മാഞ്ചസ്റ്റർ യുണൈറ്റഡിന്റെ അർജന്റൈൻ സൂപ്പർതാരം അലജാൻഡ്രോ ഗാർനാച്ചോയെ സ്വന്തമാക്കാനുള്ള സഊദി പ്രോ ലീഗ് ക്ലബായ അൽ നസറിന്റെ നീക്കങ്ങൾക്ക് വമ്പൻ തിരിച്ചടി. ഗാർനാച്ചോ അൽ നസറിൽ ചേരാനുള്ള അവസരം നിരസിച്ചുവെന്നാണ് പുറത്തു വരുന്ന റിപ്പോർട്ടുകൾ.

അൽ നസറുമായി താരം പ്രാരംഭ ചർച്ചകൾ നടത്തിയെങ്കിലും ഗാർനാച്ചോ യൂറോപ്പിൽ തന്നെ തുടരാൻ തീരുമാനം എടുത്തുവെന്നാണ് ദി ടെലിഗ്രാഫ് ജേണലിസ്റ്റ് മൈക്ക് മഗ്രാത്ത് റിപ്പോർട്ട് ചെയ്യുന്നത്. 2028 വരെ ഗാർനാച്ചോക്ക് മാഞ്ചെസ്റ്ററുമായി കരാറുണ്ട്. എങ്കിലും താരം ഈ സമ്മറിൽ ടീം വിടുമെന്നാണ് പ്രതീക്ഷിക്കുന്നത്. 

കഴിഞ്ഞ സീസണിൽ മാഞ്ചസ്റ്റർ യുണൈറ്റഡിൽ അത്ര മികച്ച പ്രകടനങ്ങൾ പുറത്തടുക്കാൻ ഗാർനച്ചോക്ക് സാധിച്ചിരുന്നില്ല. കഴിഞ്ഞ സീസണിൽ 58 മത്സരങ്ങളിൽ നിന്ന് 11 ഗോളുകളും 10 അസിസ്റ്റുകളും ആണ് താരം നേടിയത്. 

കഴിഞ്ഞ സീസണിൽ മാഞ്ചസ്റ്റർ യൂണൈറ്റഡിനൊപ്പം ഒരു തകർപ്പൻ നേട്ടവും ഗാർനാച്ചോ സ്വന്തമാക്കിയിരുന്നു. കഴിഞ്ഞ സീസണിൽ നടന്ന ലെസ്റ്റർ സിറ്റിക്കെതിരായ മത്സരത്തിൽ ഗോൾ നേടിയതിനു പിന്നാലെ റൊണാൾഡോയുടെ ഒരു റെക്കോർഡിനൊപ്പമെത്താനായിരുന്നു ഗാർനാച്ചോക്ക് സാധിച്ചത്. ഇംഗ്ലീഷ് പ്രീമിയർ ലീഗിലെ താരത്തിന്റെ പതിനാലാം ഗോൾ ആയിരുന്നു ഇത്. റൊണാൾഡോ തന്റെ ഇരുപതാം വയസ്സിൽ ഇംഗ്ലീഷ് പ്രീമിയർ ലീഗിൽ സ്വന്തമാക്കിയ നേട്ടത്തിനൊപ്പമാണ്‌ അർജന്റീന താരം എത്തിയത്.

ഇംഗ്ലീഷ് പ്രീമിയർ ലീഗിൽ 21 വയസ്സ് പൂർത്തിയാകുന്നതിനു മുന്നേ റൊണാൾഡോയും 14 ഗോളുകളാണ് നേടിയിരുന്നത്. അലക്സ് ഫെർഗൂസന്റെ കീഴിലായിരുന്നു റൊണാൾഡോ മാഞ്ചസ്റ്റർ യുണൈറ്റഡിൽ അരങ്ങേറ്റം കുറിച്ചിരുന്നത്. മാഞ്ചസ്റ്റർ യുണൈറ്റഡിൽ കളിച്ചുകൊണ്ട് ലോകത്തെ ഏറ്റവും മികച്ച ഫുട്ബോൾ താരമായി റൊണാൾഡോ സ്വയം അടയാളപ്പെടുത്തുകയായിരുന്നു. 

Saudi Pro League club Al Nasrs moves to sign Manchester Uniteds Argentine superstar Alejandro Garnacho have suffered a major setback