സഹെദാൻ: ഇറാന്റെ തെക്കുകിഴക്കൻ തലസ്ഥാനമായ സഹെദാനിലെ കോടതി മന്ദിരത്തിന് നേരെ ഇന്ന് നടന്ന ഭീകരാക്രമണത്തിൽ 9 പേർ കൊല്ലപ്പെട്ടു. 22 പേർക്ക് പരുക്കേറ്റു. കൊല്ലപ്പെട്ടവരിൽ 60 വയസ്സുള്ള സ്ത്രീയും പിഞ്ചുകുഞ്ഞും ഉൾപ്പെടുന്നു. പരുക്കേറ്റവരിൽ ഭൂരിഭാഗവും സാധാരണക്കാരാണെന്ന് ജുഡീഷ്യറിയുടെ വാർത്താ ഏജൻസിയായ മിസാൻ ഓൺലൈൻ റിപ്പോർട്ട് ചെയ്തു.

ആക്രമണത്തിന്റെ ഉത്തരവാദിത്തം ജെയ്ഷ് അൽ-അദ്ൽ ബലൂച്  എന്ന സംഘടന ഏറ്റെടുത്തു. സുരക്ഷാസേനയുമായുള്ള ഏറ്റുമുട്ടലിൽ മൂന്ന് ആക്രമണകാരികൾ കൊല്ലപ്പെട്ടതായി സർക്കാർ വാർത്താ ഏജൻസിയായ ഐആർഎൻഎ സ്ഥിരീകരിച്ചു. സ്ഫോടകവസ്തുക്കളും ഗ്രനേഡുകളുമായി സന്ദർശകരുടെ വേഷത്തിൽ കോടതിക്കുള്ളിൽ പ്രവേശിച്ചാണ് ഭീകരർ ആക്രമണം നടത്തിയത്. ജഡ്ജിമാരുടെ ചേംബറിൽ അതിക്രമിച്ച് കയറിയ ആക്രമണകാരികൾ ജുഡീഷ്യറി ജീവനക്കാരെയും സുരക്ഷാ ഉദ്യോഗസ്ഥരെയും ലക്ഷ്യമിട്ടു.

ALSO READ: വിശപ്പിനെ ആയുധമാക്കിമാറ്റി ഇസ്റാഈൽ: ഗസ്സയിലെ പട്ടിണിമരണങ്ങൾ ചിന്തിക്കുന്നതിലും അപ്പുറം

ബലൂച് പൗരന്മാർക്ക് വധശിക്ഷയും വീട് പൊളിക്കാനുള്ള ഉത്തരവുകളും പുറപ്പെടുവിച്ച ജഡ്ജിമാരെയും കോടതി ജീവനക്കാരെയും ലക്ഷ്യമിട്ടാണ് ആക്രമണമെന്ന് ഉത്തരവാദിത്വം ഏറ്റെടുത്തവർ പറഞ്ഞു. സിവിലിയന്മാരുടെ മരണത്തിന് സുരക്ഷാസേനയുടെ വിവേചനരഹിതമായ വെടിവയ്പ്പാണ് കാരണമെന്നും അവർ ആരോപിച്ചു. സിസ്താൻ-ബലൂചെസ്ഥാൻ പ്രവിശ്യയിൽ, പാകിസ്ഥാനുമായും അഫ്ഗാനിസ്ഥാനുമായും അതിർത്തി പങ്കിടുന്ന സഹെദാൻ, സാമ്പത്തിക-രാഷ്ട്രീയ അവഗണനയിൽ പരാതിപ്പെടുന്ന ബലൂച് ന്യൂനപക്ഷത്തിന്റെ കേന്ദ്രമാണ്. ഈ പ്രവിശ്യയിൽ സുരക്ഷാസേനയും വിഘടനവാദികളും തമ്മിലുള്ള ഏറ്റുമുട്ടലുകൾ പതിവാണ്.

A terrorist attack on a courthouse in Zahedan, Iran's southeastern capital, killed nine people, including a mother and her infant, and injured 22 others, mostly civilians