പാലക്കാട്: സർക്കാർ പ്രഖ്യാപനങ്ങൾ പാഴ്‌വാക്കായതോടെ ഗതികെട്ട് തെരുവിലിറങ്ങി ആദിവാസികൾ. ആദിവാസി ഉന്നതികൾ കൂടുതലുള്ള പറമ്പിക്കുളത്തേക്കും നെല്ലിയാമ്പതിയിലേക്കും പോകാൻ ചെമ്മണാംപതിയിൽ നിന്ന് തേക്കടിയിലേക്ക് റോഡ് നിർമിക്കണമെന്ന ആവശ്യം സർക്കാർ അവഗണിച്ചതിനെതിരേയാണ് ആദിവാസികളുടെ സമരം. മുതലമട ജനകീയ വികസനമുന്നണിയുടെ നേതൃത്വത്തിൽ  ഗ്രാമപഞ്ചായത്തിന് മുന്നിലാണ് സ്ത്രീകളും കുട്ടികളും ഉൾപ്പെടെയുള്ളവർ അനിശ്ചിതകാല കുടിൽകെട്ടി സമരം ആരംഭിച്ചത്. 

റോഡ് നിർമാണത്തിനായി വിശദമായ പദ്ധതി റിപ്പോർട്ട് തയാറാക്കാൻ കെല്ലിനെ (കേരള ഇലക്ട്രിക്കൽ ആൻഡ് എൻജിനീയറിങ് കോർപറേഷൻ ലിമിറ്റഡ്) നിയമിക്കാൻ നേരത്തെ തീരുമാനിച്ചിരുന്നു. ഇതിനായി 15 ലക്ഷം രൂപയും നീക്കിവച്ചിരുന്നു.  എന്നാൽ, പിന്നീട് പദ്ധതിയിൽ ഒരു നടപടിയുമുണ്ടായില്ല. മാത്രമല്ല, സമരത്തിലൂടെ നേടിയെടുത്ത ആദിവാസികളുടെ റോഡ് എന്ന സ്വപ്‌നത്തിന് ഇടിത്തീയായി ഇപ്പോൾ പദ്ധതി ഉപേക്ഷിക്കാൻ തീരുമാനിച്ചിരിക്കുകയാണ്. ഇതിനെതിരേയാണ് ആദിവാസികൾ സമരവുമായി തെരുവിലിറങ്ങിയത്. 

ALSO READ: എന്‍ഐ.എ കേസുകളിലെ വിചാരണ നീളുന്നു; ജാമ്യം നല്‍കുകയല്ലാതെ മറ്റ് മാര്‍ഗമില്ലെന്ന് കേന്ദ്രസര്‍ക്കാരിനോട് സുപ്രിംകോടതി

കാടിനുള്ളിലൂടെയുള്ള റോഡ് വീതികൂട്ടി വികസിപ്പിക്കണമെന്ന് ആവശ്യപ്പെട്ട് 2020ൽ ഗാന്ധിജയന്തി ദിനത്തിലാണ് ആദ്യം സമരം ആരംഭിച്ചത്. പ്രതിഷേധങ്ങൾക്കൊടുവിൽ ഏഴ് കിലോമീറ്റർ റോഡ് നിർമിക്കാൻ വനംവകുപ്പ് അനുമതിയും നൽകി. ഗ്രാമപഞ്ചായത്തിൽ നിന്ന് 25 ലക്ഷം രൂപയും എം.എൽ.എഫണ്ടും ഉപയോഗിച്ച് 750 മീറ്റർ കോൺക്രീറ്റ് ചെയ്തു. ഇനി രണ്ട് കിലോമീറ്റർ കൂടി കോൺക്രീറ്റ് ചെയ്താൽ റോഡിലൂടെ വാഹനങ്ങൾക്ക് സഞ്ചരിക്കാനാകുമെന്ന് തേക്കടി ഊരുമൂപ്പൻ രാമൻകുട്ടി സുപ്രഭാതത്തോട് പറഞ്ഞു. ഡി.പി.ആർ തയാറാക്കി നൽകിയാൽ 10 കോടി അനുവദിക്കാമെന്ന് നബാർഡ് ഉറപ്പ് നൽകിയിരുന്നു. ഇതിനിടയിലാണ് പദ്ധതി നടപ്പാക്കുന്നതിൽ ബന്ധപ്പെട്ടവർ വീഴ്ചവരുത്തിയിരിക്കുന്നത്.  

ഒറ്റപ്പെട്ട് ഉന്നതികൾ   

മുതലമട പഞ്ചായത്തിലാണ് പറമ്പിക്കുളം. ഇവിടുത്തെ തേക്കടി, മുപ്പതേക്കർ, ഒറവൻപാടി, പെരിയചോല ഉന്നതികളിലായി മുവായിരത്തിലധികം ആളുകളാണ് താമസിക്കുന്നത്. കൂടാതെ വനം, പൊലിസ്, വൈദ്യുതി, ജലസേചന വകുപ്പുകളിലെ ഉദ്യോഗസ്ഥരുമുണ്ട്. ഇവർ പറമ്പിക്കുളത്തേക്ക് എത്തുന്നത് ഗോവിന്ദാപുരത്തോ ചെമ്മണാംപതിയിലോ വന്ന ശേഷം തമിഴ്‌നാട്ടിലെ സേത്ത്മടവഴി 50 കിലോമീറ്ററോളം അധിക യാത്ര ചെയ്താണ്. 

ALSO READ: അപകടങ്ങള്‍ തുടര്‍ക്കഥ: എങ്ങുമെത്താതെ കെഎസ്ഇബിയുടെ എബിസി ലൈന്‍ പദ്ധതി

മുമ്പ് തമിഴ്‌നാടിന്റെ ഒരു ബസ് പൊള്ളാച്ചിയിൽ നിന്ന് സർവിസ് നടത്തിയിരുന്നു. ഇപ്പോഴത് വഴിപാട് പോലെ വല്ലപ്പോഴുമാണ് വന്നുപോകുന്നത്. അതിനാൽ ഇവിടെയുള്ളവക്ക് ഇപ്പോൾ ആശ്രയം ജീപ്പാണ്. മുതലമടയിലെത്താൻ 4000രൂപ ജീപ്പിന് വാടക നൽകണം. അടിയന്തര ആവശ്യങ്ങൾക്ക് മുതലമടയിലെത്തണമെങ്കിൽ യാത്രചെയ്യാൻ തമിഴ്‌നാടിന്റെ അനുമതിയും വേണം. മാത്രമല്ല, നെല്ലിയാമ്പതിയിലെത്താൻ ചുരം റോഡ് അല്ലാതെ മറ്റ് മാർഗങ്ങളുമില്ല. ഈ രണ്ട് യാത്രാ പ്രശ്‌നങ്ങൾക്കുമുള്ള ശാശ്വത പരിഹാരമാണ് നിർദിഷ്ട തേക്കടി - ചെമ്മണാംപതി റോഡ്. 

Frustrated by the government’s unfulfilled promises, members of the Adivasi (tribal) community have taken to the streets in protest. The agitation is in response to the government's continued neglect of their long-standing demand to construct a road from Chemmannampathy to Thekkadi, which would provide vital access to Parambikulam and Nelliampathy, areas with significant tribal populations.