തിരുവനന്തപുരം: വയറുവേദനയുമായി ആശുപത്രിയിലെത്തിയ യുവതിയുടെ വയറ്റില്‍ നിന്ന് കണ്ടെടുത്തത് 41 റബര്‍ ബാന്‍ഡുകള്‍. പാറശ്ശാലയിലെ സരസ്വതി ആശുപത്രിയില്‍ നടത്തിയ ശസ്ത്രക്രിയയിലാണ് പാറശാല സ്വദേശിനിയായ യുവതിയുടെ വയറ്റില്‍ നിന്ന് റബര്‍ ബാന്‍ഡുകള്‍ പുറത്തെടുത്തത്. ഇവര്‍ക്ക് 40 വയസുണ്ട്. 

വയറുവേദനയെത്തുടര്‍ന്ന് ഇവര്‍ വിവിധ ആശുപത്രിയില്‍ ചികിത്സതേടിയെങ്കിലും മാറ്റമൊന്നും ഉണ്ടായിരുന്നില്ല. ഇതിനെ തുടര്‍ന്ന് നാലുദിവസം മുന്‍പാണ് ഇവര്‍ പാറശ്ശാല സരസ്വതി ആശുപത്രിയില്‍ ചികിത്സയ്‌ക്കെത്തിയത്. സ്‌കാനിങ്ങില്‍ കണ്ടത് ചെറുകുടലിലെ തടസമാണ് വയറുവേദനയ്ക്ക് കാരണമെന്നാണ്. സ്‌കാനിങ്ങില്‍ ചെറുകുടലില്‍ മുഴയും തടസവും ശ്രദ്ധയില്‍പ്പെടുകയും ചെയ്തു. ചെറുകുടലില്‍ അടിഞ്ഞുകിടക്കുന്ന നിലയിലായിരുന്നു റബര്‍ ബാന്‍ഡുകള്‍ ഉണ്ടായിരുന്നത്.

തുടര്‍ന്ന് രോഗിയെ അടിയന്തര ശസ്ത്രക്രിയയ്ക്കു വിധേയമാക്കുകയായിരുന്നു. സ്വകാര്യ സ്ഥാപനത്തില്‍ ജോലിചെയ്യുന്ന ഇവര്‍ക്ക് റബര്‍ബാന്‍ഡ് വായിലിട്ട് ചവയ്ക്കുന്ന ശീലം ഉണ്ടായിരുന്നതായി ബന്ധുക്കള്‍ പറഞ്ഞുവെന്ന് ആശുപത്രി അധികൃതര്‍ അറിയിച്ചു. സ്വന്തം തലമുടിപോലുള്ള ഭക്ഷയോഗ്യമല്ലാത്ത സാധനങ്ങള്‍ കഴിക്കുന്ന മാനസിക വൈകല്യങ്ങളുള്ള ആളുകളില്‍ ഇത്തരം അവസ്ഥകള്‍ ധാരാളം റിപോര്‍ട്ട് ചെയ്തിട്ടുണ്ടെങ്കിലും ഇത്രയും റബര്‍ബാന്‍ഡ് വിഴുങ്ങി ഇത്തരം അവസ്ഥയുണ്ടാകുന്നത് വളരെ അപൂര്‍വമാണെന്നും ആശുപത്രി അധികൃതരും പറഞ്ഞു.