മലപ്പുറം: മലബാറിൽ വസൂരി പടരുന്ന കാലം, മരണത്തിന് മുന്നിൽ പകച്ച് നിൽക്കുന്ന കുറെ മനുഷ്യർ.. അവർക്കിടയിൽ ആത്മീയതയുടെ ഉൾക്കരുത്തിന്റെ മന്ത്രോച്ചാരണവുമായി ഒരു സൂഫിവര്യൻ, കേരള രാഷ്ട്രീയത്തിൽ മുസ്‌ലിം ലീഗ് എന്ന പാർട്ടിക്ക് കൊടപ്പനക്കൽ തറവാടിന്റെ കോലായിൽ പരവതാനി ഒരുക്കിയ അധ്യക്ഷൻ, പാണക്കാട് പുതിയ മാളിയേക്കൽ സയ്യിദ് അഹമ്മദ് പൂക്കോയ തങ്ങൾ (പി.എം.എസ്.എ പൂക്കോയ തങ്ങൾ). വിട വാങ്ങിയിട്ട് ഇന്നേക്ക് അരനൂറ്റാണ്ട് തികയുമ്പോഴും അദ്ദേഹത്തിന്റെ ഓർമകൾ പേറുകയാണ് ഇന്നും കേരളം. 1975 ജൂലൈ 6 ഞായറാഴ്ച (1395 ജമാദുൽ ആഖിർ 25)യാണ് നാലു പതിറ്റാണ്ട് കേരളത്തിലെ മത-രാഷ്ട്രീയ-വിദ്യാഭ്യാസ-സാംസ്‌കാരിക രംഗങ്ങളിൽ നിർണായക വ്യക്തിത്വമായിരുന്ന പി.എം.എസ്.എ പൂക്കോയ തങ്ങൾ വിടവാങ്ങിയത്.

ALSO READ: രണ്ട് ദിവസത്തെ സന്ദര്‍ശനത്തിനായി ഉപരാഷ്ട്രപതി ഇന്ന് കൊച്ചിയില്‍; നഗരത്തില്‍ ഇന്നും നാളെയും ഗതാഗത നിയന്ത്രണം

സയ്യിദ് മുഹമ്മദ് കോയഞ്ഞിക്കോയ തങ്ങൾ - ഉമ്മു ഹാനിഅ ബീവി എന്നിവരുടെ മകനായി 1917ൽ ആയിരുന്നു പൂക്കോയ തങ്ങളുടെ ജനനം. ചെറു പ്രായത്തിൽ പിതാവിന്റെ വിയോഗത്തെ തുടർന്ന് പിതൃസഹോദരൻ അലി പൂക്കോയ തങ്ങളുടെ തണലിലായിരുന്നു വളർന്നത്. അറിയപ്പെട്ട ചികിത്സകനായിരുന്നു കൊടപ്പനക്കൽ തറവാട്ടിലെ അലി പൂക്കോയ തങ്ങൾ. അദ്ദേഹത്തിന്റെ വിയോഗത്തോടെയാണ് കൊടപ്പനക്കൽ തറവാട് പാണക്കാട് പൂക്കോയ തങ്ങൾക്ക് കൈമാറിയത്.

