ന്യൂഡല്‍ഹി: അടുത്ത വര്‍ഷം നടക്കാനിരിക്കുന്ന അസം നിയമസഭാ തെരഞ്ഞെടുപ്പില്‍ ബദ്‌റുദ്ദീന്‍ അജ്മലിന്റെ നേതൃത്വത്തിലുള്ള ഓള്‍ ഇന്ത്യ യുണൈറ്റഡ് ഡെമോക്രാറ്റിക് ഫ്രണ്ട് (The All India United Democratic Front - AIUDF) തനിച്ച് മത്സരിക്കും. കോണ്‍ഗ്രസ് ഉള്‍പ്പെടെയുള്ള പാര്‍ട്ടികളുമായി സഖ്യമുണ്ടാക്കാതെ 35 സീറ്റുകളില്‍ സ്വതന്ത്രമായി മത്സരിക്കുമെന്ന് എ.ഐ.യു.ഡി.എഫ് എം.എല്‍.എ അമീനുല്‍ ഇസ്ലാം പ്രഖ്യാപിച്ചു. പ്രസിഡന്റ് മൗലാനാ ബദ്‌റുദ്ദീന്‍ അജ്മലുമായും (Badruddin Ajmal) മറ്റ് എം.എല്‍.എമാരുമായും നടത്തിയ നീണ്ട ചര്‍ച്ചകള്‍ക്ക് ശേഷമാണ് ഈ തീരുമാനം. ഇപ്പോഴത്തെ സാഹചര്യത്തില്‍ ഞങ്ങള്‍ ഒരു സഖ്യത്തിനും ശ്രമിക്കുന്നില്ല- അദ്ദേഹം പറഞ്ഞു. അതേസമയം, ഒന്നിച്ചുപോരാടാനുള്ള ഓഫറുമായി കോണ്‍ഗ്രസ് മുന്നോട്ടുവന്നാല്‍ ഭാവിയില്‍ ചര്‍ച്ചകള്‍ക്ക് സാധ്യതയുണ്ടെന്ന് അദ്ദേഹം സൂചന നല്‍കി. 

ALSO READ: ഒരു രാജ്യം ഒരു തെരഞ്ഞെടുപ്പ്: നിര്‍ദേശത്തോട് വിയോജിച്ച് നാല് മുന്‍ ചീഫ് ജസ്റ്റിസുമാര്‍; ചൂണ്ടിക്കാട്ടിയത് സുപ്രധാന പോയിന്റുകള്‍ | On One Nation, One Election

'ബിജെപിയെ പരാജയപ്പെടുത്താന്‍ എല്ലാ പ്രതിപക്ഷ പാര്‍ട്ടികളും ഒന്നിക്കണമെന്ന് ഞങ്ങള്‍ വിശ്വസിക്കുന്നുണ്ടെങ്കിലും കോണ്‍ഗ്രസ് ഉള്‍പ്പെടെയുള്ള ഒരു പാര്‍ട്ടിക്കും ബി.ജെ.പിയെ ഒറ്റയ്ക്ക് പരാജയപ്പെടുത്താന്‍ കഴിയില്ല. അതുകൊണ്ട് സഖ്യം സംബന്ധിച്ച് കോണ്‍ഗ്രസ് ഗൗരവമായി ചിന്തിക്കുകയാണെങ്കില്‍ ഞങ്ങള്‍ അത് പരിഗണിക്കും- അദ്ദേഹം കൂട്ടിച്ചേര്‍ത്തു. അസമിലെ ബംഗാളിലെ മുസ്ലിംകള്‍ക്കിടയില്‍ വന്‍ സ്വാധീനമുള്ള എ.ഐ.യു.ഡി.എഫ് മുസ്ലിം ഭൂരിപക്ഷ പ്രദേശങ്ങളായ ധുബ്രി, ബാര്‍പേട്ട, നൗഗാവ് തുടങ്ങിയ ജില്ലകളില്‍ ആണ് പ്രധാനമായും മത്സരിക്കുക. നേരത്തെ ഒന്നിലധികം തവണ കോണ്‍ഗ്രസുമായി സഖ്യംചേര്‍ന്ന് തെരഞ്ഞെടുപ്പിനെ നേരിട്ട ചരിത്രം അത്തര്‍ വ്യാപാരികൂടിയായ ബദ്‌റുദ്ദീന്‍ അജ്മലിന്റെ പാര്‍ട്ടിക്കുണ്ട്. അതേസമയം, തനിച്ച് മത്സരിക്കാനുള്ള തീരുമാനവുമായി എ.ഐ.യു.ഡി.എഫ് മുന്നോട്ടുപോകുകയാണെങ്കില്‍ അസമിലെ മുസ്ലിം വോട്ട് ഭിന്നിക്കുമെന്ന് ഉറപ്പാണ്. 35 ശതമാനമാണ് സംസ്ഥാനത്തെ മുസ്ലിം ജനസംഖ്യ.

ALSO READ: 75ല്‍ വിരമിച്ച് മോഹന്‍ ഭാഗവത് മോദിക്ക് മേല്‍ സമ്മര്‍ദ്ദം ചെലുത്തുമോ?; പ്രായപരിധി സംബന്ധിച്ച് സംഘ്പരിവാരില്‍ ചൂടുപിടിച്ച ചര്‍ച്ച | Narendra Modi Retirement

കഴിഞ്ഞവര്‍ഷത്തെ തെരഞ്ഞെടുപ്പില്‍ ബി.ജെ.പിയും സഖ്യകക്ഷികളായ എ.ജി.പി, യു.പി.പി.എല്‍ എന്നിവയും ചേര്‍ന്ന് 75 സീറ്റുകള്‍ നേടിയാണ് അധികാരത്തിലേറിയത്. കോണ്‍ഗ്രസ് 29 സീറ്റുകള്‍ നേടിയപ്പോള്‍ എ.ഐയു.ഡി.എഫ് 16 ഇടത്തും വിജയിച്ചു. ആകെ 126 സീറ്റുകളുള്ള അസമില്‍ 64 സീറ്റുകളാണ് കേവലഭൂരിപക്ഷത്തിന് വേണ്ടത്.

The All India United Democratic Front (AIUDF) on Friday has announced its decision to contest 35 out of the total 126 seats independently in the upcoming Assam Assembly elections. AIUDF MLA Aminul Islam confirmed the decision, saying that the party will not form any alliance as of now.