മേജർ ലീഗ് സോക്കറിൽ വിജയകുതിപ്പ് തുടർന്ന് ഇന്റർ മയാമി. ഇന്ന് നടന്ന മത്സരത്തിൽ നാഷ്വല്ലക്കെതിരെ ഒന്നിനെതിരെ രണ്ട് ഗോളുകളുടെ തകർപ്പൻ വിജയമാണ് ഇന്റർ മയാമി സ്വന്തമാക്കിയത്. മത്സരത്തിൽ ഇന്റർ മയാമിക്ക് വേണ്ടി ഇരട്ട ഗോൾ നേടി ലയണൽ മെസി മിന്നും പ്രകടനമാണ് പുറത്തെടുത്തത്.

ഈ ഇരട്ട ഗോളോടെ മേജർ ലീഗ് സോക്കറിൽ മറ്റൊരു താരത്തിനും സ്വന്തമാക്കാൻ സാധിക്കാത്ത ഒരു റെക്കോർഡ് ആണ് മെസി  സ്വന്തമാക്കിയത്. എംഎൽഎസിൽ തുടർച്ചയായ അഞ്ചു മത്സരങ്ങളിൽ രണ്ട് ഗോളുകൾ നേടുന്ന ആദ്യ താരമായാണ് മെസി മാറിയത്. ഇതിന് മുമ്പ് മോൺഡ്രിയലിനെതിരെയുള്ള രണ്ട് മത്സരങ്ങളിലും കൊളംബസിനെതിരെയും ന്യൂ ഇംഗ്ലണ്ടിനെതിരെയുമാണ് മെസി ഇരട്ട ഗോളുകൾ നേടിയത്. 

മത്സരത്തിന്റെ ആദ്യപകുതിയിലും രണ്ടാം പകുതിയിലും ആയിരുന്നു മെസി ഗോളുകൾ നേടിയത്. മത്സരത്തിൽ 17, 62 എന്നീ മിനിറ്റുകളിൽ ആയിരുന്നു മെസിയുടെ ഗോളുകൾ പിറന്നത്. മത്സരത്തിന്റെ രണ്ടാം പകുതിയിൽ ഹാരി മുക്താറിന്റെ വകയാണ് നാഷ്വെല്ലയുടെ ആശ്വാസ ഗോൾ പിറന്നത്. 

ALSO READ: മെസ്സി vs റൊണാൾഡോ: 1000 ഗോളിന്റെ ഇതിഹാസ പോരാട്ടം; ആര് ആദ്യം നാഴികക്കല്ല് കൈവരിക്കും? സാധ്യത ഇങ്ങനെ

മത്സരത്തിൽ ബോൾ പൊസഷന്റെ കാര്യത്തിലും ഷോട്ടുകളും എണ്ണത്തിലും മെസിയും സംഘവും ആണ് മുന്നിട്ട് നിന്നത്. 54 ശതമാനം ബോൾ പൊസഷൻ നെടിയ ഇന്റർ മയാമി ഒമ്പത് ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ അഞ്ചു ഷോട്ടുകളും ഓൺ ടാർഗറ്റിലേക്ക് ആയിരുന്നു. 

നിലവിൽ മേജർ ലീഗ് സോക്കറിന്റെ പോയിന്റ് പട്ടികയിൽ അഞ്ചാം സ്ഥാനത്താണ് ഇന്റർ മയാമി. 19 മത്സരങ്ങൾ പിന്നിട്ടപ്പോൾ 11വിജയവും അഞ്ച് സമനിലയും മൂന്ന് തോൽവിയും അടക്കം 38പോയിന്റാണ് ഇന്റർ മയാമിയുടെ കൈവശമുള്ളത്. മേജർ ലീഗ് സോക്കറിൽ ജൂലൈ 17ന് സിൻസിനാറ്റി എഫ്‌സിക്കെതിരെയാണ് ഇന്റർ മയാമിയുടെ അടുത്ത മത്സരം. 

Lionel Messi Create a Historical Record in Major League Soccer