തിരുവനന്തപുരം: കീം 2025 റാങ്ക് ലിസ്റ്റിൽ ഹൈക്കോടതി ഉത്തരവ് അനുസരിച്ച് പഴയ ഫോർമുല പ്രകാരം പുതുക്കിയ പട്ടിക ഇന്ന് പ്രസിദ്ധീകരിക്കുമെന്ന് ഉന്നത വിദ്യാഭ്യാസ മന്ത്രി ആർ. ബിന്ദു അറിയിച്ചു. കോടതി നിർദേശം അംഗീകരിച്ച് സർക്കാർ തീരുമാനമെടുത്തതായും, ഇത് സർക്കാരിന് തിരിച്ചടിയല്ലെന്നും മന്ത്രി വ്യക്തമാക്കി. സുപ്രീം കോടതിയിൽ അപ്പീൽ നൽകിയാൽ പ്രവേശന നടപടികൾ വൈകുമെന്നതിനാലാണ് മേൽക്കോടതിയെ സമീപിക്കാത്തതെന്നും മന്ത്രി മാധ്യമങ്ങളോട് പറഞ്ഞു.

കീം 2025 റാങ്ക് ലിസ്റ്റ് റദ്ദാക്കിയതിനെതിരെ സംസ്ഥാന സർക്കാർ നൽകിയ അപ്പീൽ ഹൈക്കോടതി ഡിവിഷൻ ബെഞ്ച് തള്ളിയതിനെ തുടർന്നാണ് എഞ്ചിനീയറിംഗ് പ്രവേശനം പഴയ ഫോർമുല പ്രകാരം നടത്താൻ തീരുമാനിച്ചത്. സിംഗിൾ ബെഞ്ചിന്റെ ഉത്തരവ് സ്റ്റേ ചെയ്യണമെന്ന സർക്കാർ ആവശ്യം ഡിവിഷൻ ബെഞ്ച് നിരാകരിച്ചു. പ്രോസ്പെക്ടസ് പുറത്തിറക്കി, എൻട്രൻസ് പരീക്ഷാ സ്കോർ പ്രസിദ്ധീകരിച്ച ശേഷം വെയിറ്റേജിൽ മാറ്റം വരുത്തിയത് നിയമവിരുദ്ധമാണെന്ന സിംഗിൾ ബെഞ്ചിന്റെ വിധി ഡിവിഷൻ ബെഞ്ച് ശരിവച്ചു. ഇതോടെ, പഴയ ഫോർമുല അനുസരിച്ച് റാങ്ക് ലിസ്റ്റ് പുതുക്കുമ്പോൾ നിലവിലെ പട്ടികയിൽ ഉൾപ്പെട്ട പല വിദ്യാർത്ഥികളും പുറത്താകാനിടയുണ്ട്.

കേരളത്തിലെ എഞ്ചിനീയറിംഗ്, ആർക്കിടെക്ചർ, ഫാർമസി കോഴ്സുകളിലേക്കുള്ള പ്രവേശനത്തിനായി നടത്തുന്ന എൻട്രൻസ് പരീക്ഷയാണ് കീം. കേരള സിലബസ് വിദ്യാർത്ഥികൾ മാർക്ക് ഏകീകരണത്തിൽ പിന്നിൽപോകുന്നത് മറികടക്കാൻ കൊണ്ടുവന്ന പരിഷ്കാരം വൈകി നടപ്പാക്കിയതാണ് ഇപ്പോഴത്തെ പ്രതിസന്ധിക്ക് കാരണമായത്.

The Kerala government will revert to the old formula for the KEAM 2025 rank list following a High Court ruling, as announced by Higher Education Minister R. Bindu. The updated rank list will be published today. The decision comes after the Division Bench upheld the Single Bench’s order, rejecting the government's appeal against the cancellation of the new rank list. The change in weightage after publishing the prospectus and entrance scores was deemed illegal. This shift may affect many students on the current rank list.