തിരുവനന്തപുരം: സർവകലാശാലകളെ രാഷ്ട്രീയ നാടകവേദിയാക്കുന്നത് അവസാനിപ്പിക്കണമെന്നും ഉന്നത വിദ്യാഭ്യാസ മേഖലയെ സർക്കാരും ഗവർണറും ചേർന്ന് തകർത്തുവെന്നും പ്രതിപക്ഷ നേതാവ് വിഡി സതീശൻ. വിദ്യാർത്ഥികളുടെയും രക്ഷിതാക്കളുടെയും ആശങ്ക വർധിപ്പിക്കുന്ന സ്ഥിതിയാണ് ഇപ്പോഴുള്ളതെന്ന് അദ്ദേഹം വിമർശിച്ചു. സർക്കാർ-രാജ്ഭവൻ തർക്കങ്ങൾ സർവകലാശാലകളുടെ പ്രവർത്തനത്തെ അനിശ്ചിതത്വത്തിലാക്കിയിരിക്കുകയാണ്.

"ഉന്നത വിദ്യാഭ്യാസ മേഖലയുടെ തകർച്ചയ്ക്ക് സർക്കാരിനും ഗവർണർക്കും ഒരുപോലെ പങ്കുണ്ട്. ഡൽഹിയിലെ യജമാനന്മാരെ പ്രീതിപ്പെടുത്താൻ മുഖ്യമന്ത്രിയും മന്ത്രിമാരും ഗവർണർക്ക് വഴങ്ങിക്കൊടുത്തതിന്റെ ഫലമാണ് ഇന്ന് അനുഭവിക്കുന്നത്," വിഡി സതീശൻ ആരോപിച്ചു. കാലഘട്ടത്തിനനുസരിച്ചുള്ള അക്കാദമിക പരിഷ്കരണങ്ങൾ നടപ്പാക്കാതെ, സർവകലാശാലകളെയും കോളജുകളെയും എ.കെ.ജി സെന്ററിന്റെ ഡിപ്പാർട്ട്മെന്റുകളാക്കി മാറ്റുകയാണ് സർക്കാർ ചെയ്യുന്നതെന്നും അദ്ദേഹം കുറ്റപ്പെടുത്തി.

നിലവാര തകർച്ച മൂലം ഉന്നത വിദ്യാഭ്യാസത്തിനായി വിദ്യാർത്ഥികൾ അന്യസംസ്ഥാനങ്ങളിലേക്കും വിദേശത്തേക്കും പോകേണ്ട സ്ഥിതിയാണുള്ളതെന്നും അദ്ദേഹം ചൂണ്ടിക്കാട്ടി. "കുട്ടികളുടെ ഭാവിയെ മറന്നുള്ള രാഷ്ട്രീയം അവസാനിപ്പിച്ചില്ലെങ്കിൽ ചരിത്രം നിങ്ങളോട് പൊറുക്കില്ല," വിഡി സതീശൻ മുന്നറിയിപ്പ് നൽകി.

കേരള സർവകലാശാലയിൽ തർക്കം

കേരള സർവകലാശാല സിൻഡിക്കേറ്റ് യോഗത്തിലെ തർക്കങ്ങളെ തുടർന്ന് ഗവർണർ രാജേന്ദ്ര വിശ്വനാഥ ആർലേക്കർ അടിയന്തര റിപ്പോർട്ട് ആവശ്യപ്പെട്ടു. താത്കാലിക വൈസ് ചാൻസലർ ഡോ. സിസ തോമസ് റിപ്പോർട്ട് ഉടൻ സമർപ്പിക്കണമെന്നാണ് ഗവർണറുടെ നിർദേശം. സിൻഡിക്കേറ്റ് യോഗത്തിൽ വി.സി ഇറങ്ങിപ്പോയ ശേഷവും യോഗം തുടർന്നതിൽ ജോയിന്റ് രജിസ്ട്രാർ പി. ഹരികുമാർ വിശദീകരണം നൽകാതെ അവധിയിൽ പ്രവേശിച്ചു.

എന്നാൽ, ഹരികുമാറിന്റെ അവധി അപേക്ഷ ലഭിച്ചിട്ടില്ലെന്നാണ് ഡോ. സിസ തോമസിന്റെ നിലപാട്. സിൻഡിക്കേറ്റ് തീരുമാനപ്രകാരമാണ് താൻ ചുമതല ഏറ്റെടുത്തതെന്ന് രജിസ്ട്രാർ ഡോ. കെ.എസ്. അനിൽകുമാർ വ്യക്തമാക്കി. "സർവകലാശാല നാടിന്റെ സ്വത്താണ്, അത് ശാന്തമായി മുന്നോട്ടുപോകണം," അദ്ദേഹം പറഞ്ഞു. വി.സിയുടെ നിർദേശപ്രകാരം ജോയിന്റ് രജിസ്ട്രാർ രണ്ടാഴ്ചത്തെ സാവകാശം തേടിയെങ്കിലും, യോഗം തുടർന്നത് ചട്ടലംഘനമാണെന്നാണ് വി.സിയുടെ വിലയിരുത്തൽ. രജിസ്ട്രാർ ഡോ. കെ.എസ്. അനിൽകുമാറിന്റെ സസ്പെൻഷൻ പിൻവലിച്ചതോടെ അദ്ദേഹം ചുമതലയിൽ തിരിച്ചെത്തി. എന്നാൽ, ഇതിൽ വി.സി അതൃപ്തി പ്രകടിപ്പിച്ചു. ഡോ. സിസ തോമസിന്റെ താത്കാലിക വി.സി കാലാവധി നാളെ അവസാനിക്കും.

Opposition Leader VD Satheesan criticized the government and the Governor for jointly undermining Kerala's higher education sector, urging an end to turning universities into political battlegrounds. He highlighted that ongoing disputes between the government and Raj Bhavan have created uncertainty in university operations, affecting students and parents. Satheesan accused the government of neglecting academic reforms and prioritizing political agendas, leading to a decline in educational standards and forcing students to seek higher education elsewhere