1936-37 കാലഘട്ടത്തിൽ കോൺഗ്രസിന്റെ മുന്നണി പോരാളിയായിരുന്ന മുഹമ്മദ് അബ്ദുറഹ്മാൻ സാഹിബിനൊപ്പം ചേർന്നാണ് പൂക്കോയ തങ്ങൾ ആദ്യമായി രാഷ്ട്രീയ രംഗത്തേക്ക് ചുവടുവെച്ചത്. പിന്നീട് മുസ്‍ലിം ലീഗിലേക്കെത്തിയ തങ്ങൾ ലീഗ് ഏറനാട് താലൂക്ക് പ്രസിഡന്റും കോഴിക്കോട് ജില്ലാ പ്രസിഡന്റുമായിരുന്നു. മലപ്പുറം ജില്ല രൂപീകരിച്ചപ്പോൾ ആദ്യ ജില്ലാപ്രസിഡന്റും പൂക്കോയ തങ്ങളായിരുന്നു. 1973ൽ ബാഫഖി തങ്ങളുടെ വിയോഗത്തെ തുടർന്നാണ് പി.എം.എസ്.എ പൂക്കോയ തങ്ങൾ മുസ്‌ലിംലീഗ് സംസ്ഥാന അധ്യക്ഷസ്ഥാനത്തെത്തുന്നത്. അക്കാലത്ത് തന്നെ ഉപ തെരഞ്ഞെടുപ്പിൽ മുസ്‌ലിം ലീഗ്  ഐതിഹാസിക വിജയം നേടി.പാണക്കാട് കൊടപ്പനക്കൽ തറവാട്ടിൽ നിന്നുള്ള ആദ്യ മുസ്‍ലിംലീഗ് അധ്യക്ഷനാണ് പൂക്കോയ തങ്ങൾ.
രാഷ്ട്രീയ നേതാവിനപ്പുറം ആത്മീയ തേജസ്വോടെ ജീവിച്ചിരുന്ന അപൂർവ്വ സൂരികളിൽ ഒരാളായിരുന്നു പി.എം.എസ്.എ പൂക്കോയ തങ്ങൾ. എന്നും സമസ്തക്കൊപ്പമായിരുന്നു സഞ്ചാരം.1959ൽ വടകരിയിൽ ചേർന്ന വിദ്യാഭ്യാസ ബോർഡിന്റെ സമ്മേളനത്തിന്റെ ഉദ്ഘാടകൻ തങ്ങളായിരുന്നു. എസ്.വൈ.എസ് സംസ്ഥാന പ്രസിഡന്റ് പദവിയിലുമെത്തിയ അദ്ദേഹം സമസ്ത മുശാവറയിലേക്കും തെരഞ്ഞെടുക്കപ്പെട്ടു. അടിപതറാത്ത സുന്നി ആദർശമായിരുന്നു തങ്ങളുടേത്. അതിനാൽ തന്നെയായിരുന്നു സമസ്തക്കെതിരേ അഖില കേരള ജംഇയ്യത്തുൽ ഉലമ രൂപം കൊണ്ടപ്പോൾ അദ്ദേഹം നിശിതമായി എതിർത്തതും.

ALSO READ: സംസ്ഥാനത്ത് ഇന്നും ശക്തമായ മഴക്ക് സാധ്യത; രണ്ട് ജില്ലകളില്‍ ഓറഞ്ച് അലര്‍ട്ട്

കൊടപ്പനക്കൽ തറാവാടിന്റെ പൂമുഖത്ത് ജാതിമതഭേതമന്യേ ആളുകളെത്തി തുടങ്ങിയത് പൂക്കോയ തങ്ങളുടെ കാലം മുതലാണ്. ആത്മീയ കാര്യങ്ങളിൽ അദ്ദേഹം സൂഫിവര്യനാകും, രാഷ്ട്രീയമായതിൽ തികഞ്ഞ പൊതുപ്രവർത്തനകനും, അതിനപ്പുറം സാധാരണക്കാരയ അശരണർക്ക് എന്നും കൈത്താങ്ങുമായിരുന്നു. ഏത് പാതിരാത്രിയിലും തന്നെ തേടിയെത്തുന്ന അവസാനത്തെയാളും പോയതിന് ശേഷമായിരുന്നു അദ്ദേഹത്തിന്റെ വിശ്രമം. വസൂരിയടക്കമുള്ള മാറാ രോഗങ്ങളാൽ നാട് നടുങ്ങിയപ്പോൾ അദ്ദേഹം പ്രത്യേക നേർച്ചകളും മറ്റും നടത്താൻ മഹല്ലുകളോട് ആവശ്യപ്പെട്ടിരുന്നു. അദ്ദേഹത്തിന്റെ കാർമികത്വത്തിൽ നിരവധി പള്ളികളും മദ്‌റസകളും വിദ്യാഭ്യാസ സ്ഥാപനങ്ങളും ഉയർന്നു. ഇന്നും പൂക്കോയ തങ്ങളുടെ നാമധേയത്തിലുള്ള വിദ്യാഭ്യാസ സ്ഥാപനങ്ങൾ തലയെടുപ്പോടെ ഉയർന്ന് നിൽക്കുന്നു. അദ്ദേഹത്തിന്റെ വിയോഗത്തിന് ശേഷമാണ് മകൻ പാണക്കാട് സയ്യിദ് മുഹമ്മദലി ശിഹാബ് തങ്ങൾ മുസ്‍ലിം ലീഗിന്റെ  സംസ്ഥാന അധ്യക്ഷനാകുന്നത്.