ഗസ്സ: ഗസ്സയില്‍ മാധ്യമപ്രവര്‍ത്തകരെ കൊലപ്പെടുത്തിയ ഇസ്‌റാഈല്‍ നടപടിയില്‍ പ്രതികരിച്ച് ഇന്ത്യ. ഗസ്സയിലെ ഖാന്‍ യൂനിസില്‍ മാധ്യമപ്രവര്‍ത്തകര്‍ കൊല്ലപ്പെട്ടതില്‍ ആശങ്ക പ്രകടിപ്പിച്ച കേന്ദ്ര വിദേശകാര്യമന്ത്രലായം, ഇത് ഞെട്ടിക്കുന്നതും അങ്ങേയറ്റം സങ്കടകരവുമാണെന്ന് പ്രസ്താവനയില്‍ പറഞ്ഞു.

മാധ്യമപ്രവര്‍ത്തകരുടെ കൊലപാതകം ഞെട്ടിപ്പിച്ചെന്നും പ്രസ്താവന കൂട്ടിച്ചേര്‍ത്തു. വളരെ സങ്കടമുളവാക്കുന്നതാണെന്നും സംഘര്‍ഷത്തില്‍ സാധാരണക്കാരുടെ ജീവന്‍ നഷ്ടപ്പെടുന്നതിലും ഇന്ത്യ എപ്പോഴും അപലപിച്ചിട്ടുണ്ട്. ഇസ്‌റാഈല്‍ അധികൃതര്‍ അന്വേഷണം ആരംഭിച്ചിട്ടുണ്ടെന്നാണ് കരുതുന്നതെന്ന് വിദേശകാര്യ മന്ത്രാലയ വക്താവ് രണ്‍ധിര്‍ ജയ് സ്വാള്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി നല്‍കി. മേഖലയിലെ സംഭവവികാസങ്ങള്‍ ഇന്ത്യ സൂക്ഷ്മമായി നിരീക്ഷിക്കുന്നുണ്ടെന്നും അദ്ദേഹം പറഞ്ഞു.

തെക്കന്‍ ഗസ്സയിലെ ഖാന്‍യൂനിസില്‍ പ്രധാന ആശുപത്രിയായ നാസര്‍ മെഡിക്കല്‍ കോംപ്ലക്‌സില്‍ കഴിഞ്ഞദിവസമാണ് ഇസ്‌റാഈല്‍ സൈന്യം ആക്രമണം നടത്തിയത്. സയണിസ്റ്റ് ക്രൂരതയ്‌ക്കെതിരേ വ്യാപക പ്രതിഷേധം ഉയരുന്നതിനിടെയാണ് വിഷയത്തില്‍ ഇന്ത്യയും പ്രതികരിച്ചത്. സംഭവത്തില്‍ 5 മാധ്യമ പ്രവര്‍ത്തകര്‍ ഉള്‍പ്പെടെ 21 പേരാണ് കൊല്ലപ്പെട്ടത്. നിരവധി രോഗികള്‍ക്കും ആരോഗ്യ പ്രവര്‍ത്തകര്‍ക്കും പരുക്കേറ്റു.

 അന്താരാഷ്ട്ര വാര്‍ത്താ ഏജന്‍സിയായ റോയിട്ടേഴ്‌സിലെ ഹുസാം അല്‍ മസ്രി, ഫ്രീലാന്‍സ് ജേണലിസ്റ്റ്് മറിയം അബു ദഖ്വ, അല്‍ജസീറ ഫോട്ടോ ജേണലിസ്റ്റ് മുഹമ്മദ് സലാമ, അസോഷ്യേറ്റ് പ്രസ് വാര്‍ത്താ ഏജന്‍സിയുടെ മുആസ് അബൂ താഹ, ഖുദ്‌സ് ഫീഡ് നെറ്റ്വര്‍ക്കിലെ അഹ്്മദ് അബു അസീസ് എന്നിവരാണ് കൊല്ലപ്പെട്ട മാധ്യമപ്രവര്‍ത്തകര്‍.

ആദ്യം ആശുപത്രിക്കു മുകളില്‍ ഒരു മിസൈല്‍ പതിച്ചു. പരുക്കേറ്റവരെ രക്ഷപ്പെടുത്താന്‍ രക്ഷാപ്രവര്‍ത്തകരും റിപ്പോര്‍ട്ട് ചെയ്യാന്‍ മാധ്യമപ്രവര്‍ത്തകരും എത്തിയപ്പോള്‍ അവര്‍ക്കുനേരെ മറ്റൊരു മിസൈല്‍ കൂടി പതിക്കുകയായിരുന്നു.നാസര്‍ ആശുപത്രിയിലെ നാലാം നിലയിലാണ് മിസൈല്‍ പതിച്ചത്. ആശുപത്രികള്‍, സ്‌കൂളുകള്‍ എന്നിവ കേന്ദ്രീകരിച്ചാണ് ഇസ്‌റാഈല്‍ ആക്രമണം നടത്തുന്നത്. മാധ്യമപ്രവര്‍ത്തകരെയും ലക്ഷ്യമിടുന്നുണ്ട്. ജൂണിലും നാസര്‍ ആശുപത്രിക്കു നേരെ ആക്രമണം നടത്തിയിരുന്നു.

India has expressed deep concern over the killing of five journalists in Khan Younis, Gaza, during an Israeli airstrike on August 25. The incident, which took place at a hospital in the southern region, was confirmed by the Gaza Civil Defense Agency. Terming the attack as shocking and extremely tragic, India reiterated its consistent position of condemning the loss of innocent civilian lives during conflicts. Israeli Prime Minister Benjamin Netanyahu also expressed regret over the deadly strike.