മെറ്റ്‌ലൈഫ് സ്റ്റേഡിയത്തില്‍ നടന്ന ഫിഫ ക്ലബ്  ലോകകപ്പ് സെമിഫൈനലില്‍ റയല്‍ മാഡ്രിഡിനെ ഗോളില്‍ മുക്കി ഫ്രഞ്ച് കരുത്തരായ പിഎസ്ജി. റയലിനെതിരെ 4-0ന്റെ തകര്‍പ്പന്‍ വിജയം നേടിയാണ് പിഎസ്ജി ഫിഫ ക്ലബ് ലോകകപ്പ് ഫൈനലിലേക്ക് മുന്നേറിയത്. സൂപ്പര്‍ താരം കിലിയന്‍ എംബപ്പെ നിറം മങ്ങിയത് റയലിന് കനത്ത തിരിച്ചടിയായി. പിഎസ്ജിക്കായി ഫാബിയന്‍ റൂയിസ് ഇരട്ട ഗോള്‍ നേടി.

ALSO READ: അവൻ മെസിയെക്കാൾ കൂടുതകൾ ബാലൺ ഡി ഓർ നേടും: മുൻ ബാഴ്സ താരം

ഫാബിയന്‍ റൂയിസ് (6', 24'), ഉസ്മാന്‍ ഡെംബെലെ (9'), ഗൊണ്‍സാലോ റാമോസ് (88') എന്നിരാണ് പിഎസ്ജിക്കായി ഗോള്‍ നേടിയത്. ആദ്യ പത്ത് മിനുട്ടില്‍ തന്നെ രണ്ട് ഗോള്‍ നേടിയ പിഎസ്ജി തുടക്കം മുതല്‍ തന്നെ സ്പാനിഷ് വമ്പന്‍മാര്‍ക്ക് മേല്‍ ആധ്യപത്യം ഉറപ്പിച്ചു. മുന്‍ പിഎസ്ജി സ്‌ട്രൈക്കര്‍ എംബാപ്പെ, ജൂഡ് ബെല്ലിംഗ്ഹാം, വിനീഷ്യസ് ജൂനിയര്‍ തുടങ്ങിയ താരങ്ങളെ കളത്തില്‍ ഇറക്കിയിട്ടും മത്സരത്തിലേക്ക് തിരിച്ചുവരാന്‍ റയലിനായില്ല. ക്ലബ് ലോകകപ്പ് ഫൈനലില്‍ ഫ്രഞ്ച് ചാമ്പ്യന്മാരായ പിഎസ്ജി ചെല്‍സിയെ നേരിടും.

രണ്ടാം പകുതിയില്‍ വളരെ അനായാസത്തോടെയാണ് പിഎസ്ജി കളിച്ചത്. മത്സരശേഷം സംസാരിച്ച റൂയിസ്, കഠിനമായ സാഹചര്യങ്ങളില്‍ നേടിയ 'ഉജ്ജ്വലമായ വിജയത്തെക്കുറിച്ച് സംസാരിച്ചു. 'കടുത്ത ചൂടില്‍ പോലും, ടീം വളരെ മികച്ച രീതിയില്‍ കളിച്ചു,' അദ്ദേഹം പറഞ്ഞു. 

'റയലിനെപ്പോലൊരു മികച്ച ടീമിനെതിരെ നല്ലൊരു മത്സരം കാഴ്ചവെയ്ക്കാന്‍ ഞങ്ങള്‍ക്കായി,' ഫാബിയന്‍ റൂയിസ് പറഞ്ഞു.

ALSO READ: ഫുട്ബോളിലെ ഏറ്റവും പൂർണനായ താരം അവനാണ്: സൂപ്പർതാരത്തെക്കുറിച്ച് ഡെക്കോ

ഇന്റര്‍ മിലാനെ 5-0 ന് പരാജയപ്പെടുത്തി കഴിഞ്ഞ മാസം ചാമ്പ്യന്‍സ് ലീഗ് ജേതാക്കളായ പിഎസ്ജിക്ക് ഫിഫ ക്ലബ് ലോകകപ്പും സ്വന്തമാക്കാനുള്ള സുവര്‍ണാവസരമാണ് കൈവന്നിരിക്കുന്നത്. ഇരു ടീമുകളും തങ്ങളുടെ ആദ്യ ക്ലബ് ലോകകപ്പ് കിരീടത്തിനായി മത്സരിക്കുമ്പോള്‍ പോരാട്ടം കടുക്കുമെന്നുറപ്പാണ്.