മുംബൈ: പഹല്‍ഗാം ഭീകരാക്രമണത്തില്‍ കേന്ദ്ര സര്‍ക്കാരിനെതിരെ രൂക്ഷപ്രതികരണവുമായി ശിവസേന യുബിടി നേതാവ് ഉദ്ധവ് താക്കറെ. കശ്മീരിന്റെ പ്രത്യേക പദവി റദ്ദാക്കി അവിടെ എല്ലാം ശാന്തമായെന്ന് അവകാശവാദങ്ങള്‍ നിരത്തുന്നതിനിടെ എങ്ങനെയാണ് ഭീകരാക്രമണം നടന്നതെന്ന് ഉദ്ധവ് ചോദിച്ചു. എന്തുകൊണ്ടാണ് പ്രദേശത്തെ സുരക്ഷ അവഗണിച്ചതെന്നും പാര്‍ട്ടി മുഖപത്രമായ സാമ്‌നയില്‍ നല്‍കിയ അഭിമുഖത്തില്‍ ഉദ്ധവ് ചോദിച്ചു. 

നമ്മുടെ അമ്മമാരും സഹോദരിമാരുമായ 26 പേരുടെ സിന്ദൂരം തുടച്ചുമാറ്റിയതിന് ആരാണ് ഉത്തരവാദി? ആക്രമണം നടത്തിയ ഭീകരവാദികളെ എന്തുകൊണ്ട് ഇതുവരെ പിടിക്കാനായില്ല. ഇന്ത്യ-പാക് യുദ്ധ സാധ്യത താനിടപ്പെട്ട് ഇല്ലാതാക്കിയതെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് 27 തവണയാണ് ആവര്‍ത്തിച്ചത്. എന്നിട്ടും 56 ഇഞ്ച് നെഞ്ചളവുള്ള പ്രധാനമന്ത്രി എന്തുകൊണ്ടാണ് മൗനം പാലിക്കുന്നതെന്നും ഉദ്ധവ് താക്കറെ ചോദിച്ചു. മാത്രമല്ല ഓപ്പറേഷന്‍ സിന്ദൂരില്‍ സൈനികരുടെ വീര്യത്തെ രാഷ്ട്രീയവത്കരിക്കാന്‍ ശ്രമിച്ചെന്നും, ദേശസുരക്ഷയേക്കാള്‍ രാഷ്ട്രീയത്തിനും നയങ്ങള്‍ക്കുമാണ് കേന്ദ്രസര്‍ക്കാര്‍ വിലകല്‍പ്പിക്കുന്നതെന്നും ഉദ്ധവ് ആരോപിച്ചു.

ALSO READ: പത്തൊന്‍പതാം നൂറ്റാണ്ടിനെ വെല്ലുന്ന ഭ്രാന്താലയമായി കേരളം മാറുന്നു; ചെറുക്കേണ്ടവര്‍ വിദ്വേഷത്തിന് വാഴ്ത്തുപാട്ടുകള്‍ പാടുന്നു; വെള്ളാപ്പള്ളിയുടെ വര്‍ഗീയ പരാമര്‍ശത്തില്‍ പ്രതികരിച്ച് ഗീവര്‍ഗീസ് കൂറിലോസ്