കൊല്ലം: ഷാർജയിൽ ഫ്ലാറ്റിനുള്ളിൽ മരിച്ച നിലയിൽ കണ്ടെത്തിയ കൊല്ലം സ്വദേശി അതുല്യയ്ക്ക് ഭർത്താവ് സതീഷിൽ നിന്ന് നേരിടേണ്ടി വന്നത് ക്രൂര പീഡനമെന്ന് വെളിപ്പെടുത്തൽ. അതുല്യ മരിക്കുന്നതിന് മുൻപ് സുഹൃത്തിനയച്ച സന്ദേശത്തിലാണ് സതീഷിന്റെ ക്രൂരതകൾ തുറന്നുപറയുന്നത്. തന്നെ അയാൾ ചവിട്ടി കൂട്ടി, ജീവിക്കാൻ പറ്റുന്നില്ലെന്നും സുഹൃത്തിനയച്ച സന്ദേശത്തിൽ പറയുന്നു. ആത്മഹത്യ ചെയ്യാൻ ധൈര്യമില്ലാത്തത് കൊണ്ട് ചെയ്യാനാകുന്നില്ലെന്നും അതുല്യ ഫോൺ സന്ദേശത്തിൽ പറയുന്നു. എന്നാൽ പിന്നീട് അതുല്യയെ മരിച്ച നിലയിൽ കണ്ടെത്തുകയായിരുന്നു.

'താഴെക്കിടക്കുമ്പോൾ ചവിട്ടിക്കൂട്ടി. സഹിക്കാൻ വയ്യ. അനങ്ങാൻ വയ്യ, വയറിലെല്ലാം ചവിട്ടി, ഇത്രയെല്ലാം കാണിച്ചിട്ടും അയാളുടെ കൂടെ നിൽക്കേണ്ട അവസ്ഥയാണ്. പറ്റുന്നില്ലെടീ, ആത്മഹത്യ ചെയ്യാൻ പോലുമുള്ള ധൈര്യം എനിക്കില്ല'. കരഞ്ഞുകൊണ്ട് ശബ്ദ സന്ദേശത്തിൽ അതുല്യ പറയുന്നു. ഈ സന്ദേശമടക്കമുള്ള ഡിജിറ്റൽ തെളിവുകൾ കുടുംബം പൊലിസിന് കൈമാറി.

ALSO READ: ഷോക്കേറ്റ് കേരളം; ഒരുവർഷത്തിനിടെ ജീവൻ നഷ്ടമായത് 241 പേർക്ക്

അതുല്യയുടെ കല്യാണത്തിനുശേഷം വൈകാതെ പ്രശ്നങ്ങൾ ആരംഭിച്ചിരുന്നുവെന്നും സതീഷിൻറെ ഭാഗത്ത് നിന്ന് ക്രൂരപീഡനം നേരിടേണ്ടി വന്നെന്നും, ആ ദുരനുഭവങ്ങൾ തന്നോട് അതുല്യ പറഞ്ഞിട്ടുണ്ടെന്നും അതുല്യയുടെ സുഹൃത്ത് വെളിപ്പെടുത്തുന്നു. വിവാഹം കഴിഞ്ഞതുമുതൽ പ്രശ്നമുണ്ടായിരുന്നുവെന്നും ഇവർ വ്യക്തമാക്കി.

അതേസമയം, അതുല്യ ഒരിക്കലും ആത്മഹത്യ ചെയ്യില്ലെന്നും സതീഷ് ക്രൂരമായി പീഡിപ്പിച്ച കൊലപ്പെടുത്തിയതാകുമെന്നും അതുല്യയുടെ അയൽക്കാരി ബേബി പറഞ്ഞു. അവസാനം നാട്ടിൽ വന്നപ്പോഴും ഏറ്റ ക്രൂര ഉപദ്രവങ്ങളെക്കുറിച്ച് അതുല്യ തന്നോട് പറഞ്ഞതായും ബേബി മാധ്യമങ്ങളോട് പറഞ്ഞു. കടുത്ത മദ്യപാനിയാണ് സതീഷ്. ബന്ധം ഉപേക്ഷിക്കാൻ നിരവധി തവണ അതുല്യയോട് പറഞ്ഞിരുന്നതായും അവർ അറിയിച്ചു. ഓരോ തവണ പ്രശ്നമുണ്ടാക്കുമ്പോഴും സതീഷ് അതുല്യയുടെ കാലിൽ വീണ് മാപ്പ് പറഞ്ഞ് കൂട്ടിക്കൊണ്ടുപോകുമെന്നും അവർ പറയുന്നു.

ALSO READ: അതുല്യയുടെ മരണത്തിന് പിന്നിൽ ഭർത്താവിന്റെ ക്രൂരത: തെളിവായി ചിത്രങ്ങളും, വീഡിയോയും; പരാതിയുമായി കുടുംബം

ഇന്നലെയാണ് ഷാർജ റോളപാർക്കിന് സമീപത്തെ ഫ്ലാറ്റിൽ അതുല്യയെ മരിച്ച നിലയിൽ കണ്ടത്. വീട്ടുകാരുടെ പരാതിയിൽ സതീശിനെതിരെ പൊലിസ് കേസെടുത്തിട്ടുണ്ട്.