ന്യൂജേഴ്‌സി: അമേരിക്കയിൽ വീട്ടുകാർ നിശ്ചയിച്ച വിവാഹത്തിനായി എത്തിയ 24 കാരിയായ ഇന്ത്യൻ യുവതിയെ കാണാതായി. ജൂൺ 20 ന് ഇന്ത്യയിൽ നിന്ന് ന്യൂജേഴ്‌സിയിൽ എത്തിയതിന് തൊട്ടുപിന്നാലെയാണ് സിമ്രാൻ എന്ന യുവതിയെ കാണാതായത്. സിമ്രാനെ ബുധനാഴ്ച കാണാതായതായി പൊലിസ് സ്ഥിരീകരിച്ചു. സംഭവത്തിൽ അന്വേഷണം തുടങ്ങി.

ലിൻഡൻവോൾഡ് പൊലിസ് പരിശോധിച്ച നിരീക്ഷണ ദൃശ്യങ്ങളിൽ സിമ്രാൻ ഫോൺ പരിശോധിക്കുന്നതും ആരെയോ കാത്തിരിക്കുന്നതും കാണാം. വീഡിയോയിൽ അവർ എന്തെങ്കിലും അപകടത്തിൽ ആണെന്ന് തോന്നുന്നില്ലെന്ന് ഉദ്യോഗസ്ഥർ പറഞ്ഞു. നിശ്ചയിച്ച വിവാഹം കഴിക്കാനാണ് അവർ യുഎസിലേക്ക് പോയതെന്ന് പ്രാഥമിക അന്വേഷണത്തിൽ വ്യക്തമായതായി അവരുടെ തിരോധാനം അന്വേഷിക്കുന്ന ഉദ്യോഗസ്ഥർ പറഞ്ഞു. 

അമേരിക്കയിലേക്ക് കടക്കുന്നതിനായി വിവാഹം മറയാക്കിയതാണോ എന്ന സാധ്യതയും അധികൃതർ പരിശോധിക്കുന്നുണ്ടെന്ന് ദി ന്യൂയോർക്ക് പോസ്റ്റ് റിപ്പോർട്ട് ചെയ്യുന്നു. സിമ്രാന്റെ ബന്ധുക്കളാരും അമേരിക്കയിൽ ഇല്ലെന്നും ഇംഗ്ലീഷ് സംസാരിക്കാൻ അവർക്കറിയില്ലെന്നും പൊലിസ് പറഞ്ഞു. വൈ-ഫൈ വഴി മാത്രം പ്രവർത്തിക്കുന്ന ഫോൺ മാത്രമാണ് ഇവരുടെ കയ്യിൽ ഉള്ളത്. ഇന്ത്യയിലെ ഒരു കുടുംബാംഗത്തെയും ഇതുവരെ ബന്ധപ്പെടാൻ അധികാരികൾക്ക് കഴിഞ്ഞിട്ടില്ല.

ALSO READ: നരനായാട്ട് അവസാനിപ്പിക്കാതെ ഇസ്‌റാഈല്‍; ഇന്ന് മാത്രം കൊന്നൊടുക്കിയത് 72 ഫലസ്തീനികളെ 

അഞ്ചടി നാല് ഇഞ്ച് ഉയരവും ഏകദേശം 68 കിലോഗ്രാം ഭാരവുമാണ് സിമ്രാന് ഉള്ളതെന്ന് പൊലിസ് പറയുന്നു. നെറ്റിയുടെ ഇടതുവശത്ത് ഒരു ചെറിയ പാടുണ്ട്. ചാരനിറത്തിലുള്ള സ്വെറ്റ് പാന്റ്സും, വെളുത്ത ടീ-ഷർട്ടും, കറുത്ത ഫ്ലിപ്പ്-ഫ്ലോപ്പുകളും, വജ്രം പതിച്ച ചെറിയ കമ്മലുകളും ധരിച്ചാണ് അവരെ അവസാനമായി കണ്ടത്.

പിറ്റ്സ്ബർഗ് സർവകലാശാലയിലെ ഇന്ത്യൻ വിദ്യാർഥിനിയായ  20 കാരിയായ സുദീക്ഷ കൊണങ്കി പുന്ത കാന ബീച്ചിൽ നിന്ന് അപ്രത്യക്ഷയായി ഏതാനും മാസങ്ങൾക്ക് ശേഷമാണ് ഈ സംഭവം ഉണ്ടാവുന്നത്.