തിരുവനന്തപുരം: സംസ്ഥാന സർക്കാരിന്റെ തെരഞ്ഞെടുപ്പ് പ്രകടനപത്രികയിലെ പ്രധാന വാഗ്ദാനമായ ഭൂപതിവ് ചട്ട ഭേദഗതി നടപ്പാക്കുന്നതിനുള്ള ചട്ടങ്ങൾ തയ്യാറായതായി റവന്യൂ മന്ത്രി കെ രാജൻ അറിയിച്ചു. ഭേദഗതി ബിൽ ഗവർണർ ഏറെക്കാലം തടഞ്ഞുവെച്ച ശേഷമാണ് ഒപ്പുവെച്ചതെന്നും, മലയോര കർഷകർക്ക് യാതൊരു ബുദ്ധിമുട്ടും ഉണ്ടാക്കാതെയാണ് ചട്ടങ്ങൾ രൂപീകരിച്ചതെന്നും മന്ത്രി വ്യക്തമാക്കി. പൂട്ടിയ ക്വാറികൾ നിയമപരമായി ക്രമവത്കരിക്കുമെന്നും, പട്ടയം ലഭിച്ചവർക്ക് വാണിജ്യ നിർമാണങ്ങൾക്ക് അനുമതി ഉടൻ ലഭ്യമാക്കുമെന്നും അദ്ദേഹം പറഞ്ഞു.

ALSO READ: പുതിയ കാർ നിങ്ങളുടെതാണ്: നിർബന്ധമായും കാർ വാങ്ങുന്നവർ ശ്രദ്ധിക്കുക; PDI ചെയ്യാതെ ഡെലിവറി എടുക്കരുത്

ഭൂപതിവ് ചട്ടങ്ങൾ തയ്യാറാക്കുന്നത് ഏറെ പ്രയാസകരമായിരുന്നുവെന്ന് മന്ത്രി രാജൻ വാർത്താ സമ്മേളനത്തിൽ പറഞ്ഞു. സുദീർഘമായ നിയമപരിശോധനകൾക്കൊടുവിലാണ് ഭേദഗതി നടപ്പാക്കിയത്. കേവലം 13 നിയമങ്ങൾ മാത്രമാണ് ഭേദഗതി ചെയ്തത്. ഇതിൽ 11 ചട്ടങ്ങൾ റെഗുലറൈസ് ചെയ്യാൻ കഴിയുമെന്നും അദ്ദേഹം ചൂണ്ടിക്കാട്ടി. പട്ടയ വ്യവസ്ഥകൾ ലംഘിച്ച കേസുകളിൽ മാത്രമാണ് ഭേദഗതിയിലൂടെ സാധൂകരണം നടത്തുക. ഏറ്റവും ലളിതമായ നടപടിക്രമങ്ങളാണ് ഇതിനായി നിർദേശിച്ചിട്ടുള്ളത്. ഓണാവധി കഴിഞ്ഞയുടൻ ബാക്കി നടപടികൾ പൂർത്തിയാക്കുമെന്നും മന്ത്രി അറിയിച്ചു.

ALSO READ: മികച്ച സാങ്കേതിക വിദ്യകളും സർവീസും: ആളുകളുടെ ഇഷ്ട സ്കൂട്ടറായി മാറി ടിവിഎസ് ജുപ്പിറ്റർ; ജൂലൈയിൽ വിറ്റഴിച്ചത് 1.24 ലക്ഷം യൂണിറ്റുകൾ

പൂട്ടിയ ക്വാറികൾ നിയമപരമായി ക്രമവത്കരിക്കുമെങ്കിലും, ജിയോളജി ആൻഡ് മൈനിങ് വകുപ്പുകൾ പൂട്ടിയവയ്ക്ക് ഇത് ബാധകമാകില്ലെന്ന് മന്ത്രി വ്യക്തമാക്കി. പട്ടയം ലഭിച്ചവർക്ക് വാണിജ്യ നിർമാണങ്ങൾക്കുള്ള അനുമതി കുറഞ്ഞ കാലയളവിനുള്ളിൽ നൽകാൻ കഴിയുമെന്നും അദ്ദേഹം കൂട്ടിച്ചേർത്തു. തൃശൂർ പൂരം വിവാദത്തിലും മന്ത്രി പ്രതികരിച്ചു. എഡിജിപി എം ആർ അജിത് കുമാറിനെതിരെയുള്ള തന്റെ അഭിപ്രായത്തിൽ യാതൊരു വ്യത്യാസവുമില്ലെന്നും, പറഞ്ഞ കാര്യങ്ങളിൽ ഉറച്ചുനിൽക്കുന്നുവെന്നും മന്ത്രി പറഞ്ഞു. അന്വേഷണ ഉദ്യോഗസ്ഥർക്ക് ഇക്കാര്യത്തിൽ മൊഴി നൽകിയിട്ടുണ്ട്. ഏതെങ്കിലും അന്വേഷണ റിപ്പോർട്ട് ലഭിച്ചതായി തനിക്കോ സർക്കാരിനോ അറിയില്ല. റിപ്പോർട്ട് വരുന്നതുവരെ കാത്തിരിക്കണമെന്നും, ഊഹാപോഹങ്ങളോട് ഇപ്പോൾ പ്രതികരിക്കുന്നത് റിപ്പോർട്ട് വരുമ്പോൾ മറുപടി പറയാൻ ബുദ്ധിമുട്ടാക്കുമെന്നും അദ്ദേഹം പറഞ്ഞു.

ഭൂപതിവ് നിയമഭേദഗതിക്കുള്ള ചട്ടങ്ങൾ തയ്യാറായെന്നും, സബ്ജക്ട് കമ്മിറ്റിക്ക് അയക്കേണ്ടതുണ്ടെന്നും മുഖ്യമന്ത്രി പിണറായി വിജയൻ നേരത്തെ വ്യക്തമാക്കിയിരുന്നു. പ്രകടനപത്രികയിലെ പ്രധാന വാഗ്ദാനം ഇതോടെ നടപ്പാക്കുകയാണെന്നും, മലയോര മേഖലയിലെ പ്രശ്നങ്ങൾ മന്ത്രിസഭാ യോഗത്തിൽ വിശദമായി ചർച്ച ചെയ്തുവെന്നും മുഖ്യമന്ത്രി പറഞ്ഞു. റവന്യൂ മന്ത്രി കൂടി പങ്കെടുത്ത വാർത്താ സമ്മേളനത്തിലായിരുന്നു ഇക്കാര്യങ്ങൾ വ്യക്തമാക്കിയത്.

Minister K Rajan announced that the state government will take steps to legally regularize closed quarries, ensuring compliance with regulations to resume operations