തിരുവനന്തപുരം: യൂത്ത് കോൺഗ്രസ് അധ്യക്ഷ തെരഞ്ഞെടുപ്പുമായി ബന്ധപ്പെട്ട് വ്യാജ തിരിച്ചറിയൽ കാർഡ് തയാറാക്കിയെന്ന കേസിൽ രാഹുൽ മാങ്കൂട്ടത്തിൽ എം.എൽ.എയെ ക്രൈംബ്രാഞ്ച് ഇന്ന് ചോദ്യം ചെയ്യും. ചോദ്യംചെയ്യലിന് ഹാജരാകാൻ രാഹുലിന് ക്രൈംബ്രാഞ്ച് നോട്ടിസ് നൽകിയിരുന്നു. വ്യാജ തിരിച്ചറിയൽ കാർഡ് കേസിൽ പത്തനംതിട്ട സ്വദേശികളായ അഞ്ചുപേരാണ് പ്രതികൾ. രാഹുൽ മാങ്കൂട്ടത്തിലുമായി അടുത്തബന്ധമുള്ള ഫെനി നൈനാനാണ് ഒന്നാംപ്രതി. 

കേസിൽ നിലവിൽ പ്രതിയല്ലെങ്കിലും ഡിജിറ്റൽ തെളിവുകളിൽ രാഹുലിനെതിരായ ചില വിവരങ്ങൾ ലഭിച്ചിരുന്നു. അതിനിടെ, കേസിന്റെ ഭാഗമായി പത്തനംതിട്ടയിൽ രാഹുൽ മാങ്കൂട്ടത്തിലുമായി ബന്ധമുള്ള ചിലരുടെ വീടുകളിൽ ക്രൈംബ്രാഞ്ച് ഇന്നലെ പരിശോധന നടത്തി. കെ.എസ്.യു ജില്ലാ സെക്രട്ടറി നുബിൻ ബിനുവിന്റെ മൊബൈൽ ഫോൺ പിടിച്ചെടുത്തിട്ടുമുണ്ട്. സംഘടനാ പ്രവർത്തനവുമായി ബന്ധപ്പെട്ട രേഖകളും അന്വേഷണസംഘം പിടിച്ചെടുത്തതായാണ് വിവരം. 

യൂത്ത് കോൺഗ്രസ് ഭാരവാഹി തെരഞ്ഞെടുപ്പിന് മുമ്പ് മെംബർഷിപ്പ് കാംപയിനുമായി ബന്ധപ്പെട്ട പ്രവർത്തനങ്ങൾക്ക് നേതൃത്വം നൽകിയ പ്രവർത്തകരുടെ വീടുകളിൽ രാവിലെ 10 ഓടെ രണ്ട് സംഘങ്ങളായിട്ടായിരുന്നു പരിശോധന. അടൂരിലെ വീടുകളിലാണ് ആദ്യം പരിശോധന നടത്തിയത്. 

ALSO READ: രാഹുലിനെ കാണാൻ തെരുവുകൾ തിങ്ങിനിറഞ്ഞ് ജനം; വോട്ടർ അധികാർ യാത്ര 14-ാം ദിവസത്തിലേക്ക്

യൂത്ത് കോൺഗ്രസ് സംസ്ഥാന അധ്യക്ഷ തെരഞ്ഞെടുപ്പിനായി വ്യാജ തിരിച്ചറിയൽ കാർഡ് ഉണ്ടാക്കിയെന്നത് ഏറെ വിവാദമായിരുന്നു. ഈ സംഭവത്തിൽ തിരുവനന്തപുരം മ്യൂസിയം പൊലിസായിരുന്നു കേസെടുത്തത്. പൊലിസ് രാഹുലിനെ നേരത്തെ ചോദ്യംചെയ്തിരുന്നു. വ്യാജ തിരിച്ചറിയൽ കാർഡ് നിർമിച്ച സംഭവത്തിൽ രാഹുലിനെ നേരിട്ട് ബന്ധപ്പെടുത്താനുള്ള തെളിവ് ലഭിച്ചില്ലെന്നാണ് അന്ന് പൊലിസ് സൂചിപ്പിച്ചിരുന്നത്. പിന്നീട് കേസ് ക്രൈംബ്രാഞ്ചിന് കൈമാറുകയായിരുന്നു. 

കേസിൽ ഫെനി നൈനാനെ കൂടാതെ രഞ്ജു എം.ജെ, അഭി വിക്രം, ബിനിൽ ബിനു, വ്യാജ കാർഡ് ഉണ്ടാക്കുന്നതിനുള്ള ആപ്ലിക്കേഷൻ തയാറാക്കിയ കാസർകോട്ടെ യൂത്ത് കോൺഗ്രസ് നേതാവ് ജയ്‌സൺ വികാസ് കൃഷ്ണ എന്നിവരാണ് പ്രധാന പ്രതികൾ. 

അതേസമയം, രാഹുലിനെതിരായ ലൈംഗിക ആരോപണ പരാതി അന്വേഷിക്കുന്ന ക്രൈംബ്രാഞ്ച് ഡിവൈ.എസ്.പി ബിനുകുമാർ കഴിഞ്ഞദിവസം വിവരങ്ങൾ ശേഖരിച്ചിരുന്നു. മാധ്യമവാർത്തകളുടെ അടിസ്ഥാനത്തിലുള്ള ചില പരാതികൾ മാത്രമാണ് ഇപ്പോൾ ക്രൈംബ്രാഞ്ചിന്റെ മുന്നിലുള്ളത്.