ആലപ്പുഴ: ചെങ്കടലിലെ കപ്പല്‍ ആക്രമണത്തില്‍ ഹൂതികള്‍ ബന്ദിയാക്കിയവരില്‍ മലയാളിയുമെന്ന് സൂചന. കപ്പലില്‍ ഉണ്ടായിരുന്ന കായംകുളം സ്വദേശി അനില്‍കുമാറിനെ കുറിച്ച് വിവരമില്ലെന്ന പരാതിയുമായി ബന്ധുക്കള്‍ രംഗത്തെത്തി. 

അനില്‍കുമാര്‍ ബന്ദിയാക്കിയവരില്‍ ഉണ്ടെന്നാണ് കുടുംബം പറയുന്നത്. കപ്പലില്‍ ഉണ്ടായിരുന്ന കന്യാകുമാരി സ്വദേശി അഗസ്റ്റിന്‍ രക്ഷപ്പെട്ട് നാട്ടിലെത്തിയിട്ടുണ്ട്. അഗസ്റ്റിനുമായി സംസാരിക്കാന്‍ അനില്‍കുമാറിന്റെ കുടുംബം കന്യാകുമാരിയിലേക്ക് പോവുകയാണ്. അവിടെ നിന്ന് അനില്‍കുമാറിനെ കുറിച്ച് എന്തെങ്കിലും വിവരം ലഭിക്കുമെന്ന പ്രതീക്ഷയിലാണ് കുടുംബം. 

ALSO READ: ഇന്ധന നിയന്ത്രണ സ്വിച്ച് ഓഫ് ചെയ്തത് ക്യാപ്റ്റന്‍?; അഹമ്മദാബാദ് വിമാനാപകടത്തില്‍ വാള്‍ സ്ട്രീറ്റ് ജേര്‍ണല്‍ റിപ്പോര്‍ട്ട് 

കപ്പലിലെ സെക്യൂരിറ്റി ജീവനക്കാരനായിരുന്നു പത്തിയൂര്‍ ശ്രീജാലയത്തില്‍ അനില്‍കുമാര്‍. ഫെബ്രുവരി 22ന് പാലക്കാട്ടെ ഏജന്‍സി മുഖേനയാണ് ഗ്രീക്കിലെ സീ ഗാര്‍ഡന്‍മാരി ടൈം സെക്യൂരിറ്റി കമ്പനിയില്‍ അനില്‍കുമാര്‍ ജോലിയില്‍ പ്രവേശിച്ചത്.

ഈ മാസം ആറിന് അനിലുമായി ഫോണില്‍ സംസാരിച്ചിരുന്നുവെന്നും ചെങ്കടലിലേക്ക് പോവുകയാണെന്ന് അന്ന് പറഞ്ഞിരുന്നുവെന്നും കുടുംബം പറയുന്നു. ഭര്‍ത്താവിനെ കണ്ടെത്താന്‍ സഹായിക്കണമെന്ന് അഭ്യര്‍ത്ഥിച്ച് അനിലിന്റെ ഭാര്യ ശ്രീജ കേന്ദ്രസര്‍ക്കാരിനെയും, കെസി വേണുഗോപാല്‍ എം.പിയെയും സമീപിച്ചിട്ടുണ്ട്. 

ഫിലിപ്പീന്‍സ്, ഗ്രീസ് സ്വദേശികളായ നാല് കപ്പല്‍ ജീവനക്കാര്‍ അന്നത്തെ ഹൂതി ആക്രമണത്തില്‍ കൊല്ലപ്പെട്ടിരുന്നുവെന്നാണ് റിപ്പോര്‍ട്ട്. ഇസ്‌റാഈല്‍ ഗസ്സയില്‍ നടത്തുന്ന വംശഹത്യാ ആക്രണങ്ങള്‍ക്കെതിരെയായാണ് ഹൂതികള്‍ ചെങ്കടലില്‍ കപ്പലുകള്‍ക്ക് നേരെ ആക്രമണം നടത്തുന്നത്. ഇസ്‌റാഈലിലേക്കുള്ള കപ്പലുകള്‍ക്ക് നേരെയാണ് ആക്രമണം നടത്തുന്നത്. 

Anilkumar, a security crew member from Kayamkulam, is feared to be among those captured by Houthis after a Red Sea ship attack.