പാലക്കാട്: വടക്കാഞ്ചേരിയില്‍ അടച്ചിട്ട വീട്ടില്‍ നിന്ന് 23 പവന്‍ സ്വര്‍ണ്ണം മോഷ്ടിച്ചു. മുടപ്പല്ലൂര്‍ സ്വദേശി സിബി മാത്യൂസിന്റെ വീട്ടിലാണ് കവര്‍ച്ച നടന്നത്. ഇന്നലെ വൈകീട്ട് അഞ്ച് മണിക്ക് ശേഷമാണ് കവര്‍ച്ച നടന്നതെന്നാണ് നിഗമനം. സംഭവത്തില്‍ വടക്കാഞ്ചേരി പൊലിസ് കേസെടുത്ത് അന്വേഷണം ആരംഭിച്ചു. 

വീടിനോട് ചേര്‍ന്ന കുടിവെള്ള ടാങ്കിന് മുകളില്‍ പെയിന്റ് ബക്കറ്റ് കമിഴ്ത്തി വെച്ചാണ് കള്ളന്‍ വീടിന്റെ സണ്‍ഷെയ്ഡിലേക്ക് കയറിയത്. അതിലൂടെ മുകളില്‍ നിലയിലെത്തി വാതില്‍ കുത്തിപ്പൊളിച്ചാണ് വീടിനുള്ളിലേക്ക് കടന്നത്. താഴത്തെ നിലയിലെ ബെഡ്‌റൂം വാതില്‍ പൊളിച്ച ശേഷം അലമാരയില്‍ സൂക്ഷിച്ച 23 പവന്‍ സ്വര്‍ണം കവര്‍ന്ന ശേഷം പ്രതി രക്ഷപ്പെട്ടു. 

സ്വകാര്യ സ്ഥാപനത്തിലെ മാനേജരാണ് ഗൃഹനാഥനായ സിബി. ഇദ്ദേഹം വൈകീട്ടോടെ വടക്കാഞ്ചേരിയിലേക്കും, ഭാര്യ ബന്ധുവീട്ടിലേക്കും പോയ സമയത്താണ് മോഷണം നടന്നത്. രാത്രി 9 മണിയോടെ ഭാര്യക്കൊപ്പം വീട്ടിലെത്തിയപ്പോഴാണ് മോഷണം ശ്രദ്ധയില്‍പ്പെട്ടത്. ഉടന്‍ തന്നെ പൊലിസില്‍ വിവരമറിയിക്കുകയും ചെയ്തു. 

ALSO READ: ഭീഷണികള്‍ക്ക് മുന്നില്‍ മുട്ട് മടക്കില്ല; വടകര അങ്ങാടിയില്‍ കൂടെ നടക്കാന്‍ ആരുടേയും സ്‌പെഷ്യല്‍ പെര്‍മിഷന്‍ വേണ്ട: ഷാഫി പറമ്പില്‍ nr

ഡിവൈഎസ്പി എന്‍ മുരളീധരന്റെ നേതൃത്വത്തില്‍ വിരലടയാള വിദഗ്ദരും, ഡോഗ് സ്‌ക്വാഡും സ്ഥലത്തെത്തി തെളിവുകള്‍ ശേഖരിച്ചു. സമീപത്തെ സിസിടിവി ദൃശ്യങ്ങളും പൊലിസ് പരിശോധിക്കുന്നുണ്ട്. രണ്ടുമാസം മുന്‍പ് സമാനമായി മറ്റൊരു മോഷണവും പ്രദേശത്ത് നടന്നിരുന്നു.

gold robbery case reported in vadakkanchery palakkad