ന്യൂഡൽഹി: തലസ്ഥാനത്തെ വർദ്ധിച്ചുവരുന്ന വായു മലിനീകരണം നിയന്ത്രിക്കാൻ ലക്ഷ്യമിട്ട് ഡൽഹി സർക്കാർ പഴയ വാഹനങ്ങൾക്ക് ഇന്ധനം നിറയ്ക്കുന്നതിന് ഏർപ്പെടുത്തിയ നിരോധന നയത്തിനെതിരെ സമൂഹമാധ്യമങ്ങളിൽ വ്യാപക പ്രതിഷേധം. പുതിയ നയമനുസരിച്ച്, 10 വർഷത്തിൽ കൂടുതൽ പഴക്കമുള്ള ഡീസൽ വാഹനങ്ങൾക്കും 15 വർഷത്തിൽ കൂടുതൽ പഴക്കമുള്ള പെട്രോൾ വാഹനങ്ങൾക്കും ഡൽഹിയിലെ പെട്രോൾ പമ്പുകളിൽ ഇന്ധനം നിറയ്ക്കാൻ അനുവാദമില്ല. വാഹനങ്ങളുടെ രജിസ്ട്രേഷൻ നില പരിശോധിച്ചാണ് ഇനി ഇന്ധനം അനുവദിക്കുക. ജൂലൈ 1 മുതൽ ഈ നിയമം പ്രാബല്യത്തിൽ വന്നതായി റിപ്പോർട്ടുകൾ.

ഈ നയം വാഹന ഉടമകൾക്കിടയിൽ വലിയ അസംതൃപ്തി സൃഷ്ടിച്ചു, പ്രത്യേകിച്ച് നന്നായി പരിപാലിച്ച് മികച്ച രീതിയിൽ പ്രവർത്തിക്കുന്ന വാഹനങ്ങളുടെ ഉടമകൾക്ക്. രജിസ്ട്രേഷൻ കാലാവധി അടിസ്ഥാനമാക്കിയുള്ള ഈ നിയന്ത്രണം, വാഹനങ്ങൾ തുച്ഛമായ വിലയ്ക്ക് വിൽക്കേണ്ട അവസ്ഥയിലേക്ക് ഉടമകളെ തള്ളിവിടുന്നതായി വിമർശനം. സമൂഹമാധ്യമങ്ങളിൽ നയത്തെ "അന്യായവും അപ്രായോഗികവുമാണ്" എന്ന് വിശേഷിപ്പിച്ച് ശക്തമായ പ്രതിഷേധം ഉയർന്നു.

ഒരു ഡൽഹി സ്വദേശി എക്സിൽ തന്റെ നിരാശ പ്രകടിപ്പിച്ച് എഴുതി: "എന്റെ മാതാപിതാക്കളുടെ 15 വർഷം പഴക്കമുള്ള കാർ, 20,000 കിലോമീറ്റർ മാത്രം ഓടിയിട്ടും പുതിയത് പോലെ പ്രവർത്തിക്കുന്നു. എഞ്ചിന് തകരാറില്ല, PUC മികച്ചതാണ്. എന്നിട്ടും, ഈ പുതിയ നയം കാരണം അത് ഉപേക്ഷിക്കണം." എന്നാൽ, ചിലർ നയത്തെ അനുകൂലിച്ച് രംഗത്തെത്തി. ഈ നിയമം ഡൽഹിയിൽ മാത്രമേ ബാധകമാകൂ എന്നും, പഴയ വാഹനങ്ങൾ ഡൽഹിക്ക് പുറത്ത് ഓടിക്കുകയോ വിൽക്കുകയോ ചെയ്യാമെന്നും അവർ ചൂണ്ടിക്കാട്ടി. സമൂഹമാധ്യമങ്ങളിലെ പ്രതിഷേധം മാത്രം പോര, നിയമത്തിനെതിരെ കോടതിയെ സമീപിക്കണമെന്നും ചിലർ അഭിപ്രായപ്പെട്ടു.

Delhi’s new vehicle policy banning fuel for diesel vehicles older than 10 years and petrol vehicles older than 15 years has sparked widespread criticism. Many vehicle owners argue the rule is unfair to well-maintained cars still in excellent condition. Social media is flooded with complaints, with users calling the policy impractical and demanding legal action.