ഇന്ത്യ-ഇംഗ്ലണ്ട് രണ്ടാം ടെസ്റ്റ് മത്സരം നാളെയാണ് ആരംഭിക്കുന്നത്. എഡ്ജ്ബാസ്റ്റൺ സ്റ്റേഡിയത്തിലാണ് രണ്ടാം മത്സരം നടക്കുന്നത്. ആദ്യ ടെസ്റ്റിൽ പരാജയപ്പെട്ട ഇന്ത്യ രണ്ടാം മത്സരത്തിൽ വിജയിച്ചുകൊണ്ട് തിരിച്ചുവരാനായിരിക്കും ലക്ഷ്യം വെക്കുക. ആദ്യ മത്സരത്തിൽ അഞ്ച് വിക്കറ്റുകൾക്കായിരുന്നു ഇംഗ്ലണ്ട് ഇന്ത്യയെ വീഴ്ത്തിയത്. മത്സരത്തിൽ ഇന്ത്യ ഉയർത്തിയ 372 റൺസ് വിജയലക്ഷ്യം പിന്തുടർന്നിറങ്ങിയ ഇംഗ്ലണ്ട് അഞ്ചു വിക്കറ്റുകൾ ബാക്കിനിൽക്കെ അനായാസമായി ലക്ഷ്യം മറികടക്കുകയായിരുന്നു. 

ഈ ടെസ്റ്റ് മത്സരം വിജയിക്കാൻ ഇന്ത്യക്ക് സാധിച്ചാൽ മറ്റൊരു ഇന്ത്യൻ ക്യാപ്റ്റന്മാർക്കും നേടാൻ സാധിക്കാത്ത വിജയം ക്യാപ്റ്റൻ ശുഭ്മൻ ഗില്ലിനു നേടാൻ സാധിക്കും. രണ്ടാം ടെസ്റ്റ് നടക്കുന്ന എഡ്ജ്ബാസ്റ്റൺ സ്റ്റേഡിയത്തിൽ ടെസ്റ്റിൽ ഇന്ത്യക്ക് ഒരു മത്സരത്തിൽ പോലും വിജയിക്കാൻ സാധിച്ചിട്ടില്ല. അതുകൊണ്ട് തന്നെ രണ്ടാം ടെസ്റ്റ് വിജയിച്ചാൽ ഗില്ലിന് ക്യാപ്റ്റനായി പുതിയ ചരിത്രവും സൃഷ്ടിക്കാൻ സാധിക്കും. ഈ വേദിയിൽ ഇതുവരെ എട്ട് മത്സരങ്ങളിലാണ് ഇന്ത്യ കളിച്ചിട്ടുള്ളത്. ഇതിൽ ഏഴ് മത്സരങ്ങൾ പരാജയപ്പെട്ടപ്പോൾ ഒരു മത്സരം സമനിലയിൽ പിരിയുകയും ചെയ്തു. 

ആദ്യ മത്സരത്തിലെ തോൽവിക്ക് പിന്നാലെ ഒരു തിരിച്ചടിയുടെ റെക്കോർഡും ഗിൽ സ്വന്തമാക്കിയിരുന്നു. 2000ത്തിനുശേഷം ഇന്ത്യൻ ടെസ്റ്റ് ടീമിന്റെ ക്യാപ്റ്റൻസി ഏറ്റെടുത്ത ആദ്യ മത്സരത്തിൽ തന്നെ പരാജയപ്പെടുന്ന ക്യാപ്റ്റൻമാരുടെ ലിസ്റ്റിലാണ് ഗില്ലും ഇടം നേടിയത്. വിരാട് കോഹ്‌ലി, കെഎൽ രാഹുൽ, ജസ്പ്രീത് ബുംറ എന്നീ താരങ്ങളാണ് ഇതിനുമുമ്പ് ഇത്തരത്തിൽ ക്യാപ്റ്റൻസി ഏറ്റെടുത്ത ആദ്യ ടെസ്റ്റ്‌ മത്സരത്തിൽ തന്നെ പരാജയം ഏറ്റുവാങ്ങിയിരുന്നത്. 

2014ലാണ് വിരാട് ഇന്ത്യൻ ടെസ്റ്റ് ടീമിന്റെ ക്യാപ്റ്റനായി തെരഞ്ഞെടുക്കപ്പെടുന്നത്. ആദ്യ മത്സരത്തിൽ ഓസ്ട്രേലിയയോടാണ് കോഹ്‌ലിയുടെ കീഴിൽ ഇന്ത്യ പരാജയപ്പെട്ടത്. പിന്നീട് 2022ൽ സൗത്ത് ആഫ്രിക്കെതിരെ രാഹുലും അതേ വർഷത്തിൽ തന്നെ ഇംഗ്ലണ്ടിനെതിരെ ബുംറയും ഇത്തരത്തിൽ തോൽവികൾ ഏറ്റുവാങ്ങി.

മത്സരത്തിൽ സെഞ്ച്വറി നേടി ഗിൽ തിളങ്ങിയിരുന്നു. ഒന്നാം ഇന്നിങ്‌സിലായിരുന്നു ഗില്ലിന്റെ സെഞ്ച്വറി നേട്ടം. ഗില്ലിന് പുറമെ മത്സരത്തിൽ ഇന്ത്യക്കായി റിഷബ് പന്ത് രണ്ട് സെഞ്ച്വറികൾ നേടി മികച്ച പ്രകടനമാണ് നടത്തിയത്. യശ്വസി ജെയ്‌സ്വാൾ, കെഎൽ രാഹുൽ എന്നീ താരങ്ങളും സെഞ്ച്വറികൾ നേടി.

If India wins the second India-England Test at Edgbaston Stadium Shubman Gill can create new history as captain