തിരുവനന്തപുരം: ക്ലിഫ് ഹൗസിലേക്ക് കോണ്‍ഗ്രസ് പ്രവര്‍ത്തകര്‍ നടത്തിയ നൈറ്റ് മാര്‍ച്ചില്‍ സംഘര്‍ഷം. ഷാഫി പറമ്പില്‍ എംപിയെ വടകരയില്‍ ഡിവൈഎഫ്‌ഐ പ്രവര്‍ത്തകര്‍ തടഞ്ഞതില്‍ പ്രതിഷേധിച്ചാണ് കോണ്‍ഗ്രസ് മുഖ്യമന്ത്രിയുടെ വസതിയിലേക്ക് പന്തം കൊളുത്തി പ്രകടനം നടത്തിയത്. രാജ്ഭവന് മുന്നില്‍ നിന്ന് ആരംഭിച്ച ജാഥ പൊലിസ് തടഞ്ഞു. 

ബാരിക്കേഡുകള്‍ ഉപയോഗിച്ച് പ്രവര്‍ത്തകരെ തടയാന്‍ ശ്രമിച്ച പൊലിസിന് നേരെ തീപ്പന്തം എറിഞ്ഞതായി റിപ്പോര്‍ട്ടുണ്ട്. തുടര്‍ന്ന് പൊലിസ് ജലപീരങ്കി പ്രയോഗിച്ചു. തീപ്പന്തമേറില്‍ പൊലിസുകാര്‍ക്ക് പരിക്കേറ്റതായും വിവരമുണ്ട്. പിന്നാലെ പൊലിസ് ലാത്തി ചാര്‍ജ് നടത്തി. ലാത്തി ചാര്‍ജില്‍ വനിത പ്രവര്‍ത്തകര്‍ക്കും പരിക്കേറ്റിട്ടുണ്ട്. തുടര്‍ന്ന് പ്രവര്‍ത്തകര്‍ ക്ലിഫ് ഹൗസിന് മുന്നില്‍ കുത്തിയിരുന്ന് പ്രതിഷേധം നടത്തി. 

സമാധാനപരമായി നടത്തിയ പ്രതിഷേധം പൊലിസ് അടിച്ചമര്‍ത്തിയതായി യൂത്ത് കോണ്‍ഗ്രസ് ജില്ലാ പ്രസിഡന്റ് നേമം ഷജീര്‍ പറഞ്ഞു. പ്രതിപക്ഷ നേതാവിന്റെ വീട് കയറി ആക്രമിക്കുകയും, ഷാഫി പറമ്പില്‍ എംഎല്‍എയെ തടഞ്ഞുനിര്‍ത്തി പരസ്യമായി അപമാനിക്കുകയും ചെയ്ത ഡിവൈഎഫ് ഐയുടെ തെമ്മാടിത്തരത്തിനെതിരെയാണ് യൂത്ത് കോണ്‍ഗ്രസ് പ്രതിഷേധം നടത്തിയത്. സമരം 500 മീറ്റര്‍ എത്തിയപ്പോഴേക്കും പൊലിസ് ജലപീരങ്കി പ്രയോഗിച്ചു. യാതൊരു പ്രകോപനവുമില്ലാതെയാണ് പൊലിസ് ആക്രമിച്ചത്. വനിത പ്രവര്‍ത്തകരെയടക്കം പുരുഷ പൊലിസ് ഉദ്യോഗസ്ഥര്‍ ആക്രമിച്ചു. ഇതെല്ലാം പിണറായിയുടെ നിര്‍ദേശത്തിലാണ്. കേരള പൊലിസും, ഡിവൈഎഫ്‌ഐയും ഒരു പോലെ ഗുണ്ടായിസം കാണിക്കുകയാണ്,' അദ്ദേഹം കൂട്ടിച്ചേര്‍ത്തു.

ALSO READ: 26 മണിക്കൂര്‍ നീണ്ട പ്രയത്‌നം; മണ്ണും പാറക്കഷണങ്ങളും നീക്കി; താമരശ്ശേരി ചുരത്തില്‍ ഗതാഗതം പുനഃസ്ഥാപിച്ചു 

clash during a night march organized by Congress workers towards Cliff House.