ഗസ്സ: ഗസ്സയില്‍ വീണ്ടും വെടിനിര്‍ത്തല്‍ സജീവമാക്കി യു.എസ് പ്രസിഡന്റ് ഡൊണാള്‍ഡ് ട്രംപിന്റെ ഇടപെടല്‍. ഇസ്‌റാഈലുമായുള്ള 60 ദിവസത്തെ വെടിനിര്‍ത്തലിനുല്‍ 'അന്തിമ നിര്‍ദ്ദേശം' അംഗീകരിക്കാന്‍ ഡൊണാള്‍ഡ് ട്രംപ് ഹമാസിനോട് ആവശ്യപ്പെട്ടു. ഖത്തറില്‍ നിന്നും ഈജിപ്തില്‍ നിന്നുമുള്ള മധ്യസ്ഥ ഉദ്യോഗസ്ഥര്‍ ഇതുസംബന്ധിച്ച ട്രംപിന്റെ നിര്‍ദേശം ഹമാസിന് ഔദ്യോഗികമായി നല്‍കും. വെടിനിര്‍ത്തല്‍ നിര്‍ദേശം ഇസ്‌റാഈല്‍ അംഗീകരിച്ചതായും ട്രംപ് പറഞ്ഞു. പിന്നാലെ ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ വൈറ്റ്ഹൗസിലേക്ക് ക്ഷണിച്ചതായി യു.എസ് അറിയിച്ചു.

60 ദിവസത്തെ വെടിനിര്‍ത്തല്‍ അന്തിമമാക്കുന്നതിനുള്ള വ്യവസ്ഥകള്‍ ഇസ്‌റാഈല്‍ അംഗീകരിച്ചിട്ടുണ്ടെന്നും ആ സമയത്ത് യുദ്ധം അവസാനിപ്പിക്കാന്‍ ഞങ്ങള്‍ എല്ലാ കക്ഷികളുമായും പ്രവര്‍ത്തിക്കുമെന്നും ട്രംപ് പറഞ്ഞു. ഖത്തറിന്റെയും ഈജിപ്തിന്റെയും പ്രതിനിധികള്‍ ഈ അന്തിമ നിര്‍ദ്ദേശം ഹമാസിന് കൈമാറും. മിഡില്‍ ഈസ്റ്റിന്റെ നന്മയ്ക്കായി ഹമാസ് ഈ കരാര്‍ സ്വീകരിക്കുമെന്ന് ഞാന്‍ പ്രതീക്ഷിക്കുന്നു. കാരണം ഇപ്പോഴത്തെ സാഹചര്യം നല്ലതല്ല. അത് കൂടുതല്‍ വഷളാകുകയേയുള്ളൂ. ഈ വിഷയത്തില്‍ നിങ്ങളുടെ ശ്രദ്ധയ്ക്ക് നന്ദി!- ട്രംപ് കുറിച്ചു.

ഗസ്സയെക്കുറിച്ച് ഇസ്‌റാഈല്‍ അധികൃതരുമായി തന്റെ പ്രതിനിധികള്‍ ദീര്‍ഘവും ഫലപ്രദവുമായ കൂടിക്കാഴ്ച നടത്തിയതായി ട്രംപ് സോഷ്യല്‍ മീഡിയ പോസ്റ്റില്‍ പറഞ്ഞു. പശ്ചിമേഷ്യയിലേക്കുള്ള യുഎസ് പ്രത്യേക പ്രതിനിധി സ്റ്റീവ് വിറ്റ്‌കോഫ്, സ്റ്റേറ്റ് സെക്രട്ടറി മാര്‍ക്കോ റൂബിയോ, വൈസ് പ്രസിഡന്റ് ജെഡി വാന്‍സ് എന്നിവര്‍ ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ മുതിര്‍ന്ന ഉപദേഷ്ടാവായ റോണ്‍ ഡെര്‍മറെ കാണുന്നുണ്ട്.

ഇസ്‌റാഈലും ഹമാസും തമ്മില്‍ അടുത്തയാഴ്ച വെടിനിര്‍ത്തുന്നതിനുള്ള കരാര്‍ സാധ്യമാകുമെന്ന് പ്രതീക്ഷിക്കുന്നതായി ട്രംപ് നേരത്തെ മാധ്യമപ്രവര്‍ത്തകരോട് പറഞ്ഞിരുന്നു. 

യുദ്ധം അവസാനിപ്പിക്കുന്നതിന് ശേഷിക്കുന്ന ബന്ദികളെ മോചിപ്പിക്കാന്‍ തയ്യാറാണെന്ന് ഹമാസ് പ്രഖ്യാപിച്ചിട്ടുണ്ട്. അതേസമയം ഹമാസിനെ നിരായുധീകരിച്ചാല്‍ മാത്രമേ ആക്രമണം അവസാനിപ്പിക്കാന്‍ കഴിയൂ എന്നാണ് ഇസ്രായേല്‍ വാദം. 

പകുതി ബന്ദികളെ മോചിപ്പിക്കലും അതിനനുസൃതമായി 60 ദിവസത്തെ വെടിനിര്‍ത്തലുമാണ് യു.എസ് നിര്‍ദേശം. ഇതോടൊപ്പം ഫലസ്തീന്‍ തടവുകാരെയും ഇസ്‌റാഈല്‍ മോചിപ്പിക്കും. പലപ്പോഴായി ഗസ്സയില്‍നിന്നും വെസ്റ്റ്ബാങ്കില്‍നിന്നുമായി 15,000 ഓളം ഫലസ്തീനികളെയാണ് ഇസ്‌റാഈല്‍ അധിനിവേശ സൈന്യം നിയമവിരുദ്ധമായി പിടിച്ചുകൊണ്ടുപോയത്.

US President Donald Trump says Israel has agreed to “the necessary conditions to finalise” a 60-day ceasefire in Gaza, and urges Hamas to accept the proposal.