കാലിഫോർണിയ: അന്താരാഷ്ട്ര ബഹിരാകാശ നിലയം സന്ദർശിച്ച ഇന്ത്യയുടെ ശുഭാംശു ശുക്ലയടങ്ങുന്ന സംഘം ഇന്ന് ഭൂമിയിലെത്തും. ഓക്സിയം -4 ദൗത്യത്തിൽ നാലു പേരാണുണ്ടായിരുന്നത്. ഇന്നലെ ഇവർ നിലയത്തിലെ ഓർബിറ്റിങ് ലബോറട്ടറിയിൽനിന്ന് അൺ ഡോക്കിങ് നടത്തി. ജൂൺ 26 നായിരുന്നു പേടകം ബഹിരാകാശ നിലയത്തിൽ ഡോക്കിങ് നടത്തിയത്.

നാസ മുൻ ശാസ്ത്രജ്ഞൻ പെഗ്ഗി വിറ്റസന്റെ നേതൃത്വത്തിൽ ഗ്രൂപ്പ് കാപ്റ്റൻ ശുഭാംശു ശുക്ല, പോളണ്ട് എൻജിനീയറായ സ്ലവോഷ് ഉസ്്നാൻസ്‌കി, ഹംഗേറിയൻ ഗവേഷകൻ തിബോർ കാപ്പു എന്നിവരാണ് സംഘത്തിലുള്ളത്. 
ഹൂസ്റ്റൺ കേന്ദ്രമായ സ്വകാര്യ കമ്പനി ഓക്സിം ആണ് നാസ, ഐ.എസ്.ആർ.ഒ, യൂറോപ്യൻ സ്പേസ് ഏജൻസി, സ്പേസ് എക്സ് എന്നിവയുമായി സഹകരിച്ച് പദ്ധതി നടത്തിയത്. സഞ്ചാരികൾ ഭൂമിയിൽ വിജയകരമായി ഇറങ്ങുന്നതോടെ പദ്ധതി പൂർത്തിയാകും. 22 മണിക്കൂർ നീണ്ട യാത്രക്കൊടുവിലാണ് പേടകം ഭൂമിയിലിറങ്ങുക.

കാലിഫോർണിയ തീരത്ത് ഇന്ത്യൻ സമയം വൈകിട്ട് മൂന്നിനാണ് ശുഭാംശുവും സംഘവും ഇറങ്ങുക. നാവികസേനാ കപ്പൽ പേടകം വീണ്ടെടുക്കും. ഇന്ത്യയുടെ ആദ്യ ബഹിരാകാശ സഞ്ചാരി രാകേശ് ശർമയെയും 1924ലെ ഉറുദു ഗാനമായ സാരേ ജഹാംസെ അച്ചാ എന്നുള്ള വരികളിൽ ശുഭാംശു അനുസ്മരിച്ചു. അന്താരാഷ്ട്ര നിലയത്തിൽ ശുഭാംശു 60 ശാസ്ത്ര പരീക്ഷണങ്ങൾ പൂർത്തിയാക്കി. ഇതിൽ ഏഴെണ്ണം ഐ.എസ്.ആർ.ഒയുടേതാണ്.

2027 ൽ ഗഗൻയാൻ എന്ന പേരിൽ ഇന്ത്യക്കാരനെ ബഹിരാകാശത്ത് എത്തിക്കുന്ന ദൗത്യം ഐ.എസ്.ആർ.ഒ നടത്താനിരിക്കുകയാണ്. 2035 ൽ ബഹിരാകാശ നിലയം സ്ഥാപിക്കാനും 2040ൽ മനുഷ്യനെ ചൊവ്വയിൽ അയയ്ക്കാനും ഇന്ത്യക്ക് പദ്ധതിയുണ്ട്. ഗഗൻയാൻ ദൗത്യത്തിലേക്ക് ചുരുക്കപ്പട്ടികയിൽ തെരഞ്ഞെടുക്കപ്പെട്ട ഇന്ത്യൻ എയർഫോഴ്സ് ഓഫിസർമാരിലൊരാളാണ് ശുഭാംശു ശുക്ല. 1985 ഒക്ടോബർ 10 ന് വടക്കൻ ലഖ്നൗവിൽ ജനിച്ച ശുഭാംശു 2006 ലാണ് വ്യോമസേനയിൽ ചേർന്നത്. 2000 മണിക്കൂറിലേറെ വിമാനം പറത്തി പരിചയമുള്ള ശുഭാംശു മിഗ്, സുഖോയ്, ഡ്രോണിയർ, ജാഗ്വർ, ഹോക്സ് വിമാനങ്ങൾ പറത്തിയിട്ടുണ്ട്.

Making history and returning to Earth Shubhamshu Shukla and team will return today