പളളുരുത്തി: വീണ്ടും വര്‍ഗീയ പരാമര്‍ശവുമായി എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍.  കാന്തപുരത്തേയും മുസ്‌ലിം ജനസംഖ്യയേയും വെള്ളാപ്പള്ളി തന്റെ പ്രസംഗത്തില്‍ എടുത്തു പറഞ്ഞു. നമ്മുടെ വോട്ടിന് ഒരു വിലയുമില്ല. കാന്തപുരം എന്ത് കുന്തമെടുത്ത് എറിഞ്ഞാലും താന്‍ പറയാനുള്ളത് പറയുമെന്നും വെള്ളാപ്പള്ളി പറഞ്ഞു. എസ്.എന്‍.ഡി.പി യോഗം കൊച്ചി യൂണിയന്റെ ആഭിമുഖ്യത്തില്‍ ജനറല്‍ സെക്രട്ടറി സ്ഥാനത്ത് 30 വര്‍ഷം പൂര്‍ത്തിയാക്കിയ വെള്ളാപ്പള്ളി നടേശന് കൊച്ചിയില്‍ നല്‍കിയ ആദരിക്കല്‍ ചടങ്ങിനിടെയായിരുന്നു പരാമര്‍ശം. ലീഗില്‍ എല്ലാവരും മുസ്‌ലിംകള്‍ ആയിട്ടും അത് മതേതര പാര്‍ട്ടിയെന്നും വെള്ളാപ്പള്ളി ആരോപിച്ചു.

മന്ത്രി വി.എന്‍. വാസവനാണ് പരിപാടി ഉദ്ഘാടനം ചെയ്തത്. മന്ത്രി പി. രാജീവ് ആയിരുന്നു മുഖ്യപ്രഭാഷണം. ബി.ജെ.പി സംസ്ഥാന അദ്ധ്യക്ഷന്‍ രാജീവ് ചന്ദ്രശേഖര്‍, മേയര്‍ എം. അനില്‍കുമാര്‍ എന്നിവര്‍ക്ക് പുറമേ കേണ്‍ഗ്രസ് നേതാവ് ഹൈബി ഈഡന്‍ എം.പിയും എം.എല്‍.എമാരായ കെ. ബാബു, കെ.ജെ. മാക്‌സിയും ചടങ്ങിലുണ്ടായിരുന്നു. കാര്യങ്ങള്‍ തുറന്നു പറയാന്‍ ധൈര്യമുള്ള നേതാവാണ് വെള്ളാപ്പള്ളിയെന്നാണ് വാസവന്‍ തന്റെ പ്രസംഗത്തില്‍ പ്രതികരിച്ചത്. ഹൈബി ഈഡനും പ്രസംഗത്തില്‍ വെള്ളാപ്പള്ളിയെ പുകഴ്ത്തിയാണ് സംസാരിച്ചത്. 

ALSO READ: 'തന്നെ അയാൾ ചവിട്ടി കൂട്ടി, ആത്മഹത്യ ചെയ്യാൻ പോലുമുള്ള ധൈര്യമില്ല'; കരഞ്ഞുകൊണ്ട് അതുല്യ സുഹൃത്തിനയച്ച സന്ദേശം പുറത്ത് 

കഴിഞ്ഞ ദിവസവും വെള്ളാപ്പള്ളി വര്‍ഗീയ പരാമര്‍ശം നടത്തിയിരുന്നു. സര്‍ക്കാര്‍ എന്ത് നിയമം കൊണ്ട് വന്നാലും മലപ്പുറത്ത് പോയി ചോദിച്ചില്ലെങ്കില്‍ അത് കുഴപ്പമായി. കോടതിയുടെ നിര്‍ദേശപ്രകാരം സ്‌കൂള്‍ സമയം ക്രമീകരിച്ചപ്പോള്‍ ഓണം ക്രിസ്മസ് അവധികള്‍ വെട്ടിക്കുറക്കണമെന്ന് സമസ്ത ആവശ്യപ്പെട്ടു. ഈ രാജ്യം എങ്ങോട്ടേക്കാണ് പോകുന്നത്. ഇവിടെ മതാധിപത്യമായിക്കഴിഞ്ഞുവെന്നും വെള്ളാപ്പള്ളി കോട്ടയത്ത് നടന്ന എസ്.എന്‍.ഡി.പി യോഗം നേതൃയോഗത്തിലെ സംസാരത്തിനിടെ പ്രതികരിച്ചു. 

കേരളത്തില്‍ മുസ്‌ലിം സമുദായം ഭൂരിപക്ഷമാകുമെന്ന് വി.എസ്.അച്യുതാനന്ദന്‍ മുമ്പ് പറഞ്ഞിട്ടുണ്ട്. കേരളത്തില്‍ മറ്റിടങ്ങളില്‍ നിയമസഭാ മണ്ഡലങ്ങള്‍ കുറഞ്ഞപ്പോള്‍ മലപ്പുറത്ത് സീറ്റ് കൂടിയെന്നും വെള്ളാപ്പള്ളി പറഞ്ഞു. പൊന്നു പെങ്ങന്‍മാരെ പ്രൊഡക്ഷന്‍ കുറക്കല്ലേയെന്നും വെള്ളാപ്പള്ളി സമ്മേളനത്തിന് എത്തിയവരോടായി പറഞ്ഞിരുന്നു.

SNDP General Secretary Vellappally Natesan has stirred controversy again with communal statements referencing Kanthapuram and the Muslim community during a public event in Kochi. His remarks, made during a felicitation ceremony, have drawn widespread attention and criticism.