തിരുവനന്തപുരം: ഈ വര്‍ഷം നടക്കാനിരിക്കുന്ന തദ്ദേശ തിരഞ്ഞെടുപ്പിനുള്ള കരട് പ്രസിദ്ധീകരിച്ച് സംസ്ഥാന തിരഞ്ഞെടുപ്പ് കമ്മീഷന്‍. 1,034 തദ്ദേശ സ്ഥാപനങ്ങളിലെ 20,998 വാര്‍ഡുകളിലായി ആകെ 2,66,78,256 വോട്ടര്‍മാരാണ് പട്ടികയില്‍ ഉള്ളത്. 1,26,32,186 പുരുഷന്മാരും 1,40,45,837 സ്ത്രീകളും 233 ട്രാന്‍സ്‌ജെന്‍ഡര്‍മാരുമാണ് പട്ടികയില്‍ ഉള്ളത്. അന്തിമ വോട്ടര്‍ പട്ടിക അടുത്ത മാസം 30ന് പ്രസിദ്ധീകരിക്കുമെന്ന് സംസ്ഥാന തിരഞ്ഞെടുപ്പ് കമ്മീഷണര്‍ എ. ഷാജഹാന്‍ വ്യക്തമാക്കി.

ALSO READ: പഴുത്ത ചക്ക കൊടുത്ത പണി; മദ്യം കഴിക്കാതെ ബ്രെത്ത്അനലൈസറിൽ കുടുങ്ങി കെഎസ്ആർടിസി ഡ്രൈവർമാർ

2020ലെ പൊതുതിരഞ്ഞെടുപ്പിന് ശേഷം 2023ലും 2024 ഒക്ടോബറിലും വോട്ടര്‍പട്ടിക പുതുക്കിയിരുന്നു. 2023ലെ വോട്ടര്‍പട്ടികയില്‍ 2,76,70,536 പേരും അന്തമിപട്ടികയില്‍ 2,68,51,023 വോട്ടര്‍മാരുമാണ് ഉണ്ടായിരുന്നത്. 2024 ജൂലൈയിലെ വോട്ടര്‍പട്ടികയില്‍ 2,68,57,023 പേരാണ് ഉണ്ടായിരുന്നത്. അന്തിമപട്ടികയില്‍ ഇത് 2,66,72,979 ആയിരുന്നു. ഇപ്പോള്‍ പ്രസിദ്ധീകരിച്ച പട്ടികയില്‍ 5277 വോട്ടര്‍മാര്‍ കൂടുതലുണ്ട്. 

സംസ്ഥാന തിരഞ്ഞെടുപ്പ് കമ്മീഷന്‍ പ്രസിദ്ധീകരിച്ച കരട് വോട്ടര്‍ പട്ടിക എല്ലാ തദ്ദേശ സ്ഥാപനങ്ങളിലും വില്ലേജ്, താലൂക്ക് ഓഫീസുകളിലും കമ്മീഷന്റെ sec.kerala.gov.in വെബ്‌സൈറ്റിലും ലഭ്യമാകും. ആഗസ്റ്റ് 7വരെ വോട്ടര്‍പട്ടികയില്‍ പേരു ചേര്‍ക്കാന്‍ അവസരമുണ്ടാകും.

ALSO READ: വൻ തട്ടിപ്പിന് പിന്നിൽ സൈബർ പൊലിസ് ഉദ്യോഗസ്ഥൻ; കോടികൾ തട്ടിയ ശേഷം കാമുകിയുമായി ഒളിവിൽ പോയ ഉദ്യോഗസ്ഥൻ 4 മാസം കഴിഞ്ഞ് പിടിയിൽ

2025 ജനുവരി 1നോ അതിന് മുമ്പോ 18 വയസ്സായവര്‍ക്ക് പേര് ചേര്‍ക്കാം.പേര് ചേര്‍ക്കല്‍, ഉള്‍ക്കുറിപ്പ് തിരുത്തല്‍ തുടങ്ങിയ വിവിധ ആവശ്യങ്ങള്‍ക്ക് വെബ്‌സൈറ്റിലൂടെ ഓണ്‍ലൈനായി അപേക്ഷിക്കണം.