എഡ്ജ്ബാസ്റ്റൺ: ഇന്ത്യ-ഇംഗ്ലണ്ട് രണ്ടാം ടെസ്റ്റ് മത്സരത്തിന് തുടക്കമായിരിക്കുകയാണ്. ആദ്യ ടെസ്റ്റിൽ പരാജയപ്പെട്ട ഇന്ത്യ രണ്ടാം മത്സരത്തിൽ വിജയിച്ചുകൊണ്ട് തിരിച്ചുവരാനായിരിക്കും ലക്ഷ്യം വെക്കുക. മത്സരത്തിൽ യുവതാരം സായ് സുദർശനെ ഇന്ത്യ രണ്ടാം ടെസ്റ്റിനുള്ള ടീമിൽ ഇടം ഒഴിവാക്കി. ആദ്യ മത്സരത്തിലെ മോശം പ്രകടനങ്ങൾക്ക് പിന്നാലെയാണ് സായ് സുദർശന് രണ്ടാം ടെസ്റ്റിൽ അവസരം ലഭിക്കാതെ പോയത്.

ഇതോടെ ടെസ്റ്റ് ക്രിക്കറ്റിൽ അരങ്ങേറ്റം കുറിച്ച മത്സരത്തിന് ശേഷം നടക്കുന്ന രണ്ടാം മത്സരത്തിൽ അവസരം ലഭിക്കാതെ പോയ താരങ്ങളുടെ പട്ടികയിലും താരം ഇടം നേടി. ഇതിനു മുമ്പ് നാല് താരങ്ങളാണ് ഇത്തരത്തിൽ ആദ്യ അരങ്ങേറ്റം മത്സരത്തിന് ശേഷം ടീമിൽ നിന്നും പുറത്താക്കപ്പെട്ടത്. സൂര്യകുമാർ യാദവ്‌, നമൻ ഓജ, കരൺ ശർമ്മ, വിനയ് കുമാർ എന്നീ താരങ്ങളാണ് ഇത്തരത്തിൽ ആദ്യ മത്സരത്തിന് ശേഷം രണ്ടാം മത്സരത്തിൽ ടീമിൽ ഇടം നേടാതെ പോയത്. ഇപ്പോൾ ഈ താരങ്ങളുടെ പട്ടികയിൽ സായ് സുദർശനും ഇടം പിടിച്ചിരിക്കുകയാണ്. 

ഐപിഎല്ലിൽ ഈ സീസണിൽ ഗുജറാത്ത് ടൈറ്റൻസിനായി മിന്നും പ്രകടനമാണ് സായ് പുറത്തെടുത്തത്. ഈ സീസണിലെ ഓറഞ്ച് ക്യാപ് സ്വന്തമാക്കിയത് സായ് സുദർശനാണ്. 15 മത്സരങ്ങളിൽ നിന്നും 759 റൺസാണ് സായ് സുദർശൻ നേടിയത്.

ഫസ്റ്റ് ക്ലാസ് ക്രിക്കറ്റിലും മികച്ച പ്രകടനമാണ് ഈ തമിഴ്‌നാട്ടുകാരൻ നടത്തിക്കൊണ്ടിരിക്കുന്നത്. 2024-25 രഞ്ജി ട്രോഫിയിൽ മികച്ച പ്രകടനമായിരുന്നു സായ് പുറത്തെടുത്തത്. തമിഴ്‌നാടിനായി വെറും മൂന്ന് മത്സരങ്ങളിൽ നിന്ന് 304 റൺസായിരുന്നു സായ് അടിച്ചെടുത്തത്. ഡൽഹിക്കെതിരെ ഇരട്ട സെഞ്ച്വറി നേടിയും താരം തിളങ്ങിയിരുന്നു. ഈ തകർപ്പൻ പ്രകടനങ്ങൾക്ക് പിന്നാലെയാണ് സായ് ടെസ്റ്റ് ടീമിൽ ഇടം നേടിയത്. 

അതേസമയം രണ്ടാം ടെസ്റ്റ് നടക്കുന്ന എഡ്ജ്ബാസ്റ്റൺ സ്റ്റേഡിയത്തിൽ ടെസ്റ്റിൽ ഇന്ത്യക്ക് ഒരു മത്സരത്തിൽ പോലും വിജയിക്കാൻ സാധിച്ചിട്ടില്ല. ഈ വേദിയിൽ ഇതുവരെ എട്ട് മത്സരങ്ങളിലാണ് ഇന്ത്യ കളിച്ചിട്ടുള്ളത്. ഇതിൽ ഏഴ് മത്സരങ്ങൾ പരാജയപ്പെട്ടപ്പോൾ ഒരു മത്സരം സമനിലയിൽ പിരിയുകയും ചെയ്തു. 

ഇംഗ്ലണ്ട് പ്ലെയിങ് ഇലവൻ 

സാക്ക് ക്രാളി, ബെൻ ഡക്കറ്റ്, ഒല്ലി പോപ്പ്, ജോ റൂട്ട്, ഹാരി ബ്രൂക്ക്, ബെൻ സ്റ്റോക്സ് (ക്യാപ്റ്റൻ), ജാമി സ്മിത്ത് (വിക്കറ്റ് കീപ്പർ), ക്രിസ് വോക്സ്, ബ്രൈഡൺ കാർസെ, ജോഷ് ടോങ്, ഷോയിബ് ബഷീർ.

ഇന്ത്യ പ്ലെയിങ് ഇലവൻ 

യശസ്വി ജയ്‌സ്വാൾ, കെ എൽ രാഹുൽ, കരുൺ നായർ, ശുഭ്മാൻ ഗിൽ(ക്യാപ്റ്റൻ), റിഷബ് പന്ത്(വിക്കറ്റ് കീപ്പർ), നിതീഷ് കുമാർ റെഡ്ഡി, രവീന്ദ്ര ജഡേജ, വാഷിംഗ്ടൺ സുന്ദർ, ആകാശ് ദീപ്, മുഹമ്മദ് സിറാജ്, പ്രശസ്ത് കൃഷ്ണ.