കോഴിക്കോട്: സംസ്ഥാന ഭാരവാഹി പട്ടികയിൽ വി. മുരളീധരൻ, കെ. സുരേന്ദ്രൻ വിഭാഗം പൂർണമായി അവഗണിക്കപ്പെട്ടതോടെ ബി.ജെ.പിയിൽ വിഭാഗീയത രൂക്ഷമായി. പുനഃസംഘടനയിൽ ഈഴവരെയും ദലിതരെയും അവഗണിച്ചതായി ആരോപണം ഉയർത്തിയാണ് സുരേന്ദ്രൻ വിഭാഗം കലാപക്കൊടി ഉയർത്തുന്നത്. സേവ് ബി.ജെ.പി ഫോറത്തിന്റെ പേരിലാണ് ഈ വിഭാഗം രംഗത്തുവന്നിരിക്കുന്നത്. രാജീവ് ചന്ദ്രശേഖറിന്റെ കരയോഗം കമ്മിറ്റിയാണ് ഇപ്പോഴുള്ളതെന്ന് ഇവർ ആരോപിക്കുന്നു. പുനഃസംഘടനയെ തുടർന്ന് സമൂഹമാധ്യമങ്ങളിലെ പാർട്ടി ഗ്രൂപ്പുകളിൽ കടുത്ത വിമർശനമാണ് ഈ വിഭാഗം ഉയർത്തുന്നത്. ഈഴവർ ഉൾപ്പെടെ തഴയപ്പെട്ടപ്പോൾ സ്ഥാനം ലക്ഷ്യമിട്ട് പാർട്ടിയിലെത്തിയ ക്രിസ്ത്യൻ വിഭാഗവും നേട്ടമുണ്ടാക്കുന്നതായി ഇവർ ആരോപിക്കുന്നു. 

രാജീവ് ചന്ദ്രശേഖർ ഉൾപ്പെടെ 27 അംഗ സംസ്ഥാന ഭാരവാഹി ലിസ്റ്റിൽ മൂന്നുപേർ മാത്രമാണ് ഈഴവ വിഭാഗത്തിലുള്ളവർ. 17 പേരും നായർ സമുദായത്തിൽ നിന്നാണ്. ഇതുവരെ പ്രഖ്യാപിച്ച 41 ചുമതലക്കാരിൽ 28 പേരും നായർ സമുദായത്തിൽ നിന്നും രണ്ടുപേർ നമ്പൂതിരി വിഭാഗത്തിൽ നിന്നുമാണെന്നും സേവ് ബി.ജെ.പി ഫോറം ചൂണ്ടിക്കാട്ടുന്നു. എതിരാളികൾ സവർണ പാർട്ടിയെന്ന് ആരോപിക്കുമ്പോഴും ഇത് ഹിന്ദുക്കളുടെ മുഴുവൻ ആശ്രയ കേന്ദ്രമാണെന്ന് വിശ്വസിച്ചിരുന്നവരെ പോലും ഞെട്ടിക്കുന്നതാണ് രാജീവിന്റെ പുതിയ വികസിത കേരള ടീമെന്നാണ് സേവ് ബി.ജെ.പി ഫോറത്തിന്റെ ആരോപണം. ഏറെക്കാലം സംസ്ഥാന നേതൃത്വത്തിൽ ആധിപത്യം പുലർത്തിയിരുന്ന മുരളീധരൻ പക്ഷത്തെ വെട്ടിനിരത്തിയാണ് പുതിയ ഭാരവാഹി പട്ടിക പുറത്തിറക്കിയത്. ആർ.എസ്.എസിലൂടെ കടന്നുവന്നരെ അവഗണിച്ച് സംഘ്പരിവാർ പാരമ്പര്യമില്ലാത്തവർക്കാണ് കൂടുതൽ പരിഗണന നൽകിയതെന്നും വിമർശനുണ്ട്. 

നേരത്തെ സുരേന്ദ്രനൊപ്പം നിന്ന് പിന്നീട് രാജീവ് ചന്ദ്രശേഖറിനൊപ്പമെത്തിയ എസ്. സുരേഷിനെ സംസ്ഥാന ജനറൽ സെക്രട്ടറിയാക്കിയതും മുരളീധരൻ പക്ഷത്തിന് തിരിച്ചടിയായി. സംസ്ഥാന പ്രസിഡന്റിന് താൽപര്യമുള്ള അനൂപ് ആന്റണിയും പദവിയിലെത്തിയതോടെ ഈ വിഭാഗത്തിന്റെ തകർച്ച പൂർണമായി. തങ്ങൾക്കൊപ്പമുള്ള പി. സുധീറോ സി. കൃഷ്ണകുമാറോ ജനറൽ സെക്രട്ടറി പദത്തിലെത്തുമെന്ന് സുരേന്ദ്രൻ വിഭാഗം കരുതിയെങ്കിലും ഇവരെ വൈസ് പ്രസിഡന്റുമാരാക്കി ഒതുക്കി.  തൃശൂരിൽ ചേർന്ന സംസ്ഥാന നേതൃയോഗത്തിൽ വി. മുരളീധരനെയും കെ. സുരേന്ദ്രനെയും ക്ഷണിക്കാത്തതിനെ തുടർന്ന് പാർട്ടിക്കുള്ളിൽ ആഭ്യന്തര പ്രശ്‌നങ്ങൾ തുടങ്ങിയിരുന്നു. പിന്നാലെയാണ് മുരളീധരൻ പക്ഷത്തെ പൂർണമായും വെട്ടിനിരത്തിയത്.