മഞ്ചേരി: മഞ്ചേരി മെഡിക്കൽ കോളജ് ആശുപത്രിയിൽ ഒരു കെട്ടിടമുണ്ട്. കോട്ടയം മെഡിക്കൽ കോളജിലെ ദുരന്തവാർത്തകൾ കേൾക്കുമ്പോൾ ഭയം ഇരട്ടിയാക്കുന്ന 40 വർഷം പഴക്കമുള്ള കെട്ടിടം. തറമുതൽ നാലാംനിലയുടെ ടെറസുവരെ വിണ്ടുകീറിയും കല്ലുകൾ ഇളകിമാറിയും അപകടാവസ്ഥയിലെന്ന് തോന്നിക്കുന്ന കെട്ടിടം. ബുധനാഴ്ച വൈകീട്ട് 5.30 വരെയുള്ള ആശുപത്രിയിലെ കണക്കുപ്രകാരം ഈ കെട്ടിടത്തിൽ വിവിധ വാർഡുകളിലായി 368 രോഗികൾ ചികിത്സയിലുണ്ട്.  കൂടാതെ ഇവരുടെ കൂട്ടിരിപ്പുകാരും.  

കണ്ണ് ഓപറേഷൻ തിയറ്റർ, കണ്ണ് രോഗചികിത്സാ വിഭാഗം, ദന്തരോഗ ചികിത്സാ വിഭാഗം എന്നിവ കെട്ടിടത്തിൻ്റെ ഒന്നാം നിലയിലാണ് പ്രവർത്തിക്കുന്നത്. ഐ.സി.യു, സി.എസ്.എസ്.ഡി, കാത്ത് ലാബ് തുടങ്ങിയ സൗകര്യങ്ങളാണ് രണ്ടാം നിലയിൽ. മൂന്നാം നിലയിൽ സ്ത്രീകളുടെയും പുരുഷൻമാരുടെയും മെഡിസിൻ വാർഡാണ്. ഓർത്തോ വാർഡ്, ഹൃദ്രോഗ വിഭാഗം, മെഡിസിൻ, റസ്‌പിറേറ്ററി മെഡിസിൻ എന്നിവയും പ്രവർത്തിക്കുന്നുണ്ട്. 

നാലുനിലകളിലും ടോയ്ലറ്റ് ബ്ലോക്ക് പ്രവർത്തിക്കുന്നുണ്ട്. ഈ ഭാഗത്താണ് കെട്ടിടം തകർച്ചാ ഭീഷണിയിലെന്ന് തോന്നിക്കുന്ന രീതിയിൽ പൊട്ടിപ്പൊളിഞ്ഞിരിക്കുന്നത്. 

ALSO READ: കോട്ടയം ദുരന്തം ആവർത്തിക്കുമോ? കണ്ണൂർ, കാസർകോട് ആശുപത്രികളിലെ ദുരവസ്ഥയെക്കുറിച്ച് അറിയാം

അപകടം സംഭവിച്ചാൽ വലിയ ദുരന്തമാകും നേരിടേണ്ടിവരിക.  1982ൽ ഉപമുഖ്യമന്ത്രിയായിരുന്ന സി.എച്ച് മുഹമ്മദ് കോയയാണ് കെട്ടിടത്തിനു ശിലയിട്ടത്. അന്ന് ജില്ലാ ആശുപത്രിക്കു വേണ്ടി പോളി ക്ലിനിക്ക് ആൻഡ് അഡ്മിനിസ്ട്രേറ്റീവ് ബ്ലോക്ക് എന്ന പേരിലാണ് കെട്ടിടം പണിതത്.

താഴ് ഭാഗം മുതൽ കെട്ടിടത്തിൻ്റെ നാലാം നിലവരെ പലയിടത്തായി സിമൻ്റുകൾ അടർന്നു വീണിരുന്നു. രോഗികൾ ആശങ്ക പ്രകടിപ്പിച്ചതോടെ പുറമേ അറ്റക്കുറ്റ പ്രവൃത്തി നടത്തി. താഴ് ഭാഗത്തുനിന്നും നാല് മീറ്ററോളം ഉയരത്തിൽ ചുമരിലെ കല്ലുകൾ ഇടിഞ്ഞുവീണിരുന്നു. ഇവിടെ സിമൻ്റ് കട്ടകൾ ഉപയോഗിച്ച് നിറച്ചിരിക്കുകയാണിപ്പോൾ. 
കെട്ടിടത്തിൻ്റെ പല ഭാഗങ്ങളിലും കേടുപാടുകൾ കണ്ടിട്ടും പരിശോധിക്കാനുള്ള നടപടികൾ ഉണ്ടായിട്ടില്ല. ഈ കെട്ടിടത്തിനോട് ചേർന്ന് പുതിയ കംഫർട്ട് സ്റ്റേഷൻ നിർമിക്കാനുള്ള ശ്രമം നടത്തിയിരുന്നു. ഇത് പിന്നീട് ഉപേക്ഷിച്ചു. കെട്ടിടത്തിൻ്റെ ഫിറ്റ്നസ് സംബന്ധിച്ച പരിശോധനക്ക് പദ്ധതി തയാറാക്കുന്നതായി പൊതുമരാമത്ത് വകുപ്പ് അധികൃതർ പറഞ്ഞു. കെട്ടിടത്തിൻ്റെ ശോച്യാവസ്ഥ ഇന്നലെ ആശുപത്രി അധികൃതരുടെ ശ്രദ്ധയിൽപ്പെടുത്തിയപ്പോൾ ഫണ്ട് ഇല്ലെന്ന മറുപടിയാണ് ലഭിച്ചത്. 

A 40-year-old building at Manjeri Medical College Hospital has raised serious safety concerns, especially after a similar building collapse at Kottayam Medical College Hospital recently resulted in fatalities. With over 368 patients and their attendants currently housed in the precarious structure, fears are growing about a potential disaster. The building shows visible signs of wear and tear, with cracks and loose stones from the ground floor to the fourth floor's terrace ¹.