തിരൂരങ്ങാടി: കൊടിഞ്ഞി പുല്ലാണി ഫൈസല്‍ വധക്കേസില്‍ വിചാരണ ആരംഭിച്ചു. തിരൂര്‍ അഡിഷനല്‍ ഡിസ്ട്രിക്ട് ആന്‍ഡ് സെഷന്‍സ് കോടതിയിലാണ് ചൊവ്വാഴ്ച വിചാരണ ആരംഭിച്ചത്. ഇസ് ലാംമതം സ്വീകരിച്ചതിന്റെപേരില്‍ 2016 നവംബര്‍ 19ന് പുലര്‍ച്ചെയാണ് കൊടിഞ്ഞി ഫാറൂഖ് നഗറില്‍ വച്ച് ഫൈസലിനെ ആര്‍.എസ്.എസ്  ബി.ജെ.പി പ്രവര്‍ത്തകര്‍ വെട്ടിയും കുത്തിയും കൊലപ്പെടുത്തിയത്.

ALSO READ: എസ്എഫ്ഐ സമ്മേളനത്തിന് അവധി നല്‍കിയ സംഭവത്തില്‍ പ്രധാനാധ്യാപകനെ പിന്തുണച്ച്‌ ഡി.ഇ.ഒ റിപ്പോർട്ട്

തിരൂര്‍ പുല്ലൂണി കരാട്ടുകടവ് സ്വദേശി കണക്കന്‍ പ്രജീഷ് (39), വള്ളിക്കുന്ന് അത്താണിക്കല്‍ മുണ്ടിയംകാവ് പറമ്പ് സ്വദേശി പല്ലാട്ട് ശ്രീജേഷ് (35), നന്നമ്പ്ര വെള്ളിയാമ്പുറം ചൂലന്‍കുന്ന് സ്വദേശിയും തിരൂര്‍ പുല്ലൂണിയില്‍ താമസക്കാരനുമായ തടത്തില്‍ സുധീഷ് കുമാര്‍ (34) എന്നിവരാണ് കൃത്യത്തില്‍ പങ്കുള്ള പ്രതികള്‍. ഇതുമായി ബന്ധപ്പെട്ട ഗൂഢാലോചനാ കേസില്‍ തിരൂര്‍ മഠത്തില്‍ നാരായണന്‍ (56), ഫൈസലിന്റെ സഹോദരി ഭര്‍ത്താവ് കൊടിഞ്ഞി ചുള്ളിക്കുന്ന് പുല്ലാണി വിനോദ് (48), ഫൈസലിന്റെ മാതൃസഹോദര പുത്രന്‍ പുല്ലാണി സജീഷ് (41), പുളിക്കല്‍ ഹരിദാസന്‍ (39), ഇയാളുടെ ജ്യേഷ്ഠന്‍ ഷാജി (48), ചാനത്ത് സുനില്‍ (48), കളത്തില്‍ പ്രദീപ് (41), പാലത്തിങ്ങല്‍ പള്ളിപ്പടി സ്വദേശി ലിജീഷ് (36), പരപ്പനങ്ങാടി സ്വദേശിയും വിമുക്തഭടനുമായ കോട്ടയില്‍ ജയപ്രകാശ് (59), വള്ളിക്കുന്ന് അത്താണിക്കല്‍ കോട്ടാശ്ശേരി ജയകുമാര്‍ (57) എന്നിവരും പ്രതികളാണ്. കേസിലെ പ്രതി ബിബിന് കുടകില്‍ ഒളിച്ചുതാമസിക്കാന്‍ സഹായിച്ച തിരൂര്‍ തൃപ്രങ്ങോട് പൊയിലിശ്ശേരി എടപ്പറമ്പില്‍ രതീഷ്(36) കൊലപാതകത്തിന് ഉപയോഗിച്ച ആയുധം സൂക്ഷിച്ച തിരൂര്‍ തൃപ്രങ്ങോട് പൊയിലിശ്ശേരി പുതുശ്ശേരി വിഷ്ണുപ്രകാശ് (36) എന്നിവരും പ്രതിപ്പട്ടികയിലുണ്ട്. രണ്ടാംപ്രതി തിരൂര്‍ ആലത്തിയൂര്‍ കുട്ടിച്ചാത്തന്‍പടി കുണ്ടില്‍ ബിബിന്‍ (26) 2017ല്‍ തിരൂരില്‍വച്ച് കൊല്ലപ്പെട്ടിരുന്നു.