തൃശൂര്‍: പിതാവിന്റെ മൃതദേഹം വീടിനകത്തേക്ക് കയറ്റാന്‍ അനുവദിക്കാതെ മകനും മരുമകളും വീട് പൂട്ടിപ്പോയി. അരിമ്പൂര്‍ കൈപ്പിള്ളി പ്ലാക്കന്‍ തോമസിനാണ് ഈ ദുര്യോഗം നേരിടേണ്ടി വന്നത്. അനാഥാലയത്തിലായിരുന്നു തോമസും ഭാര്യ റോസിലിയും താമസിച്ചിരുന്നത്. മറ്റൊരു അനാഥാലയത്തിലായിരുന്നു തോമസിന്റെ ഭാര്യ റോസിലി.

ALSO READ: തദ്ദേശ തിരഞ്ഞെടുപ്പിനുള്ള കരട് വോട്ടര്‍ പട്ടിക പ്രസിദ്ധീകരിച്ച് സംസ്ഥാന തിരഞ്ഞെടുപ്പ് കമ്മീഷന്‍

പനി ബാധിച്ച് ഇന്നലെ പുലര്‍ച്ചെയാണ് തോമസ് മരിച്ചത്. മണലൂര്‍ സാന്‍ജോസ് കെയര്‍ഹോമില്‍വെച്ചാണ് തോമസ് മരണമടഞ്ഞത്. തോമസിന്റെ മൃതദേഹം കൊണ്ടുവന്നതിനു പിന്നാലെ കാരമുക്ക് കൃപാസദനത്തില്‍ നിന്ന് റോസിലിയെയും കൊണ്ടുവന്നു. പിതാവിന്റെ മൃതദേഹം വീട്ടിലേക്ക് കൊണ്ടുവന്നതറിഞ്ഞ് മകന്‍ ജെയ്‌സണും മരുമകള്‍ റിന്‍സിയും വീടുപൂട്ടി പോയെന്ന് അയല്‍വാസികള്‍ പറഞ്ഞു.

തിരിച്ചുവന്ന് വീട് തുറന്ന് മൃതദേഹം അകത്തുകയറ്റാന്‍ കുടുംബവുമായി വളരെ അടുപ്പമുള്ള പലരും പറഞ്ഞെങ്കിലും ഇയാള്‍ അതിന് തയ്യാറായില്ല. ഇതിനുപിന്നാലെ പഞ്ചായത്ത് അധികൃതരും പൊലിസും ഇയാളെ പലതവണ ബന്ധപ്പെടാന്‍ ശ്രമിച്ചെങ്കിലും കഴിഞ്ഞില്ല. പുറത്താക്കിയ വീട്ടിലേക്ക് തങ്ങള്‍ക്ക് പ്രവേശിക്കേണ്ടെന്ന് റോസിലി തീരുമാനിച്ചതോടെ തോമസിന്റെ മൃതദേഹം മുറ്റത്ത് തന്നെ കിടത്തുകയായിരുന്നു എന്ന് അയല്‍വാസികള്‍ പറഞ്ഞു.

ALSO READ: പഴുത്ത ചക്ക കൊടുത്ത പണി; മദ്യം കഴിക്കാതെ ബ്രെത്ത്അനലൈസറിൽ കുടുങ്ങി കെഎസ്ആർടിസി ഡ്രൈവർമാർ

വൈകീട്ട് എറഴ് സെന്റ് തെരേസാസ് കപ്പല്‍ പള്ളിയില്‍ തോമസിന്റെ മൃതദേഹം അടക്കം ചെയ്യുന്നതുവരെ വീട് അടഞ്ഞുകിടക്കുകയായിരുന്നു.  ജോയ്‌സി ആണ് തോമസിന്റെയും റോസിലിയുടെയും മകള്‍. മരുമകളുടെയും മകന്റെയും ഉപദ്രവം താങ്ങാനാകുന്നില്ലെന്ന് കാട്ടി എട്ട് മാസം മുമ്പ് അന്തിക്കാട് പൊലിസില്‍ പരാതി നല്‍കിയതിന് ശേഷമാണ് തോമസും റോസിലിയും വ്യത്യസ്ത സ്ഥാപനങ്ങളില്‍ അഭയം തേയിയത്.