എറണാകുളം: ഡയറക്ടറേറ്റ് ഓഫ് റവന്യൂ ഇന്റലിജൻസിന്റെ (ഡിആർഐ) കസ്റ്റഡിയിൽ എടുത്ത ബ്രസീൽ ദമ്പതിമാർ വിഴുങ്ങിയത് കൊക്കെയ്ൻ ഗുളികകളെന്ന് സ്ഥിരീകരിച്ചു. സാവോപോളയിൽ നിന്ന് കൊച്ചി വിമാനത്താവളത്തിൽ എത്തിയ ലൂക്കാസ്, ബ്രൂണ ദമ്പതിമാരാണ് പിടിയിലായത്. ആശുപത്രിയിൽ പ്രവേശിപ്പിച്ച ഇവരിൽ നിന്ന് ഇതുവരെ 70 ഗുളികകൾ പുറത്തെടുത്തു. ഏകദേശം 10 കോടി രൂപയിലേറെ വിലമതിക്കുന്ന ലഹരിമരുന്നാണ് ഇവർ കടത്താൻ ശ്രമിച്ചതെന്ന് ഡിആർഐ വൃത്തങ്ങൾ അറിയിച്ചു.

കൃത്യമായ രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് ലൂക്കാസിനെയും ഭാര്യ ബ്രൂണയെയും ഡിആർഐ പിടികൂടിയത്. വിമാനത്താവളത്തിൽ നിന്ന് ഇവരെ ആശുപത്രിയിൽ എത്തിച്ച് നടത്തിയ പരിശോധനയിൽ ശരീരത്തിൽ മയക്കുമരുന്ന് ഗുളികകൾ ഉള്ളതായി കണ്ടെത്തി. മജിസ്‌ട്രേറ്റിന് മുന്നിൽ ഹാജരാക്കിയ ശേഷം ഇവരെ ആശുപത്രിയിൽ പ്രവേശിപ്പിച്ചു. ഇതുവരെ 70 ഗുളികകൾ പുറത്തെടുത്തെങ്കിലും, ഏകദേശം 30-ലധികം ഗുളികകൾ ഇനിയും പുറത്തെടുക്കാനുണ്ടെന്നാണ് വിവരം.

തിരുവനന്തപുരത്ത് ലഹരിമരുന്ന് എത്തിക്കുകയായിരുന്നു ദമ്പതിമാരുടെ ലക്ഷ്യം. തിരുവനന്തപുരത്ത് ഹോട്ടൽ റൂം ബുക്ക് ചെയ്തതിന്റെ വിവരങ്ങളും അന്വേഷണ സംഘം കണ്ടെത്തിയിട്ടുണ്ട്. വിമാനമിറങ്ങി തിരുവനന്തപുരത്ത് എത്തി ലഹരി കൈമാറ്റം ചെയ്യാനായിരുന്നു ഇവരുടെ പദ്ധതി. ദമ്പതിമാരുടെ മൊബൈൽ ഫോൺ വിശദാംശങ്ങൾ ഉൾപ്പെടെ ഡിആർഐ ഉദ്യോഗസ്ഥർ വിശദമായി പരിശോധിച്ചു വരികയാണ്. കേസിൽ കൂടുതൽ അന്വേഷണം പുരോഗമിക്കുകയാണ്.

A Brazilian couple, Lucas and Bruna, was detained at Kochi International Airport by the DRI for smuggling cocaine. They allegedly swallowed 70 cocaine capsules, valued at over ₹10 crore, intended for delivery in Thiruvananthapuram. The couple was hospitalized, where 70 capsules were recovered, with around 30 more yet to be extracted