ലോകത്തിലെ വിമാന സര്‍വീസുകളുടെ എണ്ണത്തില്‍ വലിയ വര്‍ധനവാണ് കുറച്ചുകാലങ്ങളായി ഉണ്ടായിട്ടുള്ളത്. യൂറോപ്പ്, അമേരിക്കന്‍ വന്‍കരകളില്‍ മാത്രമല്ല, ലോകം മുഴുവനും ഈ വര്‍ധന് കാണാന്‍ കഴിയും. അതുപോലെ സമീപ വര്‍ഷങ്ങളില്‍ വിമാന ദുരന്തങ്ങളും വര്‍ധിച്ചുവരുന്നത് ആശങ്ക കൂട്ടുന്നു.

മാസത്തില്‍ തന്നെ ചെറുതും വലുതുമായ ഒന്നോ രണ്ടോ വിമാനാപകടങ്ങളും റിപോര്‍ട്ട് ചെയ്യപ്പെടുന്നുണ്ട്. ഇതിനിടെ കഴിഞ്ഞ ദിവസവും മെക്‌സിക്കോയില്‍ നൂറുകണക്കിന് മനുഷ്യരുടെ ജീവന്‍ തലനാരിഴയ്ക്ക് രക്ഷപ്പെട്ട ഒരു സംഭവം റിപോര്‍ട്ട് ചെയ്യപ്പെട്ടിരുന്നു. ഒരു വിമാനം പറന്നുയരാനായി റണ്‍വേയിലൂടെ മുന്നോട്ട് നീങ്ങുങ്ങുകയാണ്, അതിന്റെ തൊട്ട് മുകളിലൂടെ പറന്ന് വന്ന മറ്റൊരു വിമാനം അതേ റണ്‍വേയില്‍ ലാന്‍ഡ് ചെയ്യുകയുമാണ്. ഒരു നിമിഷത്തിന്റെ വ്യത്യാസത്തില്‍ ജീവന്‍ രക്ഷപ്പെട്ടത് നൂറുകണക്ക് മനുഷ്യര്‍ക്കാണ്.

മെക്‌സിക്കോ സിറ്റിയിലെ ബെനിറ്റോ ജുവാരസ് വിമാനത്താവളത്തിലായിരുന്നു സംഭവം നടന്നത്. 144 യാത്രക്കാരും ആറ് ജീവനക്കാരുമായി പറന്നുയരാനായി ഡെല്‍റ്റ എയര്‍ ലൈന്‍സിന്റെ ബോയിങ് 590, എയറോപ്യൂര്‍ട്ടോ ഇന്റര്‍നാഷണല്‍ ബെനിറ്റോ ജുവാരസിന്റെ റണ്‍വേയിലൂടെ മുന്നോട്ട് നീങ്ങുന്നതിനിടെയാണ് പിന്നില്‍ നിന്നും അതേ റണ്‍വേയിലേക്ക് ഒരു എയറോമെക്‌സിക്കോ റീജിയണല്‍ ജെറ്റ് പറന്നിറങ്ങാന്‍ എത്തിയത്.

ഈ സമയം രണ്ടു വിമാനങ്ങളും തമ്മില്‍ വെറും 200 അടിയുടെ വ്യത്യാസം മാത്രമാണ് ഉണ്ടായിരുന്നതെന്നുമാണ് റിപോര്‍ട്ടുകള്‍. ഫ്‌ളൈറ്റ് ട്രാക്കിങ് വെബ്‌സൈറ്റായ ഫ്‌ളൈറ്റ്‌റഡാര്‍ 24റിന്റെ ഏവിയേഷന്‍ റഡാര്‍ വ്യൂവില്‍ ചിത്രീകരിച്ച ഒരു വിഡിയോയിലൂടെ സംഭവത്തിന്റെ ഒരു റെന്‍ഡറിങ് കാണിച്ചു. എംബ്രയര്‍ 190 റീജിയണല്‍ ജെറ്റായ എയ്‌റോമെക്‌സിക്കോ കണക്റ്റ് ഫ്‌ളൈറ്റ് 1631, മുന്നോട്ട് നീങ്ങുകയായിരുന്ന ഡെല്‍റ്റ വിമാനത്തിന് 200 അടി മാത്രം വ്യത്യാസത്തില്‍ പറന്നിറങ്ങി റണ്‍വേ 5ലൂടെ മുന്നോട്ട് പോകുന്നത് കാണാം.

പറന്നുയരാന്‍ പോകുന്നതിനിടെ മറ്റൊരു വിമാനം തൊട്ട് മുന്നില്‍ ലാന്‍ഡ് ചെയ്തതിന് പിന്നാലെ ഡെല്‍റ്റ എയര്‍ ലൈന്‍സിന്റെ പൈലറ്റുമാര്‍ ടേക്ക് ഓഫ് അവസാനിപ്പിക്കുകയും വിമാനം വീണ്ടും ടെര്‍മിനലിലേക്ക് മാറ്റുകയും ചെയ്തു. പിന്നീട് മൂന്ന് മണിക്കൂറുകള്‍ക്ക് ശേഷമാണ് ഈ വിമാനം വീണ്ടും പറന്നുയര്‍ന്നത്. സംഭവത്തെ കുറിച്ച് വിശദമായ അന്വേഷണം നടത്തുമെന്നാണ് വിമാനത്താവള അധികൃതര്‍ അറിയിച്ചിരിക്കുന്നത്.