തിരുവനന്തപുരം: നിപ വൈറസ് പ്രതിരോധ പ്രവർത്തനങ്ങൾ വിലയിരുത്താൻ കലക്ടറേറ്റിൽ ചേർന്ന യോഗത്തിൽ ആരോഗ്യമന്ത്രി വീണ ജോർജ്, 461 പേർ സമ്പർക്ക പട്ടികയിലുണ്ടെന്ന് വ്യക്തമാക്കി. ഇതിൽ മലപ്പുറം ജില്ലയിൽ 252 പേരും പാലക്കാട് ജില്ലയിൽ 209 പേരും ഉൾപ്പെടുന്നു. 27 പേർ ഹൈ റിസ്ക് വിഭാഗത്തിലാണ്. മലപ്പുറം, പാലക്കാട്, കോഴിക്കോട്, കണ്ണൂർ, എറണാകുളം ജില്ലകളിൽ രോഗികൾ ചികിത്സയിലുണ്ട്.

മഞ്ചേരി മെഡിക്കൽ കോളജ് ആശുപത്രിയിൽ ചികിത്സയിലുള്ള രണ്ട് ആരോഗ്യ പ്രവർത്തകരിൽ ഒരാൾ സി.ടി. സ്കാൻ ടെക്നീഷ്യനാണ്. സമ്പർക്ക പട്ടികയിലുള്ള 48 പേരുടെ സാമ്പിളുകൾ പരിശോധിച്ചതിൽ 46 എണ്ണം നെഗറ്റീവാണ്. ഇതിൽ 23 പേർ മഞ്ചേരി മെഡിക്കൽ കോളജിലും 23 പേർ കോഴിക്കോടുമാണ്. ഹൈ റിസ്ക് വിഭാഗത്തിലുള്ളവർ എല്ലാവരും ക്വാറന്റീനിൽ ആണെന്ന് ഉറപ്പാക്കിയിട്ടുണ്ട്.

നിപ രോഗികളുമായി നേരിട്ട് സമ്പർക്കം പുലർത്തിയവർക്ക് രോഗസാധ്യത ഉണ്ടാകാനുള്ള കാലയളവ് നിർണായകമാണെന്ന് മന്ത്രി പറഞ്ഞു. 21 ദിവസത്തെ ക്വാറന്റീൻ കർശനമായി പാലിക്കണം. മലപ്പുറം, പാലക്കാട്, കോഴിക്കോട് ജില്ലകളിലുള്ളവർ നിർബന്ധമായും മാസ്ക് ധരിക്കണം. ക്വാറന്റീനിലുള്ളവർക്ക് തദ്ദേശഭരണ സ്ഥാപനങ്ങൾ ഭക്ഷണം ഉറപ്പാക്കണം. കണ്ടെയ്ൻമെന്റ് സോണുകളിലെ അധ്യാപകർക്ക് പ്രത്യേക കാഷ്വൽ ലീവും വിദ്യാർത്ഥികൾക്ക് ഓൺലൈൻ ക്ലാസുകളും ഏർപ്പെടുത്താൻ വിദ്യാഭ്യാസ വകുപ്പിനോട് നിർദേശിച്ചു. സമ്പർക്ക പട്ടികയിലുള്ളവരെ കണ്ടെത്താൻ പൊലീസിന്റെ സഹായം തേടിയിട്ടുണ്ട്.

മലപ്പുറം ജില്ലയിലെ കണ്ടെയ്ൻമെന്റ് സോണുകളിൽ ഉൾപ്പെട്ട 8706 വീടുകളിൽ പനി ബാധിതരെ കണ്ടെത്താൻ നടത്തിയ സർവേ പൂർത്തിയായി. നിപയുമായി ബന്ധപ്പെട്ട വ്യാജ പ്രചാരണങ്ങൾ നടത്തുന്നവർക്കെതിരെ സൈബർ സെല്ലിന് കേസ് കൈമാറുമെന്നും മന്ത്രി മുന്നറിയിപ്പ് നൽകി.

മഞ്ഞളാംകുഴി അലി എം.എൽ.എ, ജില്ലാ കലക്ടർ വി.ആർ. വിനോദ്, പൊതുജനാരോഗ്യ വിഭാഗം അഡീ. ഡയറക്ടർ കെ.പി. റീത്ത തുടങ്ങിയവർ യോഗത്തിൽ നേരിട്ടും, അഡീഷണൽ ചീഫ് സെക്രട്ടറി രാജൻ ഖൊബ്രഗഡെ, കോഴിക്കോട്, പാലക്കാട് ജില്ലകളിലെ കലക്ടർമാർ, ജില്ലാ മെഡിക്കൽ ഓഫീസർമാർ, ഉന്നത പൊലീസ് ഉദ്യോഗസ്ഥർ, വിവിധ വകുപ്പുകളിലെ ജില്ലാ ഉദ്യോഗസ്ഥർ എന്നിവർ ഓൺലൈനായും പങ്കെടുത്തു. മന്ത്രി ജില്ലാ മെഡിക്കൽ ഓഫീസിൽ സജ്ജമാക്കിയ കൺട്രോൾ റൂം സന്ദർശിച്ച് സൗകര്യങ്ങൾ വിലയിരുത്തി.