തെല്‍അവീവ്: ഗസ്സയില്‍ ഇസ്‌റാഈല്‍ സൈന്യം സിവിലിയന്‍മാരെ കൊലപ്പെടുത്താന്‍ വാണിജ്യ ഡ്രോണുകള്‍ ഉപയോഗിച്ചെന്ന് ഇസ്‌റാഈല്‍ മാധ്യമത്തിന്റെ അന്വേഷണത്തില്‍ കണ്ടെത്തി. 927 മാഗസിനാണ് റിപ്പോര്‍ട്ട് പുറത്തുവിട്ടത്.

ചൈനീസ് നിര്‍മിത ഡ്രോണുകള്‍ ഉപയോഗിച്ചാണ് ഇസ്‌റാഈല്‍ സൈന്യം ഫലസ്തീനികളെ കൊല്ലുന്നത്. കുട്ടികളെും സാധാരണക്കാരെയും കൊലപ്പെടുത്താന്‍ ഡ്രോണില്‍ ബോംബ് വച്ച് അവര്‍ക്കു മേല്‍ വര്‍ഷിക്കുകയായിരുന്നുവെന്ന് മാഗസിന്‍ പറയുന്നു. ഇത് ഇസ്‌റാഈല്‍ സൈനികരാണ് ഗസ്സയില്‍ നിന്ന് നിയന്ത്രിച്ചിരുന്നത്. 

ഏഴു ഇസ്‌റാഈല്‍ സൈനികരെയും ഓഫിസര്‍മാരെയും മാഗസിന്‍ ഇന്റര്‍വ്യൂ ചെയ്തിരുന്നു. തെക്കന്‍ ഗസ്സയില്‍ ഇസ്‌റാഈലിന് ക്യാംപ് നിര്‍മിക്കാനും പദ്ധതിയുണ്ട്. ഫലസ്തീനികളെ പാര്‍പ്പിക്കാനുള്ള തടങ്കല്‍പാളയമാണ് ഇവിടെ നിര്‍മിക്കുന്നതെന്ന് മുന്‍ പ്രധാനമന്ത്രിയും ഇപ്പോഴത്തെ പ്രതിപക്ഷ നേതാവുമായ യായിര്‍ ലാപിഡും മുന്‍ പ്രധാനമന്ത്രി എഹൂദ് ഒല്‍മെര്‍ട്ടും പറഞ്ഞിരുന്നു.

തെക്കന്‍ ഗസ്സയില്‍ നിന്ന് ഫലസ്തീനികളെ നിര്‍ബന്ധിച്ച് കുടിയൊഴിപ്പിക്കാനാണ് വാണിജ്യ ഡ്രോണുകളില്‍ ബോംബ് ഘടിപ്പിച്ച് അവരുടെ വീടുകളില്‍ സ്‌ഫോടനം നടത്തി കൊന്നൊടുക്കുന്നതെന്നാണ് റിപ്പോര്‍ട്ടുകള്‍. ചൈനീസ് കമ്പനിയായ ഓട്ടല്‍ നിര്‍മിച്ച എവോ ഡ്രോണുകളാണ് ഇസ്‌റാഈല്‍ സൈന്യം വ്യാപകമായി ഉപയോഗിക്കുന്നത്.

ഫോട്ടോഗ്രാഫര്‍മാര്‍ക്ക് വേണ്ടിയെന്ന് അവകാശപ്പെട്ട് 3000 ഡോളറിനാണ് ഡ്രോണുകള്‍ വാങ്ങിയത്. അയേണ്‍ ബോള്‍ എന്നറിയപ്പെടുന്ന ഹാന്‍ഡ് ഗ്രനേഡ് ഈ ഡ്രോണില്‍ ഘടിപ്പിച്ചാണ് ആക്രമണം നടത്തുന്നത്. കുട്ടികള്‍ ഉള്‍പ്പെടെയുള്ളവരെയാണ് ഈ ഡ്രോണ്‍ ഉപയോഗിച്ച് ഇസ്‌റാഈല്‍ കൊലപ്പെടുത്തുന്നത്. കൊല്ലപ്പെടുന്നവരുടെ മൃതദേഹങ്ങള്‍ എടുക്കാനും ഇസ്‌റാഈല്‍ സൈനികര്‍ അനുവദിക്കാറില്ലെന്ന് പ്രദേശവാസികള്‍ പറയുന്നു. തെരുവു നായകളെ മൃതദേഹങ്ങള്‍ തിന്നാന്‍ അനുവദിക്കാറുണ്ടെന്നും ഗസ്സക്കാര്‍ പറയുന്നു. 

കുട്ടികളെയാണ് ഇസ്‌റാഈല്‍ സൈന്യം കൂടുതലായും ലക്ഷ്യംവയ്ക്കുന്നതെന്നും കുട്ടികളെ ഗ്രനേഡ് ഉപയോഗിച്ചു കൊല്ലുകയാണെന്നും മാഗസിന്‍ റിപ്പോര്‍ട്ട് ചെയ്തു. സൈനിക ഡ്രോണുകളേക്കാള്‍ വില കുറവായതിനാലാണ് വാണിജ്യ ഡ്രോണുകള്‍ ഉപയോഗിക്കുന്നതെന്നാണ് സൈനികര്‍ വെളിപ്പെടുത്തിയത്.

The Israeli army is weaponising Chinese-made drones to kill Palestinian civilians in the Gaza Strip, according to an investigation by the Israeli publications 972 Magazine and the Local Call.