കൊച്ചി: കേരളത്തിലെ സിനിമ നിർമാതാക്കളുടെ സംഘടനായ ഫിലിം പ്രൊഡ്യൂസേഴ്‌സ് അസോസിയേഷൻ പ്രസിഡന്റ് സ്ഥാനത്തേക്ക് മത്സരിക്കാൻ നാമനിർദേശ പത്രികയുമായി സിനിമ നടിയും നിർമാതാവുമായ സാന്ദ്ര തോമസ്. പർദ്ദ ധരിച്ചാണ് സാന്ദ്ര തോമസ് പത്രിക സമർപ്പിക്കാൻ എത്തിയത്. സ്ത്രീത്വത്തെ അപമാനിക്കുന്ന സംഘടന നേതാക്കൾക്കെതിരെയുള്ള പ്രതിഷേധത്തിന്റെ സൂചകമായാണ് പർദ്ദ ധരിച്ചെത്തിയതെന്ന് സാന്ദ്ര പറഞ്ഞു.

ലൈംഗികാധിക്ഷേപത്തിനെതിരെയുള്ള പ്രതിഷേധമാണ് ഇത്തരമൊരു വസ്ത്രം ധരിച്ചതിന് പിന്നിലെന്നും സാന്ദ്ര തോമസ് പറഞ്ഞു. സ്ത്രീകൾക്ക് ധരിക്കാവുന്ന ഉചിതമായ വസ്ത്രമാണ് പർദ്ദ. പ്രൊഡ്യൂസേഴ്‌സ് അസോസിയേഷൻ പോലുള്ള ഇടങ്ങളിലേക്ക് വരാൻ ഏറ്റവും സുരക്ഷിതം ഇത്തരം വസ്ത്രമാണെന്നും അവർ പറഞ്ഞു. സ്ത്രീത്വത്തെ അപമാനിച്ചെന്ന് ആരോപിച്ച് നിലവിലെ ഭരണസമിതിയിൽപ്പെട്ട പ്രമുഖർക്കെതിരെ സാന്ദ്ര നിയമ നടപടി സ്വീകരിക്കുന്നതിനിടെയാണ് പുതിയ നീക്കം.  

ഫിലിം പ്രൊഡ്യൂസേഴ്‌സ് അസോസിയേഷൻ കയ്യടക്കിയ കുത്തകകളുടെ മാറ്റത്തിന് വേണ്ടിയാണ് തന്റെ മത്സരമെന്നും ഇന്ന് നാമനിർദേശ പത്രിക സമർപ്പിക്കുമെന്നും സാന്ദ്ര അറിയിച്ചു. മുൻപ്, സംഘടനായോഗത്തിൽവെച്ച് തന്നെ അപമാനിച്ചെന്ന് കാണിച്ച് സാന്ദ്രാ തോമസ് സംവിധായകനും ഫെഫ്ക ജനറൽ സെക്രട്ടറിയുമായ ബി.ഉണ്ണിക്കൃഷ്ണനും നിർമാതാവ് ആന്റോ ജോസഫിനും എതിരെ പരാതി നൽകിയിരുന്നു.

ഓഗസ്റ്റ് 14 നാണ് നിർമ്മാതാക്കളുടെ സംഘടനയിലേക്കുള്ള തെരഞ്ഞെടുപ്പ് നടക്കുക. ഓഗസ്റ്റ് രണ്ട് വരെ പത്രിക സമർപ്പിക്കാം.