കോഴിക്കോട്: വ്യാജ ഐഡി ഉപയോഗിച്ച് കുട്ടികളുടെ നഗ്നദൃശ്യങ്ങള്‍ ഓണ്‍ലൈനിലൂടെ വില്‍പ്പന നടത്തിയ പ്രതി പിടിയില്‍. ബാലുശ്ശേരി എരമംഗലം സ്വദേശി വീര്യോത്ത് വിഷ്ണുവാണ് കോഴിക്കോട് റൂറല്‍ സൈബര്‍ ക്രെം പൊലിസിന്റെ പിടിയിലായത്. തെലങ്കാന പൊലിസ് നല്‍കിയ വിവരത്തിന്റെ അടിസ്ഥാനത്തിലാണ് നടപടി.

സ്ത്രീകളുടെ പേരിലാണ് ഇയാള്‍ വ്യാജ സോഷ്യല്‍ മീഡിയ പ്രൊഫൈലുകള്‍ ക്രിയേറ്റ് ചെയ്തത്. പ്രധാനമായും ടെലഗ്രാമിലൂടെയാണ് വിഷ്ണു ഇടപാട് നടത്തിയത്. ഡിജിറ്റല്‍ പണമിടപാടിലൂടെ നിരവധിയാളുകള്‍ വിഷ്ണുവിന് പണം കൈമാറിയിട്ടുണ്ടെന്നും സൈബര്‍ പൊലിസ് കണ്ടെത്തിയിട്ടുണ്ട്. ആദ്യം വ്യാജ ഫേസ്ബുക്ക്, ഇന്‍സ്റ്റഗ്രാം അക്കൗണ്ടുകള്‍ ഉപയോഗിച്ച് ചാറ്റ് ചെയ്യും. ശേഷം ടെലഗ്രാം അക്കൗണ്ടിലൂടെ കുട്ടികളുടെ നഗ്ന ദൃശ്യങ്ങള്‍ ആവശ്യക്കാര്‍ക്ക് അയച്ച് കൊടുത്താണ് വിഷ്ണു ഇടപാടുകള്‍ നടത്തിയിരുന്നത്. ടെലിഗ്രാം ഗ്രൂപ്പുകള്‍ ഉപയോഗിച്ചാണ് ഇയാള്‍ കുട്ടികളുടെ നഗ്ന ദൃശ്യങ്ങള്‍ ശേഖരിച്ചിരുന്നതെന്നും പൊലിസ് കണ്ടെത്തി.

ALSO READ: അതുല്യയുടെ മരണത്തിന് പിന്നിൽ ഭർത്താവിന്റെ ക്രൂരത: തെളിവായി ചിത്രങ്ങളും, വീഡിയോയും; പരാതിയുമായി കുടുംബം 

സോഷ്യല്‍ മീഡിയ പട്രോളിങ്ങിനിടെ ടെലഗ്രാം ഉപയോഗിച്ച് കുട്ടികളുടെ നഗ്ന ദൃശ്യങ്ങള്‍ വില്‍ക്കുന്ന സംഘത്തെ കുറിച്ച് തെലങ്കാന പൊലിസിന് വിവരം ലഭിച്ചിരുന്നു. തുടര്‍ന്ന് നടത്തിയ വിശദ അന്വേഷണത്തിലാണ് ബാലുശ്ശേരി സ്വദേശി വിഷ്ണുവിലേക്ക് എത്തിയത്. തെലങ്കാന സൈബര്‍ സെക്യൂരിറ്റി വിഭാഗം ഇക്കാര്യം കോഴിക്കോട് റൂറല്‍ എസ്പി കെ ഇ ബിജുവിനെ അറിയിച്ചു. തുടര്‍ന്ന് കോഴിക്കോട് സൈബര്‍ പൊലിസ് നടത്തിയ ഓപ്പറേഷനിലാണ് വിഷ്ണു പിടിയിലായത്. 

വിഷ്ണുവിന്റെ അക്കൗണ്ടിലേക്ക് പണം കൈമാറിയവരെ കുറിച്ചും വിശദമായ അന്വേഷണം നടക്കുന്നുണ്ട്. കേസില്‍ മറ്റ് ചിലര്‍ കൂടി ഉള്‍പ്പെട്ടതായും പൊലിസിന് വിവരം ലഭിച്ചിട്ടുണ്ട്. അന്വേഷണം തുടരുകയാണെന്നും പൊലിസ് അറിയിച്ചു.

Kozhikode native was arrested for selling explicit content involving children online using a fake ID. The arrest was made based on information provided by the Telangana Police. Further investigation is underway.