ഹൈദരാബാദ്: തെലങ്കാനയില്‍ സംഗറെഡ്ഡി ജില്ലയിലെ ഫാര്‍മസ്യൂട്ടിക്കല്‍സ് ഫാക്ടറിയിലുണ്ടായ സ്‌ഫോടനത്തിലും തീപിടിത്തത്തിലും കാണാതായ എട്ട് തൊഴിലാളികളും മരിച്ചതായി ഔദ്യോഗികമായി അധികൃതര്‍ പ്രഖ്യാപിച്ചു. സ്‌ഫോടനത്തിന്റെ തീവ്രത കാരണം ഇവരുടെ മൃതദേഹാവശിഷ്ടങ്ങള്‍ കണ്ടെത്താന്‍ കഴിയാത്തതിനാലാണ് ഇങ്ങനെയൊരു തീരുമാനം. വിപുലമായ തെരച്ചിലിനും ഫോറന്‍സിക് പരിശോധനയ്ക്കും ശേഷമാണ് കാണാതായ ആളുകളുടെ മൃതദേഹങ്ങള്‍ സ്‌ഫോടനത്തെത്തുടര്‍ന്നുണ്ടായ വന്‍ തീപിടിത്തത്തില്‍ തിരിച്ചറിയാനാവാത്തവിധം കത്തി നശിച്ചിരിക്കാമെന്ന സ്ഥിരീകരണമുണ്ടായത്.

44 മൃതദേഹങ്ങള്‍ ഇതിനോടകം തിരിച്ചറിഞ്ഞിട്ടുണ്ട്. ഇതിന് പുറമെ കാണാതായിരുന്ന രാഹുല്‍, വെങ്കിടേഷ്, ശിവാജി, വിജയ്, ജസ്റ്റിന്‍, അഖിലേഷ്, രവി, ഇര്‍ഫാന്‍ എന്നിവരെയാണ് മരിച്ചതായി സ്ഥിരീകരിച്ചത്. ഇവരുടെ കുടുംബങ്ങളെ അധികൃതര്‍ വിവരം അറിയിക്കുകയും അന്ത്യകര്‍മങ്ങള്‍ നടത്താന്‍ നിര്‍ദേശിക്കുകയും ചെയ്തു. കൂടുതല്‍ വിവരങ്ങളോ കണ്ടെത്തലുകളോ ഉണ്ടായാല്‍ ഉടന്‍ അറിയിക്കുമെന്നും ബന്ധുക്കള്‍ക്ക് ഉറപ്പ് നല്‍കുകയും ചെയ്തു. 

ഡിഎന്‍എ പരിശോധനാ നടപടിക്രമങ്ങള്‍ ഇപ്പോഴും തുടരുന്നുണ്ട്.  മരുന്ന് നിര്‍മാണ കമ്പനിയായ സിഗാച്ചിയുടെ പ്ലാന്റിലാണ് ഭീകരമായ സ്‌ഫോടനം ഉണ്ടായത്. തുടര്‍ന്ന് വന്‍ തീപിടിത്തമുണ്ടാവുകയും ഡസന്‍ കണക്കിന് തൊഴിലാളികള്‍ ഉള്ളില്‍ കുടുങ്ങുകയുമായിരുന്നു. സ്ഥലത്ത് സൂക്ഷിച്ചിരുന്ന അപകടകരമായ ചില വസ്തുക്കളാണ് സ്‌ഫോടനത്തിന് കാരണമായതെന്നാണ് പ്രാഥമിക കണ്ടെത്തലുകള്‍ സൂചിപ്പിക്കുന്നത്. വ്യാവസായിക സുരക്ഷാ നടപടികളെക്കുറിച്ചും ഗുരുതരമായ ആശങ്കകള്‍ ഉയരുന്നുണ്ട്.