അഹമ്മദാബാദ്: 300 വര്‍ഷം പഴക്കമുള്ള ദര്‍ഗ തകര്‍ത്ത ജുനഗഡ് മുനിസിപ്പല്‍ കോര്‍പ്പറേഷന് ഗുജറാത്ത് ഹൈക്കോടതി നോട്ടീസ്. ജുനഗഡിലെ ഹസ്‌റത്ത് ജോക്ക് അലിഷാ ദര്‍ഗ പൊളിച്ചുമാറ്റിയത്, ബുള്‍ഡോസര്‍ രാജിനെതിരായ സുപ്രിംകോടതിയുടെ വ്യക്തമായ മാര്‍ഗനിര്‍ദേശങ്ങളുടെ ലംഘനമാണെന്നും പൊളിക്കലിന് നുതൃത്വം നല്‍കിയ മുനിസിപ്പല്‍ കമ്മിഷണറുടെയും സീനിയര്‍ ടൗണ്‍ പ്ലാനറുടെയും നടപടി കോടതിയലക്ഷ്യമാണെന്നും ചൂണ്ടിക്കാട്ടിയാണ് ഹൈക്കോടതി നടപടി. സുപ്രിംകോടതി ഉത്തരവിനെയും ഇക്കാര്യത്തിലെ പൊതുനയത്തെയും മുനിസിപ്പാലിറ്റി അവഗണിച്ചെന്ന് പ്രഥമദൃഷ്ട്യാ വ്യക്തമായെന്നും ജസ്റ്റിസ് എ.എസ് സുപേഹിയയും ജസ്റ്റിസ് ആര്‍.ടി വച്ചാനിയും അടങ്ങുന്ന ഡിവിഷന്‍ ബെഞ്ച് നിരീക്ഷിച്ചു. സുപ്രിംകോടതി പുറപ്പെടുവിച്ച നിര്‍ദ്ദേശങ്ങള്‍ ലംഘിക്കപ്പെട്ടാല്‍ കോടതിയലക്ഷ്യ നടപടികള്‍ ആരംഭിക്കാനുള്ള സ്വാതന്ത്ര്യം ഹൈക്കോടതികളില്‍ നിക്ഷിപ്തമാണെന്ന് നോട്ടീസില്‍ കോടതി ചൂണ്ടിക്കാട്ടി. ദര്‍ഗയുടെ നടത്തിപ്പ് ചുമതലയുള്ള ട്രസ്റ്റി സമര്‍പ്പിച്ച കോടതിയലക്ഷ്യ ഹരജി പരിഗണിക്കുകയായിരുന്നു ഡിവിഷന്‍ ബെഞ്ച്.

ALSO READ: ഗസ്സ വെടിനിര്‍ത്തല്‍ ചര്‍ച്ച സജീവം: കരാര്‍ ഇസ്‌റാഈല്‍ അംഗീകരിച്ചെന്ന് ട്രംപ്, നെതന്യാഹു വൈറ്റ്ഹൗസിലേക്ക്; ഈജിപ്ത് - ഖത്തര്‍ മധ്യസ്ഥര്‍ ഹമാസ് നേതാക്കളെ കാണും | Gaza Ceasefire

ദര്‍ഗ പൊളിക്കാന്‍ തീരുമാനിച്ച മുനിസിപ്പാലിറ്റി, ഈ വര്‍ഷം ജനുവരിയില്‍ ദര്‍ഗയ്ക്ക് നോട്ടീസ് നല്‍കി. ഭൂമിയുടെ നിര്‍മ്മാണത്തെയും ഉടമസ്ഥാവകാശത്തെയും സംബന്ധിച്ച ആവശ്യമായ രേഖകളും തെളിവുകളും സമര്‍പ്പിക്കാനാണ് സീനിയര്‍ ടൗണ്‍ പ്ലാനര്‍ വിവേക് കിരണ്‍ പരേഖ് നല്‍കിയെ നോട്ടീസില്‍ ആവശ്യപ്പെട്ടിരുന്നത്. ഒരുമാസത്തിനുള്ളില്‍ തന്നെ ദര്‍ഗ എല്ലാ രേഖകളും സഹിതം മറുപടി നല്‍കി. എന്നാല്‍ ഇത് സ്വീകരിക്കാതിരുന്ന മുനിസിപ്പാലിറ്റി ഏപ്രിലില്‍ വീണ്ടും നോട്ടീസയച്ചു. അതിന് ഒരാഴ്ചയ്ക്കുള്ളില്‍ മറുപടി നല്‍കി. എന്നാല്‍ മറുപടി അയച്ച് ഒരാഴ്ചയ്ക്കുള്ളില്‍ (ഏപ്രില്‍ 15) മുനിസിപ്പാലിറ്റി ബുള്‍ഡോസറുകളുമായെത്തി ദര്‍ഗ പൊളിച്ചുനീക്കിയെന്ന് ഹരജിക്കാര്‍ ചൂണ്ടിക്കാട്ടി. 300 വര്‍ഷം പഴക്കമുള്ള ദര്‍ഗ 1964 ല്‍ രജിസ്റ്റര്‍ ചെയ്തതാണെന്നും സംസ്ഥാന വഖ്ഫ് ബോര്‍ഡിന്റെ അധികാരപരിധിയിലാണെന്നും നോട്ടീസ് നിയമവിരുദ്ധമാണെന്നും ഹരജിക്കാര്‍ കോടതിയില്‍ വാദിച്ചു. കേസ് ജൂലൈ 28ന് വീണ്ടും പരിഗണിക്കും.

Gujarat High Court issued a contempt notice to Junagadh's Municipal Commissioner and the Senior Town Planner after prima facie observing that the officers acted in “defiance” of the Supreme Court's order and the state government's policy by demolishing 300-years-old Hazrat Jok Alisha Dargah .