കോഴിക്കോട്: ക്യാപ്റ്റനും മേജറുമല്ല, കോൺഗ്രസിന് വേണ്ടി 24 മണിക്കൂറും പ്രവർത്തിക്കുന്ന കർമഭടൻമാരുടെ വലിയ നിരയാണ് വേണ്ടതെന്ന് മുതിർന്ന കോൺഗ്രസ് നേതാവ് മുല്ലപ്പള്ളി രാമചന്ദ്രൻ. പതിനായിരക്കണക്കിന് പടയാളികൾ കോൺഗ്രസിനുണ്ടെന്നും അവരാണ് പാർട്ടിയുടെ കരുത്തെന്നും അദ്ദേഹം മാധ്യമങ്ങളോട് പറഞ്ഞു. ലളിത ജീവിതത്തിന്റെയും ഉയർന്ന ചിന്തയുടെയും പ്രതീകമാണ് ഖാദി. കാലാനുസൃതമായി ഖാദിയിലും മാറ്റങ്ങൾ ഉണ്ടായിട്ടുണ്ട്. പുതുതലമുറയ്ക്ക് കളർ വസ്ത്രങ്ങളോടാണ് ആഭിമുഖ്യമെങ്കിൽ അത് ആവട്ടെ. ഗാന്ധിയൻ ആദർശം വളരെ മൂല്യവത്തായ ഒന്നാണ്. അത് കോൺഗ്രസുകാർ ജീവിതത്തിൽ പകർത്തണം. കോൺഗ്രസ് ഖാദിയിൽ നിന്നും മാറുന്നു എന്ന വാദം അംഗീകരിക്കാൻ പറ്റില്ലെന്നും അദ്ദേഹം പറഞ്ഞു.