തൃപ്പൂണിത്തുറ: കാനഡയിൽ പരിശീലന പറക്കലിനിടെ വിമാനങ്ങൾ കൂട്ടിയിടിച്ച് അപകടത്തിൽപ്പെട്ട് മരിച്ച തൃപ്പൂണിത്തുറ സ്വദേശി ശ്രീഹരി സുകേഷിന്റെ (23) മൃതദേഹം ജൂലൈ 26 ശനിയാഴ്ച നാട്ടിലെത്തിക്കും. ആവശ്യമായ എല്ലാ രേഖകളും സമർപ്പിച്ച് എൻ.ഒ.സി. (നോ ഒബ്ജക്ഷൻ സർട്ടിഫിക്കറ്റ്) നടപടികൾ പൂർത്തിയാക്കിയതായി ടൊറന്റോയിലെ ഇന്ത്യൻ കോൺസുലേറ്റ് ജനറൽ ഗിരീഷ് ജുനേജ സംസ്ഥാന സർക്കാരിന്റെ ഡൽഹിയിലെ പ്രത്യേക പ്രതിനിധി പ്രൊഫ. കെ.വി. തോമസിനെ അറിയിച്ചു.

മൃതദേഹം ജൂലൈ 24-ന് ടൊറന്റോയിൽ നിന്ന് എയർ ഇന്ത്യയുടെ എ.ഐ. 188 വിമാനത്തിൽ ഇന്ത്യയിലേക്ക് കൊണ്ടുവരും. ജൂലൈ 25-ന് ഉച്ചയ്ക്ക് 2:40-ന് മൃതദേഹം ഡൽഹി വിമാനത്താവളത്തിലെത്തും. തുടർന്ന്, ജൂലൈ 26-ന് രാവിലെ 8:10-ന് എ.ഐ. 833 എയർ ഇന്ത്യ വിമാനത്തിൽ ഡൽഹിയിൽ നിന്ന് കൊച്ചിയിലേക്ക് മൃതദേഹം എത്തിക്കും. 

ജൂലൈ 8-നാണ് കാനഡയിലെ മാനിറ്റോബ പ്രവിശ്യയിലെ സ്റ്റൈൻബാക്ക് സൗത്ത് എയർപോർട്ടിന് സമീപം പരിശീലന പറക്കലിനിടെ ഉണ്ടായ വിമാനാപകടത്തിൽ ശ്രീഹരി മരണപ്പെട്ടത്. അപകടത്തിൽ കാനഡ സ്വദേശിയും സഹപാഠിയായിരുന്ന സാവന്ന മെയ് റോയ്‌സും (20) മരിച്ചിരുന്നു. ഹാർവ്‌സ് എയർ പൈലറ്റ് സ്കൂളിലെ പൈലറ്റ് വിദ്യാർഥിയായിരുന്ന ശ്രീഹരിയും സാവന്നയും.  ടേക്ക് ഓഫ്, ലാൻഡിംഗ് പരിശീലനത്തിനിടെ ഒരേ റൺവേയിലേക്ക് ഇരുവരുടെയും ചെറു വിമാനങ്ങൾ പറന്നിറങ്ങാൻ ശ്രമിക്കവേ കൂട്ടിയിടിക്കുകയായിരുന്നു. 2024 നവംബറിലാണ് അവസാനമായി ശ്രീഹരി നാട്ടിലെത്തിയത്. ഈ വർഷം ഫെബ്രുവരി ആദ്യവാരം കാനഡയിലേക്ക് മടങ്ങിയിരുന്നു

The body of Srihari Sukesh, a Malayali pilot student killed in a plane crash during training in Manitoba, Canada, will arrive in Kochi on Saturday, July 26