ബെൽഗ്രേഡ്: സെർബിയയിൽ തിങ്കളാഴ്ച ആയിരക്കണക്കിന് സർക്കാർ വിരുദ്ധ പ്രതിഷേധക്കാർ തലസ്ഥാനമായ ബെൽഗ്രേഡിൽ മാർച്ച് നടത്തി. പ്രതിഷേധങ്ങൾ അടിച്ചമർത്തുമെന്ന് പ്രസിഡന്റ് അലക്സാണ്ടർ വുസിക് ആവർത്തിച്ചു. സമാധാനപരമായിരുന്ന പ്രതിഷേധത്തിനിടെ, ഫുട്ബോൾ ഗുണ്ടകൾ എന്ന് സംശയിക്കപ്പെടുന്ന ഒരു കൂട്ടം യുവാക്കൾ ഭരണകക്ഷിയായ സെർബിയൻ പ്രോഗ്രസീവ് പാർട്ടിയുടെ ഓഫീസുകളുടെ ജനാലകൾ കല്ലെറിഞ്ഞ് തകർത്തു.

സെർബിയൻ പൊലിസ് കവചിത ട്രക്കുകളുമായി എത്തി ജനക്കൂട്ടത്തെ പിരിച്ചുവിട്ടതോടെ പരിഭ്രാന്തരായ ആളുകൾ രക്ഷപ്പെട്ടു. തന്റെ പാർട്ടി ഓഫീസിന്റെ തകർന്ന ഭാഗം സന്ദർശിച്ച വുസിക്, പ്രതിഷേധക്കാരെ "തീവ്രവാദികൾ" എന്ന് വിശേഷിപ്പിച്ച്, "പൗരന്മാർ ഈ ഭീകരതയിൽ നിന്നും തിന്മയിൽ നിന്നും ഉടൻ മോചിതരാകും" എന്ന് പ്രഖ്യാപിച്ചു.

ദിവസങ്ങളായി തുടരുന്ന അശാന്തിക്കിടെ, സർക്കാർ വിരുദ്ധ പ്രക്ഷോഭകർക്കെതിരെ കർശന നടപടി സ്വീകരിക്കുമെന്ന് വുസിക് ഞായറാഴ്ച പ്രസ്താവിച്ചിരുന്നു. പ്രതിഷേധങ്ങൾ പാശ്ചാത്യ രാജ്യങ്ങൾ സംഘടിപ്പിക്കുന്നതാണെന്നും സെർബിയയെ തകർക്കാൻ ലക്ഷ്യമിടുന്നുവെന്നും അദ്ദേഹം ആരോപിച്ചു. "നമ്മുടെ രാജ്യം ഗുരുതരമായ അപകടത്തിലാണ്. അവർ നമ്മുടെ മൂല്യങ്ങളെയും സാധാരണ ജീവിതത്തെയും അപകടപ്പെടുത്തുന്നു," വുസിക് പറഞ്ഞു.

കഴിഞ്ഞ ശനിയാഴ്ച പടിഞ്ഞാറൻ സെർബിയയിൽ വുസികിന്റെ പാർട്ടി ഓഫീസുകൾക്ക് പ്രതിഷേധക്കാർ തീയിട്ടിരുന്നു. വരും ദിവസങ്ങളിൽ സർക്കാർ എന്ത് നടപടി സ്വീകരിക്കുമെന്ന് വുസിക് വ്യക്തമാക്കിയിട്ടില്ല. ഇതിനോടകം ഡസൻ കണക്കിന് ആളുകളെ അറസ്റ്റ് ചെയ്യുകയും പരിക്കേൽപ്പിക്കുകയും ചെയ്തിട്ടുണ്ട്. പൊലിസിനെതിരെ അമിത ബലപ്രയോഗവും അനിയന്ത്രിത അറസ്റ്റുകളും ആരോപിക്കപ്പെടുന്നു.

വടക്കൻ സെർബിയയിലെ ഒരു ട്രെയിൻ സ്റ്റേഷനിൽ കോൺക്രീറ്റ് ഷെൽട്ടർ തകർന്ന് 16 പേർ മരിച്ച സംഭവത്തെ തുടർന്നാണ് ഒമ്പത് മാസത്തിലേറെയായി സമാധാനപരമായ പ്രതിഷേധങ്ങൾ ആരംഭിച്ചത്. സർക്കാർ നടത്തുന്ന അടിസ്ഥാന സൗകര്യ പദ്ധതികളിലെ അഴിമതിയാണ് ഈ ദുരന്തത്തിന് കാരണമെന്ന് പലരും ആരോപിക്കുന്നു. ജനാധിപത്യ സ്വാതന്ത്ര്യങ്ങളെ അടിച്ചമർത്തുകയും അഴിമതിയും സംഘടിത കുറ്റകൃത്യങ്ങളും വളരാൻ അനുവദിക്കുകയും ചെയ്യുന്നുവെന്നാണ് വുസികിനെതിരെ ഉയരുന്ന ആരോപണങ്ങൾ. എന്നാൽ, അദ്ദേഹം ഈ ആരോപണങ്ങൾ നിഷേധിക്കുന്നു.

സെർബിയ ഔദ്യോഗികമായി യൂറോപ്യൻ യൂണിയനിൽ അംഗത്വം തേടുന്നുണ്ടെങ്കിലും, വുസിക് റഷ്യയുമായും ചൈനയുമായും ശക്തമായ ബന്ധം നിലനിർത്തുന്നു.

Thousands of anti-government protesters marched in Belgrade, Serbia, despite President Vučić's pledge to suppress demonstrations. A group attacked the ruling party’s office, prompting riot police to disperse the crowd. Vučić called protesters "terrorists" and alleged foreign influence. Protests, sparked by a train station collapse killing 16, cite government corruption. Dozens have been arrested amid accusations of police brutality.