മലപ്പുറം: എസ് കെ എസ് എസ് എഫ് നാഷണൽ ക്യാമ്പസ് വിംഗിന്റെ വാർഷിക സംഗമം വലക്കണ്ടി പെരുവള്ളൂർ തൻവീറുല്‍ ഇസ്ലാം യതീംഖാന ക്യാമ്പസിൽ ജൂലൈ 12, 13 തിയതികളിലായി സംഘടിപ്പിക്കപ്പെട്ടു. രാജ്യത്തെ വിവിധ കേന്ദ്ര സർവ്വകലാശാലാ യൂണിറ്റുകളിൽ നിന്നുള്ള പ്രതിനിധികളും ദേശീയ - സംസ്ഥാന നേതാക്കളും പങ്കെടുത്തു. സമസ്ത കേന്ദ്ര മുശാവറാംഗം ഉസ്താദ് അബ്ദുറഹ്മാൻ ഫൈസി അരിപ്ര ഉദ്ഘാടനം നിര്‍വഹിച്ച ക്യാമ്പില്‍ പരിശീലന സെഷനുകളും പ്രവര്‍ത്തന വിലയിരുത്തലും കർമ്മപദ്ധതി രൂപീകരണവും നടന്നു. 

'ഐസ് ബ്രേക്കിംഗ് ആൻഡ് ടീം ബിൽഡപ്പ്', എന്ന ആദ്യ സെഷന് അഷ്റഫ് മലയിൽ നേതൃത്വം നല്‍കി. തുടര്‍ന്ന് 'മീറ്റ് ദ ലീഡേഴ്‌സ്', 'സമസ്ത: മിഷനും വിഷനും' എന്ന വിഷയങ്ങളിലും ചർച്ച നടന്നു. 'ദി മുസ്ലിം ഐഡന്റിറ്റി, ഇസ്‌ലാമോഫോബിയ, എക്സ്ട്രീമിസം' എന്ന സെഷനില്‍ സാദിഖ് ഫൈസി താനൂര്‍ വിഷയാവാതരണം നടത്തി.  തുടര്‍ന്ന് റഫീഖ് ചെന്നെയുടെയും ഹാദി തൃപനച്ചിയുടെയും നേതൃത്വത്തില്‍ തസ്കിയത്ത്, ഇശ്ഖ് മജ്ലിസും നടന്നു. 

ഫിസിക്കല്‍ ആക്ടിവിറ്റികൾ, നേതൃത്വ പരിശീലനം, ഗ്രൂപ്പ് ഡിസ്കഷന്‍ തുടങ്ങീ സെഷനുകൾ നടന്ന രണ്ടാം ദിനത്തില്‍  'ലീഡർഷിപ്പ് ആൻഡ് കോൺഫ്ലിക്റ്റ് മാനേജ്മെന്റ്' എന്ന വിഷയത്തില്‍ ഡോ. എം അബ്ദുൽ ഖയ്യൂം സംവദിച്ചു. 

തുടർന്ന് നാഷണൽ ക്യാമ്പസ് വിംഗിന് കീഴിലെ പന്ത്രണ്ടോളം ക്യാമ്പസ് യൂണിറ്റുകളുടെ വാർഷിക റിപ്പോര്‍ട്ട് അവതരണവും കർമ്മപദ്ധതി രൂപീകരണവും നടന്നു. മികച്ച കാമ്പസുകൾക്ക് പുരസ്കാരവും  വിതരണം ചെയ്തു. സമാപന സംഗമം സംസ്ഥാന ജനറല്‍ സെക്രട്ടറി ഓ.പി.എം അഷ്‌റഫ് കുറ്റിക്കടവ്   ഉദ്ഘാടനം നിര്‍വഹിച്ചു. കേരളത്തിന് പുറത്തെ വിദ്യാഭ്യാസ - സാമൂഹിക പ്രവർത്തനങ്ങൾ പ്രശംസനീയമാണെന്നും അതിന് കൂടുതല്‍ ഊർജം നൽകാൻ ഈ സംഗമത്തിനാവുമെന്നും അദ്ദേഹം അഭിപ്രായപ്പെട്ടു. ദേശീയ ചെയര്‍മാന്‍ ആശിഖ് മാടാക്കര അധ്യക്ഷതയും കൺവീനർ വസീം അമ്പലക്കടവ് നന്ദിയും പറഞ്ഞു. എസ് കെ എസ് എസ് എഫ് ദേശീയ ജനറൽ സെക്രട്ടറി അസ്‌ലം ഫൈസി ബാംഗ്ളൂർ, ജോയിൻ. സെക്രട്ടറി ഷാഫി mashrikhi,  ശബിൻ മുഹമ്മദ്‌  ക്യാമ്പസ്‌ വിംഗ് മറ്റു ഭാരവാഹികളായ ത്വാഹ വാഴയൂർ, അബ്ദുറഹ്മാന്‍ വള്ളുവമ്പ്രം, സൽമാൻ,  ഹാദി കരുവാരക്കുണ്ട്, സർ ഹിന്ദി കോർഡിനേറ്റർ സഹദ് മാടാക്കര, തുടങ്ങിയവർ സംബന്ധിച്ചു.