റിയാദ്: സഊദി അറേബ്യയിലെ വിവിധ പ്രദേശങ്ങളില്‍ അസ്ഥിരമായ കാലാവസ്ഥ തുടരുമെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നല്‍കി. പൊടിയും മണലും വഹിക്കുന്ന ശക്തമായ കാറ്റ് ദൃശ്യപരത കുറയ്ക്കുകയും തെക്കുപടിഞ്ഞാറന്‍ മേഖലകളില്‍ ഇടിമിന്നല്‍ ഭീഷണി ഉയര്‍ത്തുകയും ചെയ്യുമെന്നാണ് മുന്നറിയിപ്പ്.

ALSO READ: ഇരുപതു വര്‍ഷമായി അബോധാവസ്ഥയില്‍ ചികിത്സയിൽ കഴിഞ്ഞ സഊദി രാജകുമാരൻ അല്‍വലീദ് ബിൻ ത്വലാൽ അന്തരിച്ചു

മദീന, മക്ക, കിഴക്കന്‍ പ്രവിശ്യ, റിയാദ്, നജ്‌റാന്‍ എന്നിവിടങ്ങളില്‍ ശക്തമായ കാറ്റിന് സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു. പ്രത്യേകിച്ച് ജസാനിലേക്കുള്ള തീരദേശ ഹൈവേയില്‍ പൊടിപടലങ്ങള്‍ ദൃശ്യപരത പൂജ്യത്തിനടുത്തേക്ക് കുറയ്ക്കുമെന്നാണ് പ്രതീക്ഷിക്കുന്നത്. ജാസാന്‍, അസീര്‍ എന്നിവിടങ്ങളുടെ തെക്കുപടിഞ്ഞാറന്‍ മേഖലകളിലും അല്‍ ബഹയുടെ ഉയര്‍ന്ന പ്രദേശങ്ങളിലും ഇടിമിന്നലോടുകൂടിയ മഴയ്ക്കും ശക്തമായ കാറ്റിനും സാധ്യതയുണ്ട്. 

ചെങ്കടലിനു മുകളില്‍ ഉപരിതല കാറ്റ് മണിക്കൂറില്‍ 15 മുതല്‍ 40 കിലോമീറ്റര്‍ വരെ വേഗതയിലും, തെക്കന്‍ ഭാഗങ്ങളില്‍ 25 മുതല്‍ 50 കിലോമീറ്റര്‍ വരെ വേഗതയിലും വീശും. തിരമാലകള്‍ 2.5 മീറ്റര്‍ വരെ ഉയരാന്‍ സാധ്യതയുണ്ട്.

ALSO READ: ആവര്‍ത്തിച്ചുള്ള ഇസ്‌റാഈല്‍ ആക്രമണങ്ങളെ അപലപിച്ചു; സിറിയയ്ക്ക് പിന്തുണ പ്രഖ്യാപിച്ച് അറബ് രാജ്യങ്ങള്‍ സംയുക്ത പ്രസ്താവന ഇറക്കി

അറേബ്യന്‍ ഗള്‍ഫിനു മുകളില്‍, വടക്കും മധ്യ പ്രദേശങ്ങളില്‍ പടിഞ്ഞാറ് മുതല്‍ വടക്കുപടിഞ്ഞാറോട്ട് മണിക്കൂറില്‍ 15 മുതല്‍ 40 കിലോമീറ്റര്‍ വേഗതയിലും, തെക്ക് കിഴക്ക് മുതല്‍ വടക്കുകിഴക്കോട്ട് 10 മുതല്‍ 25 കിലോമീറ്റര്‍ വേഗതയിലും കാറ്റ് വീശും. തിരമാലകളുടെ ഉയരം വടക്കും മധ്യത്തിലും 0.5 മുതല്‍ 1.5 മീറ്റര്‍ വരെയും, തെക്ക് ഒരു മീറ്റര്‍ വരെയും ഉയരാന്‍ സാധ്യതയുണ്ട്.

താമസക്കാര്‍ ജാഗ്രത പാലിക്കണമെന്നും യാത്രക്കാര്‍ സുരക്ഷാ മുന്‍കരുതലുകള്‍ സ്വീകരിക്കണമെന്നും അധികൃതര്‍ മുന്നറിയിപ്പ് നല്‍കിയിട്ടുണ്ട്.

Strong dust storms and thunderstorms are likely to hit many regions across Saudi Arabia in the coming days. Authorities urge residents to stay indoors and stay updated on the latest weather alerts. Find out which areas are most affected and how to stay safe during these extreme weather conditions.