പുനെ: കരള്‍ മാറ്റിവയ്ക്കല്‍ ശസ്ത്രക്രിയക്കു ശേഷം ഭാര്യയും ഭര്‍ത്താവും മരിച്ചു. പുണെയിലെ ഹദപ്‌സര്‍ സ്വദേശികളായ ബാപ്പു കോംകര്‍ (49), ഭാര്യ കാമിനി എന്നിവരാണ് മരിച്ചത്. ഓഗസ്റ്റ് 17 ന് ബാപ്പു കോംകര്‍ മരിക്കുകയും നാല് ദിവസം കഴിഞ്ഞ് ഓഗസ്റ്റ് 21ന് ഭാര്യയും മരിക്കുകയായിരുന്നു. കരള്‍ രോഗിയായിരുന്ന ബാപ്പുവിന് കരള്‍ ദാനം ചെയ്തത് ഭാര്യയായിരുന്നു.

സംഭവത്തില്‍ ശസ്ത്രക്രിയ നടന്ന ആശുപത്രിക്കെതിരെ കുടുംബാംഗങ്ങള്‍ രംഗത്ത് വന്നിട്ടുണ്ട്. ഓഗസ്റ്റ് 15 ന് ഡെക്കാനിലെ സഹ്യാദ്രി ആശുപത്രിയിലായിരുന്നു കരള്‍ മാറ്റിവയ്ക്കല്‍ ശസ്ത്രക്രിയ നടന്നത്. രണ്ട് പേരും മരിക്കാനിടയായ സാഹചര്യം ആശുപത്രി വ്യക്തമാക്കണമെന്നാണ് ബാപ്പുവിന്റെയും കാമിനിയുടെയും ബന്ധുക്കള്‍ ആവശ്യപ്പെടുന്നത്.

ശസ്ത്രക്രിയക്കായി 12 ലക്ഷം രൂപയോളം കുടുംബം വായ്പയെടുത്തിരുന്നു. ബാപ്പു ഒരു സ്വകാര്യ കമ്പനിയിലാണ് ജോലി ചെയ്തിരുന്നത്, കാമിനി വീട്ടമ്മയുമായിരുന്നു. ദമ്പതികള്‍ക്ക് 20 വയസ്സുള്ള ഒരു മകനും ഏഴാം ക്ലാസില്‍ പഠിക്കുന്ന ഒരു മകളുമുണ്ട്.

ALSO READ: ഡൽഹിയിലെ മുസ്‍ലിം ലീഗ് ആസ്ഥാന മന്ദിരം ഉദ്ഘാടനം ഇന്ന്; സോണിയാ ഗാന്ധിയും അഖിലേഷ് യാദവും അടക്കമുള്ള നേതാക്കൾ ചടങ്ങിനെത്തും

സ്‌പെഷ്യാലിറ്റി ആശുപത്രിയായതിനാലാണ് സഹ്യാദ്രി ആശുപത്രിയില്‍ ശസ്ത്രക്രിയ നടത്താന്‍ തീരുമാനിച്ചതെന്നാണ് കാമിനിയുടെ സഹോദരന്‍ ബല്‍രാജ് വഡേക്കര്‍ പറയുന്നത്. രോഗി മരിച്ചാലും ദാതാവ് എങ്ങനെ മരിക്കുമെന്നാണ് കുടുംബം ഉയര്‍ത്തുന്ന ചോദ്യം. പോസ്റ്റ്‌മോര്‍ട്ടം റിപോര്‍ട്ടിനായി കാത്തിരിക്കുകയാണ് കുടുംബം.

അതേസമയം ചികിത്സാ പിഴവ് ആരോപണം സഹ്യാദ്രി ആശുപത്രി നിഷേധിച്ചിരിക്കുകയാണ്. കരള്‍ മാറ്റിവയ്ക്കല്‍ ഏറ്റവും സങ്കീര്‍ണമായ ശസ്ത്രക്രിയകളില്‍ ഒന്നാണെന്നും ബാപ്പു കരള്‍ രോഗത്തിന്റെ ഏറ്റവും അവസാന ഘട്ടത്തിലായിരുന്നുവെന്നുമാണ് അവര്‍ വിശദീകരിച്ചത്.

ശസ്ത്രക്രിയയിലെ അപകട സാധ്യതയെ കുറിച്ച് കുടുംബത്തിന് കൗണ്‍സിലിങ് നല്‍കിയിരുന്നു. കരള്‍ മാറ്റിവച്ച ശേഷം ബാപ്പുവിന് ഹൃദയാഘാതമുണ്ടായെന്നും സാധ്യമായ എല്ലാ ശ്രമങ്ങളും നടത്തിയെങ്കിലും അദ്ദേഹം മരിച്ചുവെന്നുമാണ് ആശുപത്രി അധികൃതര്‍ പറയുന്നത്. കാമിനി സുഖം പ്രാപിക്കുന്നതിനിടെ ഹൈപ്പോടെന്‍സിവ് ഷോക്ക് ഉണ്ടാവുകയും ആന്തരികാവയവങ്ങള്‍ പ്രവര്‍ത്തന രഹിതമാവുകയുമാണെന്നാണ് ആശുപത്രി പറയുന്നത്.

A heartbreaking incident unfolded in Hadapsar, Pune, where a couple died following a livert ransplant surgery. Bappu Komkar (49), who was suffering from liver disease, underwent at ransplant on August 15 at Sahyadri Hospital, Deccan, with his wife Kamini as the liver donor. Bappu died on August 17, and Kamini passed away four days later, on August 21.