കൽപ്പറ്റ: വയനാട് ജില്ലയിൽ വിനോദ സഞ്ചാര കേന്ദ്രങ്ങളിൽ ഏർപ്പെടുത്തിയ നിരോധനം പിൻവലിച്ചു. ശക്തമായ മഴ കുറഞ്ഞതിനെ തുടർന്ന് മഴ മുന്നറിയിപ്പിൽ മാറ്റം വന്നതിനെ തുടർന്നാണ് നടപടി. അതേസമയം, ജില്ലയിലെ മുഴുവൻ ടൂറിസ്റ്റ് കേന്ദ്രങ്ങളും തുറന്നു നൽകിയിട്ടില്ല. കുറുവ ദ്വീപ്, സൂചിപ്പാറ, കാന്തൻപാറ, തൊള്ളായിരം കണ്ടി, ചെമ്പ്ര, മീൻമുട്ടി, നീലിമല വ്യൂ പോയിൻ്റ് എന്നിവ ഒഴികെയുള്ളവയാണ് തുറക്കാൻ കളക്ടർ ഡി.ആർ മേഘശ്രീ അനുമതി നൽകിയത്. മറ്റെല്ലാ വിനോദ സഞ്ചാര കേന്ദ്രങ്ങളും അഡ്വഞ്ചർ ടൂറിസം കേന്ദ്രങ്ങളും തുറന്നു പ്രവർത്തിക്കുന്നതിനുള്ള അനുമതി നൽകിയിട്ടുണ്ട്.

കഴിഞ്ഞ വർഷം ഉരുൾപൊട്ടൽ ഉണ്ടായ മുണ്ടക്കൈ, ചൂരൽമല പ്രദേശത്തേക്കുള്ള പ്രവേശന നിരോധനവും പിൻവലിച്ചതായി ജില്ലാ ദുരന്ത നിവാരണ അതോറിറ്റി ചെയർമാൻ കൂടിയായ ജില്ലാ കളക്ടർ അറിയിച്ചു. മേപ്പാടി ഗ്രാമ പഞ്ചായത്തിലെ 10,11,12 വാർഡുകൾ ഉൾപ്പെടുന്ന പ്രദേശങ്ങളിലെ നോ ഗോ സോൺ പ്രദേശങ്ങളിലേയ്ക്കുള്ള പ്രവേശനത്തിനായിരുന്നു (പ്ലാൻ്റേഷൻ തൊഴിലാളികൾ ഉൾപ്പടെയുള്ളവരുടെ) നിയന്ത്രണം ഏർപ്പെടുത്തിയിരുന്നത്. ജോലിയ്ക്ക് പോകുന്ന തൊഴിലാളികൾ അടിയന്തര സാഹചര്യങ്ങളിൽ മേപ്പാടി ഗ്രാമ പഞ്ചായത്ത് സെക്രട്ടറിയുടെയും വെള്ളരിമല വില്ലേജ് ഓഫീസറുടെയും നിർദേശങ്ങളനുസരിച്ച് സുരക്ഷിത സ്ഥാനങ്ങളിൽ നിൽക്കേണ്ടതാണെന്നും ജില്ലാ കളക്ടർ അറിയിച്ചു.

അതേസമയം, ജില്ലയിലെ ക്വാറികളുടെയും യന്ത്ര സഹായത്തോടെയുള്ള മണ്ണ് നീക്കത്തിനുമുള്ള നിയന്ത്രണം തുടരുന്നതാണ്.

The district administration in Wayanad has partially lifted the ban on tourism activities following a reduction in heavy rainfall and a revision in weather alerts. However, not all tourist spots have been reopened.