശിവസേന (യുബിടി), മഹാരാഷ്ട്ര നവനിർമ്മാൺ സേന, എൻസിപി (എസ്പി) എന്നിവരടങ്ങുന്ന പ്രതിപക്ഷ മഹാ വികാസ് സംഭവത്തിൽ പ്രതിഷേധവുമായി പിന്നാലെ എത്തി.

മുംബൈയിലും സംസ്ഥാനത്തുടനീളവും ശിവസേന (യുബിടി) നേതൃത്വത്തിൽ നടന്ന പ്രതിഷേധത്തിൽ ജൂൺ പ്രമേയത്തിന്റെ പകർപ്പുകൾ കത്തിച്ച് പ്രതിഷേധിച്ചിരുന്നു. അകൽച്ചയിലുള്ള താക്കറെ സഹോദരന്മാരായ ഉദ്ധവും രാജും ഒത്തുചേർന്ന് ജൂലൈ 5 ന് ഈ വിഷയത്തിൽ പ്രതിഷേധം പ്രഖ്യാപിക്കുന്ന കാഴ്ചയ്ക്കും മഹാരാഷ്ട്ര സാക്ഷിയായി. ഇതിന് പിന്നാലെയാണ് സർക്കാർ നയത്തിൽ നിന്ന് പിന്മാറിയത്.